Read Zou SAWLTAHTE 24 Bible Online

SAWLTAHTE 24 - Zou bible

SAWLTAHTE 24

¹Tua zaw ni nga ciengin upa pawl khat le Tertullus a kici sitni khat tawh siempu lien pa Ananias a peisuh vua, amate in uhpi pa mai-ah Paul a mawsahna uh thute a sung uhi.

²Paul a kihlat zaw ciengin Tertullas in ama mawsahna thugen a kipan hi: “A Lien Mangpipa[119] aw, nangma ziehin lungmuong tahin sawtpitah ka om vua, nangma’ vaihawm siemna tawh tami minamte adingin puophatnate zong kibawl zo hi.

³Kote in mun zosie le vai zosie-ah tam na vaihawmnate lungdamna lienpi tawh ka sang uhi.

⁴Ahi vangin kote in sawtveipi kang buoisah nuom lo ziehun tomkima kang gen ding thute hepina tawh nei ngaipieh nadingin kang thum hi.

⁵Kote in tam mipa pen buoina a piengsah pa ahi a, leitung bup Jew mite lahah mi holtuo pa khat le Nazareth pawlte’ makai pa khat ahi lam ka thei zo ta uhi.

⁶Ama in biehinnpi nangawn buasah a sawm ziehin kote in ama ka man uhi.

⁷[120] Kote in ka thukham utawh kituohin ama tungah thu ka khen sawm uhi. Hizongle galkapmangpa Lysias hing pei-in ko kung panin pauhat thu tawh ama ei lahpieh hi.

⁸Nang mama in thu hing sit lacin ama tunga ka mawmatna zosie uh a man ahi lam na thei ding hi,” a ci hi.

⁹Jew mite in zong ama panpi-in tami a thugente zosie a man ma ahi hi, a ci uhi.

¹⁰Uhpi pa in thu gen dingin Paul lamah khut a van ciengin ama in, “Nangma in tam minam tungah kum tampi sung thukhenpa na hi lam ka thei ziehin lungdam tahin ka kisutna ding thu ang gen ka hi hi.

¹¹Na mu thei ding ma bangin Jerusalem ah Pasien bie dinga ka peito zaw ni sawm le ni ni zong a val nai sih hi.

¹²Amate in biehinnpi sungah mi khatpo tawh ka kiselna hile, kikhopna inn sung ah hile, khuopi sung muncin tengah hile mihonpi ka holtuona bangma a mu sih uhi.

¹³Tu-a amate in ang sun uh ei mawmatna thu uzong a manna thu ang lah thei tuon sih uhi.

¹⁴Hizongle keima in pawltuom a ci uh tami Lampi zui-in ka pu ka pate’ Pasien ka bie a, thukham laibu sung le kamsangte’ laibu sunga a kigielsa thu zosie ka um hi, ci thu na kungah kang pulah hi.

¹⁵Amate mama in zong midihte le midih lote’[121] thawkiana om tuoh ding hi, ci-in a san bangun keima in Pasien sungah lametna ka nei hi.

¹⁶Tua ahi ziehin keima in Pasien tung le mi zosie tungah kisuonna ka nei lo nadingin ka hi thei za tawh ka hanciem hi.

¹⁷Kum tampi zaw ciengin ka minamte kungah huna sum puoh ding le biehna lui dingin tu-a ang kuon ka hi hi.

¹⁸Amate in biehinnpi sungah tamte bawlin ka op ei mu lai-un mihonpi om lo, buoina zong om vawt loin kisiensuona ziatan ka man zo lien leh amate in kei ei na mu uhi.

¹⁹Hizongle Asia gam pana ang pei Jew mite pawlkhat zong a om vua, amate in kei tungah mawsah ding thu khatpo ei nei uleh hing pei-in na mai-ah ei mawmatna uh thu ang sun ding uh a kilawm hi.

²⁰Ahi sihle zong biehna uliente mai-a ka din lai-in tam mite in keima tungah bang khielna mu uh ahei ci gensah inlen,

²¹amate mai-a ka din lai-in, ‘Misite thawkiana thu tawh kisai-in tuni-in na mai vuah thusitna ka thuoh hi,’ ci-a ka kiko pen ahi lo buong leh bangma om lo hi,” a ci hi.

²²Hinanle Lampi thu a theizaw Felix in a thu khen ding sot to a, “Galkapmangpa Lysias ang tun ciengin keima in na thu uh kang khenpieh ding hi,” ci-in a gen hi.

²³Tua ciengin galkap bupa in ama a cin nadingin thu pie a, hinanle ama in phabep cieng khat suotahna a pieh nading le a kisapnate a en nuom a lawmte khatpo a kham lo nadingin zong thu a pie hi.

²⁴Ni bangza ahei khat a sawt zaw ciengin Felix in Judah numei khat ahi, a zi Drusilla tawh pei-in Paul hlansah a, Jesu Khris upna thu a gen a ngai uhi.

²⁵Paul in dihna thu, pumpi kidehzawhna thu le ang tung ding thukhenna thute a kuppi ciengin Felix zau a, “Tu-in pei phot inlen hun lem ka nga ciengin kang hlansah kia ding hi,” a ci hi.

²⁶Khum hun ma-in Paul in sum ei pie kha leh ci lametna tawh ama hlan thimthemin hopi zel hi.

²⁷Kum ni a cin zaw ciengin Felix’ za laihin Porcius Festus pang a, Felix in Judah-te’ maipha a mu nop ziehin thong kiasa-in Paul a nuasie hi.