Read Zou SAWLTAHTE 20 Bible Online

SAWLTAHTE 20 - Zou bible

SAWLTAHTE 20

¹Tua buoina a ven zaw ciengin Paul in nuazuite hlanin a hanthot zaw ciengin mangpha pai-in Macedonia gamah a pei hi.

²Tua gam tengah ama zin kawikawi a, thu um mite hanthotna tampi a pieh zaw ciengin Greek gamah tung a,

³tua munah hla thum sung a tam hi. Tembaw tawh Syria gam pei ding a kisah laitahin Jew mite in ama a tha sawm ziehun Macedonia gam tawnin kilekia ding a khensat hi.

⁴Beroea khuomite Pyrrhus’ tapa Sopater, Thessalonica khuomi Aristarchus le Secundus, Derbe khuo mite Gaius le Timothy, Asia gam pan Tychicus le Trophimus-te in ama a zui uhi.

⁵Amate na mapei-in Troas khuo ah ei na ngah uhi;

⁶ahi vangin Tolsawlo Anlum Pawi a ven zaw ciengin tembaw tawh Philippi panin ka peikhie vua, ni nga sungin Troas khuo ah amate ka pha vua, tua munah ni sagi sung ka tam uhi.

⁷Nipi kalkhat sung a ni masa pen ni-in, khomun balnen dingin ka kikhop uh ciengin Paul in amate tawh kikupna khat a bawl hi; a zing ciengin ama a pei sawm ziehin zankim dongin a thugen a zomsuoh hi.

⁸Ka kikhopna uh innkhan tungnung ah meivah tampi kivah hi.

⁹Paul in thu a sawtgen kikal sungin tawlet tunga a tuong Eutychus kici tangval pa khat a kimut suohin a lusu hi. A kimut nahsuo seng ahi ziehin dawl thumna panin kiesuhin a sisa-in a luong kiphong hi.

¹⁰Hinanle Paul kumsuh pai a, ama tungah bawhsuhin a kawipom a, “Patau sih un, azieh pen ama sungah a hinna om lai hi,” ci-in kiko hi.

¹¹Tua ciengin innkhan tungnung ah Paul kato a, ama in khomun balnenin ne a, amate tawh khuovah dongin a holim zaw ciengin a pei hi.

¹²Tua sung tengin amate in tangval pa a hingin a zawpi vua, a kipah mama uhi.

¹³Kote in Paul ka lah sawm ziehun Assos khuo ah tembaw tawh ka na mapei uhi; azieh pen Paul in leilam tawh pei ding a gelsa mal ahi hi.

¹⁴Assos khuo ah ei mu ciengin kohawn zong ama tembaw tungah tuongsahin Mitylene khuo ah ka pei uhi.

¹⁵Tua panin tembaw tawh ka dingkhie vua, [105]a zing ciengin Chios tuikul tawh a kigalsaina mun ka tung uhi. A zing ni-in Samos tuikul ka tung vua, a thai ni-in Miletus khuo ka tung uhi.

¹⁶Azieh pen Paul in Asia gam sungah a hun zang loin Ephesus khuo nawtsuoh dinga a khensatsa ahi hi; ahi theile Pentcost pawi ni-in Jerusalem-ah a om nuom mama hi.

¹⁷Ama in Melitus khuo panin Ephesus khuo ah mi sawl a, pawlpi upate in ama a kimupi nadingun a thuta hi.

¹⁸Ama kung a tun ciengun amate kungah, “Asia gam kang tun masah ni-a kipanin note lahah ka op sunga ka hindan zosie na thei sieng ta vua,

¹⁹Jew mite in ei na tha sawmna zieh vua ang tung gimnate keima in ka na thuoh a, kiniemkhiehna le hlitui naptui tawh TOPA’ na ka na sem hi.

²⁰Keima in na phattuom nading uh thute khat zong hen nei loin mipi mai-ah ahi a, inn khat zaw inn khatah ahi zongin hing genin kang hil zo ta hi.

²¹Keima in Jew mite le Greek-te tungah Pasien lama kisiakiana thu le TOPA Jesu lama upna thute teci ka pan zo lam noma ma in na thei uhi.

²²Tu-in Hlagau’ sila[106] ka hi ma bangin, kei tungah bang hing pieng ding ci thei lopi-in Jerusalem khuo-a pei ding ka hi hi.

²³Tuale khuopi zosie-ah thongkiehna le bawlsietnate in ei ngah gige a hina thu Hlagau Siengtho in kei tungah teci a pang hi.

²⁴Ahi vangin Pasien’ hepina ziehin TOPA Jesu kung pana ka nga lungdamna thu ka teci pan nading ahi ka lampi le ka nasepnate ka zaw thei nading ahi nah po leh kei adingin ka hinna man nei-in ka ngaisun sih hi.

²⁵“Tu-in ahile note lahah hing vah kawikawi-in Pasien’ gam thu kang hil ahi note koima khat beh in ka mai nei mu ngai nawn sih ding uhi, ci ka thei hi.

²⁶Tua ahi tah ziehin tuni-in note khatpo’ sisan ziehin maw ka puo sih hi, ci thu kang gen hi.

²⁷Azieh pen Pasien’ gelna buppi ip nei loin note tungah teci ka pang zo hi.

²⁸Pasien in a Tapa’ sisan tawh a leisa ama’[107] hlattuom pawlpi a vah dingin, Hla Siengtho in note’ khut sunga ang koi na tuuhon zosie ule noma ma limtahin na kem un.

²⁹Ka pei zaw ciengin note lahah ngie gilote hing lutin tuuhonte ang dawm vawt sih ding uhi, ci ka thei hi.

³⁰Noma’ pawl sung pan nangawnin zong mi kimkhat in amate lamah nuazuite a zawl nadingun thuman a lehei mi ang pieng ding hi.

³¹Tua ahi ziehin kigalging unlen, kum thum sung a sun a zanin khawl loin hlitui luong kawmin mi zosie tunga kang thuhilte na phawh bo un.

³²Tu-in Pasien in note hing lamkipin a siensuosa mi zosie lahah gouluo ang pie ama’ hepina thu sungah note kang ap hi.

³³Koima’ neisa, ngun ahi a, kham ahi a, puonsil nihten ahi zongin ka deigaw sih hi.

³⁴Ka khut tawh na ka sem a, keima le ka guolte’ kisapnate ka sihna thu noma ma in na thei uhi.

³⁵‘Ngana sangin piehna-ah thupha tamzaw hi,’ ci TOPA Jesu’ thugente phawhin tam bang nasep hakatna tawh a thanemte i hu ding uhi, ci-in na kung vuah gamtat zie ding kang lah zo hi,” a ci hi.

³⁶Ama in thu a gen zaw ciengin khupdinin amate zosie tawh thu a ngen hi.

³⁷Amate zosie nahpi-in kapin Paul kawi-in a nam vua,

³⁸a diehdiehin amate in ei mu nawn lo ding uhi, a ci ziehin a da mama uhi. Tua ciengin amate in tembaw tung dong ama a hla uhi.