Read Zou SAWLTAHTE 26 Bible Online

SAWLTAHTE 26 - Zou bible

SAWLTAHTE 26

¹Agrippa in Paul kungah, “Na thu na gen thei nading phalna kang pie hi,” ci-in a gen ciengin Paul in a khut zahin a kisutna ding thu a gen hi:

²“Kumpi Agrippa aw, tuni-in ahile na mai-ah Jew mite’ ei mawsahna thu zosie ka kisutna ding thu gen ding ka hi tah ziehin hampha ka kisa hi.

³Azieh pen nangma in Jew mite’ ngaina zosie le a kikalna uh thu zosie na theicien deudeu hi. Tua ahi ziehin ka thugente lungduoi taha nei ngaipieh nadingin kang thum hi.

⁴“A cila patin Jerusalem khuo ka mipite lahah hinkhuo ka na zang a, ka khangno lai-a kipanin Jew mite zosie in keima’ hindan ei na theisiem uhi.

⁵Ka biehna sung vuah a khau penpen ahi Pharisee pawl ka hi lam le ka hindante teci a pan nuom uleh a sawtpi lai-a kipanin a theisa uh ahi hi.

⁶Pasien in ka pu ka pate uh a na pieh kamciem ka lamet ziehin tu-in tam munah thusitna thuoha a ding ka hi hi.

⁷Minam sawm le nite in tuami kamciem nga dinga a kilamet ziehun sun le zanin kukal tahin Pasien a na bie mielmuol uhi. A Lien Mangpipa aw,[122] tami lametna thu zieha Jew mite in kei ei mawmat uh ahi hi!

⁸Note khatpo in Pasien in misite thosah hi, ci thu bang dinga uphuoi lo-a na ngaisut uh ahei?

⁹“Kei mama in Nazareth mi Jesu’ min langpanga na tampi sep ding kilawm hi, ci-in ka na ngaisun ngai hi.

¹⁰Keima in tua bangin Jerusalem ah ka na sem pai hi; siempu uhpite’ phalna tawh misiengtho tampi tahte thong sungah ka khum banah amate si nading thu a kikhen ciengin zong thukimna me ka na pie lai hi.

¹¹Zawthaw thu tawh Pasien a gensiet nadingun kikhopna inn zosie-ah amate tamveipi dan ka pie hi; amate tungah lungthah luo ka hi ziehin gamdang khuopite lah nangawnah amate ka sulzui hi.

¹²“Tam thu lungsimah kuo kawmin siempu uhpite’ thuneina le sawlna tawh Damascus ah ka va zin ta a,

¹³a Lien Mangpipa aw,[123] sunkim pawl lampi-a ka pei laitahin keima le ka zawpite kimvelah ni sanga a tangzaw khuovah khat vantung panin ang tang ka mu hi.

¹⁴Ka unpi-un lei lahah ka puasuh ciengun Hebrew ham[124] tawh, ‘Saul, Saul aw, bang dinga nei bawlsiet ahei? Keng tawh ciengzum khat sui lacin nangma kiliemsuo na hi lel hi,’ ei ci aw khat ka za hi.

¹⁵‘TOPA aw, nang koi na hei?’ ci-a ka dawh ciengin TOPA in, ‘Na bawlsiet pa Jesu ka hi hi.

¹⁶Ahi vangin tho inlen na keng tawh ding in; bangzieh ahei cile nang in keima[125] sunga na musa nate le na tunga keima kang kilah lai nading thute a sem ding le teci a pang dinga kang se zieha na kunga ang kilah ka hi hi.

¹⁷Amate kunga kang sawl nading ahi na mite le Gentile-te’ khut sung panin nangma kang hunkhie ding hi.

¹⁸Khuomiel sung panin khuovah sung le Satan’ vanglietna panin Pasien lamah Gentile-te a kihei ziehun a mawnate uh a kimaisah thei nading le, keima sunga om a upna ziehun amate in a kisiensuosa mite lahah mun a nga thei nadingun, a mit uh a honpieh dingin nangma kang sawl ding hi,’ ei ci hi.

¹⁹“Tua zaw ciengin Kumpi Agrippa aw, vantung mangmuna thu mang loin ka om sih a,

²⁰ahi vangin amate kisiakia-in Pasien lam ang kihei nading ule kisiakiana tawh a kituoh gamtatnate ang lah nadingun, a masa penin Damascus khuo, tua zaw ciengin Jerusalem khuo, Judea gam teng le Gentile-te kungah zong ka tangko hi.

²¹Tami thu hang tawh Jew mite in biehinnpi sungah kei ei manin ei tha sawm uhi.

²²Keima in Pasien kung panin huna ka nga a, tuni cieng dongin tam munah dingin, a neu a lien tungah teci ka pang a, bangma dang gen loin Moses le kamsangte in ang pieng ding hi, ci-a a gensa uh thu ma ka gen hi:

²³Tua thu in: Messiah[126] in sina thuohin misite lah panin a tho masa pen hi ding a, i mipite kung le Gentile-te kungah khuovah thu a tangko ding hi,” a ci hi.

²⁴Ama in tami a kisutna thu a gen laitahin Festus in, “Paul aw, nang mimaw na hi hi! Na pilna tampi sinna in nang ang lemotsah ta hi!” ci-in nahpitahin ama a kiko hi.

²⁵Hizongle Paul in, “Hoi tungtuong Festus aw, kei pen a maw ka hi malmal sih a, pilvang taha thuman thutah gen ka hizaw bo hi.

²⁶Kumpipa in tami thute na thei tahtah ziehin nop bangbangin kang gen ahi hi; azieh pen tami thute khat mama zong a kidapbawl hi valawh lo ahi ziehin na thei khah lo om lo dingin ka um hi.

²⁷Kumpi Agrippa aw, kamsangte na um ei mah? Na up lam ka thei hi,” a ci hi.

²⁸Agrippa in Paul kungah, “Hun tomno khat sungin Tapidaw suoh dinga ei zawl na hi amah?” a ci hi.

²⁹Paul in, “Hun a tom a, a sau zongin nang beh hi loin tuni-a ka thugen a ngai mi zosiete in tami siakol bulnate ci longal ah kei ei bah kim nading vua Pasien kunga thu ngen ka hi hi,” a ci hi.

³⁰Tua ciengin kumpipa le uhpi pa a dingto vua, tuale Bernice le a topi mite zong a ding uhi.

³¹Amate a peikhiet zaw ciengun, “Tam pa in si nading le thongkieh nading za-in bangma bawl lo hi,” khatlekhat a kici uhi.

³²Agrippa in Festus kungah, “Tam pa in kumpipa tungah a thu a na khang zo nai lo khat hi leh kihla thei lel ma hiven,” a ci hi.