Read Zou SAWLTAHTE 23 Bible Online

SAWLTAHTE 23 - Zou bible

SAWLTAHTE 23

¹Paul in biehna uliente a etcien laitahin ama in, “Sanggamte aw, keima in tuni cieng dongin Pasien mai-ah lungsim kisuonna om loin hinkhuo ka na mang hi,” a ci hi.

²Tua ciengin siempu lien pa Ananias in a gei-a ding mite kungah Paul’ nephu behpieh un ci-in thu a pie hi.

³Tua ciengin Paul in ama kungah, “A kizutngo kawm aw, Pasien in nang ang beng ding hi! Kei tungah thukham tawh a kituoha thukhen dingin tua sunga to hi napi cin, bang dinga a lelama thu na khen a, kei nephu beh dinga thu na pieh ahei?” a ci hi.

⁴A gei-a a ding mite in, “Nang, Pasien’ siempu lien pa zako viel ding na mah?” a ci uhi.

⁵Paul in, “Sanggamte aw, ama siempu lien pa ahi lam ka thei sih hi; azieh pen, ‘Na mite uh’ makai pa na gensie sih ding uhi,’ ci-in kigiel ma hi,” a ci hi.

⁶Mi pawlkhatte pen Sadducees-te hi a, adangte Pharisees-te ahi lam Paul in a thei bepin ama in, “Sanggamte aw, kei zong Pharisees-te’ tapa, Pharisee mi khat ma ka hi hi. Misite thawkia tawh kisai lametna[116] thu ziehin thusitna thuoh ka hi hi,” ci-in biehna uliente mai-ah a kiko hi.

⁷Ama in tua thu a gen ciengin Sadducees-te le Pharisee-te kikalah kiselna pieng a, tua a kikhawm mite phalni a kisuo uhi.

⁸(Sadducees-te in misite thawkiana om lo a, vantung mite hile, hlagau kicite hile om lo hi, a ci uhi; hizongle Pharisee-te in tua thu thumte om hi, ci-in pom uhi.)

⁹Tua ciengin buoina lienpi tung a, Pharisee pawlte lah panin thukham hil siete pawlkhat dingin nahpi tahin a niel vua, “Tam pa tungah bangma mawna ka mu sih uhi. Hlagau ahiei vantungmi ahiei khat in ama kunga thu a gen hi kha mawh leh bang na law ta ding vuoi?” a ci uhi.

¹⁰Kiselna a husiet mama ciengin amate in Paul hing ehmal kha va uh ci-in galkapmangpa a lunghimaw ziehin, galkapte peisuhin zawthawthu tawh ama la-in galkap len-ah a peipi nadingun thu a pie hi.

¹¹Khum zanin Paul kungah TOPA ding a, “Kilungkhausah in! Bangzieh ahei cile Jerusalem khuo ah keima’ thu teci na pan bangin Rome khuopi ah zong teci na pang ding hi,” a ci hi.

¹²Zingmawng ciengin Jew mite in kidap zopna khat bawlin Paul a tha masangsie uh an ne lo tui dawn loin a op nadingun kiciemna a bawl uhi.

¹³Tami sawmdapna sunga a kihal mi sawm li val bang a hi uhi.

¹⁴Siempu uhpi pa le upate kungah amate pei-in, “Paul ka tha masangsie-un bangma an ciem lo dingin khautahin ka kiciem zo uhi.

¹⁵Tua ahi ciengin tu-in note le na biehna uliente in Paul’ thu a kicien zaw-a thu sit nuom kinei unlen, galkapmang pa in na kung vua ama ang peipisuh nadingin theisah un. Ama ang tun masangin a that dingin a kiging sa-in ka om uhi,” a ci uhi.

¹⁶Tua laitahin Paul sanggamnu’ tapa in a kibuhdapna thu a zah ciengin galkap len sungah lutin Paul kungah a gen hi.

¹⁷Paul in galkap bute khat hlan a, “Tami tangval pa in galkapmangpa kungah gen ding thu kimkhat nei ahi ziehin ama kungah va zawpi ta’n,” a ci hi.

¹⁸Tuaci’n galkap bupa in galkapmangpa kungah tua tangval pa zawpi a, “Thongkie pa Paul in keima ei hlansah a, tami tangval pa in nang tungah gen ding thu nei ahi ziehin ama na kunga ang puoh dingin kei ei sawl hi,” a ci hi.

¹⁹Galkapmangpa in tua pa a khut tawh kai-in ama ni guoh a peikhie vua, “Nei gen ding thu bang ahei,” ci-in a dongdap hi.

²⁰Ama in, “Jew mite in Paul’ thu a kicing zaw-a a thei nuom kipangin zing ciengin biehna uliente mai-ah Paul na peipi nadingin ang nget ding uh kithukim zo uhi.

²¹Ahi vangin amau’ thu mang sin, azieh pen ama buhdap dingin mihing sawmli val bang a om uhi. Amate in ama a tha masangsie uh an ne lo tui dawn lo dingin kiciemna a nei uhi. Tu-in amate in nangma kung panin kamciem beh ngahin kiging sa-in a om uhi,” a ci hi.

²²Tuaci’n galkapmangpa in tangval pa kungah, “Keima kungah tami thu nei ko lam koima tungah gen sin,” ci-in vaihlahin a peisah hi.

²³Tua ciengin ama in galkap bute ni hlan a, “Tu zan nai kuo-in Caesarea khuo-a pei dingin galkap za ni, sakol galkap sawm sagi le teipi tawi galkap za ni tawh a baisa-in om in.

²⁴Paul’ tuon nading sakolte zong pie unlen, uhpi pa Felix kungah hoitahin peipi un,” a ci hi.

²⁵Ama in tam bangin laihlah khat giel hi:

²⁶“Keima Claudius Lysias in a Lien uhpi pa Felix kang hopi hi.

²⁷Jew mite in tampa a that dihtah vua, ahi vangin ama Rome mi khat ahi lam ka thei bepin ka galkapte tawh pei-in ama ka va hun dawh ta uhi.

²⁸Ama a mawsahna thu uh thei nuom ka hi ziehin keima in a biehna uliente uh mai-ah ka peipi hi.

²⁹Ama pen amau’ thukham tungtanga kimawsah na hi lel a, thong khieh nadingin ahi a, tha nadingin ahi zongin a kilawm khielna ka mu sih hi.

³⁰Tam pa tha kisawm hi, ci thu ka thei ciengin na kungah ama thakhatthu-in kang peisah a, a mawmat mite in a mawsahna thu uh na kunga ang sun nadingun thu ka pie zo hi,”[117] a ci hi.

³¹Tuaci’n galkapte in a kisawlna bangin Paul la-in Antipatris khuo ah a peipi uhi.

³²A zing ciengin sakol galkapte tawh ama peisuohsah a, amate ahile galkap lenah a kilekia uhi.

³³Caesaria khuo a tun ciengun uhpi pa kungah a lai puoh a pie vua, Paul zong ama tungah a ap uhi.

³⁴Ama in tua laihlah sim a, nang bang gam pan na hei, ci-in dong a, ama in Cilicia gammi ahi lam a thei ciengin

³⁵ama in, “Ang mawmat mite ang tun ciengin na thu kang sit ding hi,” a ci hi. Tua ciengin Herod kumpi inn[118] sungah ama koi-in a cin nadingun thu a pie hi.