Read Zou SAWLTAHTE 21 Bible Online

SAWLTAHTE 21 - Zou bible

SAWLTAHTE 21

¹Amate tawh ka kikhen zaw ciengun tembaw tawh Cos tuikul ah tangtahin ka pei vua, a zing ni-in Rodes tuikul tungin tua panin Patara[108] khuo ka tung uhi.

²Phoenicia gam zuon ding tembaw khat ka mu ziehun tua tembaw tuongin ka pei uhi.

³Cyprus tuikul ka mu ciengun a veilamah ka pei vua, Syria gam galkai-in Tyre khuo ka tun ciengun tembaw in a vante suo ding ahi ziehin tua munah ka kum uhi.

⁴Tua munah nuazuite ka mu vua, ni sagi sung ka tam uhi. Jerusalem ah Paul a peisuoh lo nadingin Hlagau Siengtho tungtawnin amate in a gen uhi.

⁵Khum munah ka nite uh a tawp ciengin ding dawhin ka khuolzinna uh ka zom uhi; tuale amate in a unpi-un a zi a tate utawh khuo pulamah ei hla uhi. Kohaw zong tua mun tuipieu ah khupdingin thu ka ngen vua,

⁶khatlekhat mangpha ka kipai uhi. Tua ciengin tembaw tungah ka tuong vua, amate inn lamah a kilekia ta uhi.

⁷Tyre khuo panin tuipi tung khuolzin a tawp[109] ciengin Ptolemais khuopi ka tung uhi; tua munah thu um mite[110] hopi-in amate tawh ni khat ka omton uhi.

⁸A zing ciengin pei-in Caesarea khuo ka tung uhi; tuale upa sagite lahah khat ahi lungdamna thugen pa Philip inn ah ka tam uhi.

⁹Ama in pasal nei nai lo kamsang letsong a nga tanu li[111] a nei hi.

¹⁰Tua munah ni tampi ka tam sungun Judah gam panin Agabus min nei kamsang khat ang peisuh hi.

¹¹Kote kungah ama hing pei a, Paul’ kawnggah la-in tua tawh a khut le a kengte a khi zaw ciengin, “Hlagau Siengtho in, ‘Jew mite in Jerusalem khuo ah tami kawnggah nei pa tam bangin khi-in Gentile-te khut sungah pie ding uhi,’ ei ci hi,” a ci hi.

¹²Tami thu ka zah ciengun kote le tua sunga om mite in Jerusalem ah Paul a peito lo nadingin ka hlo uhi.

¹³Tua ciengin Paul in, “Bang dingin note tam bangin kapin ka lungsim kitapkhap nadingin gamta na hi uh ahei? Bangzieh ahei cile hencipna hi khop loin TOPA Jesu’ min adingin Jerusalem ah sina nangawn a thuoh dinga a kithawisa ka hi hi,” ci-in a dawng hi.

¹⁴Ama a kizawl zawh lo ciengin, “TOPA’ deina bang hi taheh!” ci simlo ka dai khawl ta uhi.

¹⁵Tua nite zaw ciengin kithawi-in Jerusalem khuo ah ka peito uhi.

¹⁶Caesarea khuo panin zong nuazui pawlkhat in ei zui vua, ka zintun nading uh nuazui masa khat ahi Cyprus-te Mnason inn dongah ei hla uhi.

¹⁷Jerusalem khuo ka tun ciengun sanggamte in lungdam tahin ei na dawn uhi.

¹⁸A zing ciengin James kungah Paul tawh ka va haw ta vua, upate zosie zong a na om uhi.

¹⁹Paul in amate a hopi zaw ciengin a nasepna tungtawnin Gentile-te lahah Pasien’ nasepnate khat zaw khat a bansut hi.

²⁰Amate in tua thu a zah ciengun Pasien a phat uhi. Tua ciengin amate in, “Sanggam pa aw, Jew mite lahah thu um mi tul bangza om zo ci na thei a, a unpi-un thukham zui ding lam a pawnthaw mamate ahi uhi.

²¹Gentile-te lahah a teng Jew mite zosie in Moses’ thukham a taisan nading ule a tate uzong a tep uh kitan loin a ngainate uh a zui lo nadingun genin na hil lam amate kungah kigen zo hi.

