Read Zou SAWLTAHTE 22 Bible Online

SAWLTAHTE 22 - Zou bible

SAWLTAHTE 22

¹“Sanggamte le pate aw, tu-in na mai vuah ka kihutna dinga kang gen thu ngai un,” a ci hi.

²Amate in Hebrew[114] hama a thugen a zah ciengun a sip tasem vua, tua ciengin Paul in:

³“Kei pen Cilicia gam Tarsus khuopi-a suoh Judah mi khat ka hi a, ahi vangin tami khuo sunga Gamaliel’ kengbula a khang ka hi a, i pu i pate’ thukhamte khautahin ei na kihil a, tu ni-a no teng zosie ma bangin Pasien lamah ka na pawnthaw mama hi.

⁴Keima in tami Lampi a zui numei pasal a koimapo manin thong sung denna-in ka nei a, a si dongun ka bawlsie hi.

⁵Siempu lien pa le upa buppi in zong kei thu teci a pang thei ding uhi. Damascus khuopi-a sanggamte a kihen nadingin keima in amate tung panin phalna laite ka na nga a, tuaci’n amate dan a kipieh thei nadingin khau tawh a hen ding le Jerusalem khuopi ah a puohkia dingin tua tahah ka va kuon ta hi.

⁶“Ka khuolzinna lampi ah Damascus khuo ka tun kuon sunkim pawl laitahin, vantung panin khuovah golpi khat in thakhatin ei khawsuh hi.

⁷Tuolah ka pua a, tuale aw khat in keima kungah, ‘Saul, Saul aw, bang dinga kei nei ci bawlsiet ahei?’ ei ci ka za hi.

⁸Keima in, ‘TOPA aw nang koi na hei?’ ci-in ka dong leh ama in keima kungah, ‘Na bawlsiet Nazareth khuomi Jesu ka hi hi,’ ei ci hi.

⁹Tua laitahin ka zawpi mite in tua khuovah a mu vangun kei kunga thu ei gen pa’ aw a za sih uhi.

¹⁰Keima in, ‘Bang ka bawl diei TOPA?’ ci-in ka dong hi. TOPA in keima kungah, ‘Tho inlen Damascus khuo ah pei-in, tuanah Pasien in sep dinga a sesa thu zosie ang kigen ding hi,’ ei ci hi.

¹¹Tua khuovah’ vang tang luo ahi ziehin khuo ka mu thei ta sih a, ka zawpite in ka khutin ei kai vua, Damascus khuo lamah ei peipi uhi.

¹²“Thukham tawh kituoha biehna pawnthaw mama le Jew mite zosie in a na genphat uh Ananias kici mi khat tua tahah a om hi.

¹³Tuale ama hing pei-in ka gei-ah ang ding a, “Sanggam pa Saul aw, khuo mukia in!’ ei ci hi. Tua hun lienin ka mit ang vah a, ama ka mu thei pai hi.

¹⁴Tua ciengin ama in, “I pu i pate’ Pasien in ama’ deina a thei ding, Midih Pa a mu ding le ama’ aw a za dingin nang ang teel zo hi.

¹⁵Bangzieh ahei cile na musa le na zahsa thute, mi zosie tunga teci a pang ding na hi hi.

¹⁶Tu-in zong bang dinga kiheh na hei? Tho-in ki-baptize inlen, ama’ min lo inlen na mawnate sawp siengsah in,’ a ci hi.

¹⁷“Jerusalem ah ka kilekia zaw biehinnpi sungah thu ka nget laitahin mumang bangin ka om hi.

¹⁸Keima in Jesu ka mu a, tuale ama in, ‘Kinaw inlen Jerusalem panin peikhie meng in, azieh pen amate in keima thu na teci panna ang sang sih ding uhi,’ ci-in ei gen hi.

¹⁹Keima in, “TOPA aw, kikhopna inn cintengah nang ang um mite thongkhie-in, ka sat lam amate mama in ei thei uhi.

²⁰Nangma’ teci pa Stephen’ sisan a luon laitahin kei mama zong ama gei-ah ka ding a, ama a si ding thukimin a thatte’ puon ka keppieh lai hi,’ ka ci hi.

²¹Tua ciengin ama in keima kungah, “A gamlapi khata a om Gentile-te kungah hing sawl ding ka hi ziehin pei in,’ ei ci hi,” a ci hi.

²²Tam thu a gen dong cieng amate in a thugen uh a ngai lai vua, ahi vangin amate in, “Tam bang mihing leitung panin hemkhie un! Azieh pen ama a hing dingin a kilawm sih hi,” ci-in a kiko vapual uhi.

²³Amate a kiko kawmun a puontuolte uh suo dawhin van lamah leivuite a the laitahun,

²⁴amate in Paul a hici awhsanna uh azieh bang pen ahei ci a thei nadingin galkapmangpa in satna tawh ama thusit dingin galkap lenah a peipi nadingun thu a pie hi.

²⁵Ahi vangin savun khauhuol[115] tawh ama a khi ciengun Paul in a gei-a ding galkap bupa kungah, “Khiel hi, ci-a thu kikhen lopi-in Rome mi khat na sat ding uh thukham tawh kituoh ma amah?” a ci hi.

²⁶Galkap bupa in tua thu a zah bepin galkapmangpa kungah pei-in, “Nang bang sem ding na hei? Tam mipa, Rome gammi ahi bo hi,” ci-in a gen hi.

²⁷Galkapmangpa pei-in Paul kungah, “Nang Rome gammi na hi amah? ei gen in,” a ci hi. Tuale ama in, “Ka hi ma hi,” a ci hi.

²⁸Galkapmangpa in, “Rome gammi ka nga nadingin sum tampitah ka tawp hi,” ci-in a dawng hi. Paul in, “Kei ka suo-a kipanin Rome gammi-a pieng ka hi hi,” a ci hi.

²⁹Thakhatthu-in ama kung panin thu sit dinga a kisa mite a kilekia pai uhi; tuale galkapmangpa in siakhau tawh a khi Paul pen Rome gammi khat ahi lam thei ahi ziehin a zau mama hi.

³⁰Bang zieha Jew mite in Paul a mawmat uh ahei ci thu galkapmang pa in a thei nop ziehin a zing ni-in ama hlansah a, a kimutuo dingin siempu uhpite le biehna uliente zosie thu a pie hi. Ama in Paul peipisuhin a mai vuah a dingsah hi.