²²Amate in tam sunga nang tun lam za valon ding uh ahi ciengin bang law ding i hi ahei?

²³Tuaci’n kang gen bangun bawl in. Kote in a kiciemsa mi li ka nei uhi.

²⁴Tuate tawh kipawl inlen ngaina kisiensuona ah amate tawh va kihalin a lu a heukieu man ding uzong sum va pie ta’n. Tua bangin bawl lacin mi zosie in nang tungtang a gensa thu uh bangma ahi lo lam le nang mama zong thukham zui na hi lam ang thei ta ding uhi.

²⁵Ahi vangin Gentile thu um mite ading ahile milim biehna ante, sasi, lawlmeh[112] sate le numei-pasal pahtatnate a tan nading uh, ka thukhensatna uh lai ka hlah zo uhi,” a ci uhi.

²⁶Tua ciengin Paul in tua mite zawpi a, a zing ni-in amate tawh amama a kisiensuo zaw-in biehinnpi sungah lut a, siensuona ni a tawp hun ding le amate ciet in biehpiehna a bawl ding uh hunte a va theisah ta hi.

²⁷Ni sagi a cin kuon ciengin Asia gam pana Jew mite in biehinnpi sungah ama a mu ciengun mihonte hantawhin a man vua,

²⁸“Israel mite aw, ei panpi un! I mite, i thu kham le tami mun langpangin muncin tenga om mi zosie tungah thu hil kawikawi pa tam pa ahi hi; tua banah ama in Gentile-te peipi-in biehinnpi sungah lutsah a, tami mun siengtho a buasah hi,” ci-in a awng vapuoh uhi.

²⁹Azieh pen masanglai khatin khuo sungah ama le Ephesus khuomi Trophimus a kithuo a mu vua, tuaci’n biehinnpi sungah Paul in ama ang lutpi hi ngelngel va, ci-in a ngaisun uhi.

³⁰Tua ciengin khuozang buppi buoi a, mite zong a hontai uhi. Amate in Paul a man vua, biehinnpi sung panin ama kaiphitin thakhatin kotpite a kha pai uhi.

³¹Amate in Paul tha a sawm laitahun Jerusalem khuopi buppi buoi hi, ci-in galkapmangpa kungah thu na kipuoh hi.

³²Ama in thakhatin galkapte le galkap bute hlanin amate lamah a taisuh pai uhi. Amate in galkapmangpa le galkapte a mu ciengun Paul a vuo nawn sih uhi.

³³Tua ciengin galkapmangpa zong pei a, ama manin siakhau ni tawh khi dingin thu a pie hi; ama koi hi a, bang sem ahei ci thu ama in dong hi.

³⁴Mihonpi lahah pawlkhat in thu khat gen a, adang pawlkhat in thudang khat ma genin a awng gawp uhi; mihonte buoi mama a, ama in lah a thu a theicien lo ziehin galkap len sungah Paul a peipi nadingun thu a pie hi.

³⁵Kenlei cielah Paul a tun ciengin mihonte gilo seng ahi ziehin galkapte in ama a puo uhi.

³⁶A zui mihonpi in “Ama that un!” ci-in a awng vapo uhi.

³⁷Galkap len sungah Paul a lutpi kuonun ama in galkapmangpa kungah, “Thu khat kang gen thei diei mah?” ci-in dong hi. Galkapmangpa in, “Greek ham na thei ei mah?

³⁸Tua ciengin masang lai khat a kumpi ledo dinga mi holtuo, senel gama misuom tul li a peipi Egypt mipa hi lo na mah?” ci-in a dong hi.

³⁹Paul in, “Khuopi thupi mama khat ahi Cilicia gam Tarsus khuopi-a pieng Judah mi khat ka hi hi; hepina tawh mipite kungah thu ei gensah in,” ci-in a dawng hi.

⁴⁰Ama in phalna a pieh ciengin Paul zong kenlei ciel tungah dingin mipite a dai thei nadingin a khut zah phei-in a sip bepun Hebrew kam[113] tawh thu gen a: