Read Zou SAWLTAHTE 27 Bible Online

SAWLTAHTE 27 - Zou bible

SAWLTAHTE 27

¹Italy gamah tembaw tawh ka pei ding uh thu a kikhensat zaw ciengin amate in Augustus galkap honte lahah zakhat a uh Julius kici galkap bupa’ khut sungah Paul le thongkie dang pawlkhatte a ap uhi.

²Asia gam tuipi dung teng pei dinga a kisa Adramyttium tembaw tungah tuongin tuipi tungah ka om vua, Thessalonica pana ang pei Macedonia mi khat ahi Aristarchus in zong ko ei zui hi.

³A zing ciengin Sidon khuo ah ka tung uhi; Julius in Paul na limbawl mama a, ama’ tasapnate a et thei nadingun a lawmte kungah ama a hawsah hi.

⁴Tua khuo panin tuipi tungah ka peikia vua, hui ang lelan ziehin Cyprus tuikul kiliesahin ka pei uhi.

⁵Cilicia le Pamphylia gam gala om tuipi ka kantan zaw ciengun Lycia gama om Mura khuo ka tung uhi.

⁶Tua munah zakhat a uh galkap bupa in Italy lam zuon ding Alexandra tembaw khat mu a, tua tungah ei tuongsah hi.

⁷A muon muon no-in ni tampi sung ka pei vua, hamsapi-in Cnidus khuo ka pautun uhi. Tuale hui ang lelan ziehin Crete tuikul ka kiliesah vua, Salmone galah ka pei uhi.

⁸Hamsapi-in tuipi gei zui-in ka pei vua, Lasea khuopi gei Khawlmun Nuom kici mun ka tung uhi.

⁹Antan hun a tawp zo zieh le tuipi tung khuolzinna a zauhuoi ziehin Paul in,

¹⁰“Siete aw, i tuipi khuolzinna-ah tuohsie-in supna tampi om ding a, tembaw le i van puohte uh i sup ban vuah i hinna uh i tanlaw ding uh zauhuoi hi, ci ka mu thei hi,” ci-in amate tungah ngaisutna a pie hi.

¹¹Ahi vangin galkap bupa in Paul’ thugen sangin tembaw uhpa le tembaw nei pa’ thu a mangzaw hi.

¹²Phalbi hun sunga op nadingin tua tembaw khawlna pen mun gina ahi seng lo ziehin tua mun panin Phoenix tembaw khawlna i tun zawh khah uleh tua munah tamin phalbi hun i mang ding uhi, ci-in mi a tamzawte’ deina tawh a pei suoh uhi. Tua mun pen leilu nisuona le leitaw nitumna lam a maingat Crete tuikul tembaw khawlna mun ahi hi.

¹³Leitaw lam hui ang lan hiauhiau ciengin a tupna uh a tung zo-in kingaisut uh ahi ziehin tembaw khina siakawi bot dawhin Crete tuikul pangzui teng nehin khuolzin a kipan uhi.

¹⁴Ahi vangin a sawt loin Crete tuikul lam panin sah-nisuo a kici huipi hat mama khat ang langsuh hi.

¹⁵Hui in tembaw sem gawpin maiphu zo ta lo ahi ziehin hui lanna lamlamah ka pei mawh ta uhi.

¹⁶Cauda[127] a kici tuikul neu khat in kiliesahin ka tai laitahun tembaw’ gunkuong a siet lo nadingin ka hu zo paupau uhi.

¹⁷Amate in tembaw tungah gunkuong a kaito zaw ciengun tembaw a kip nadingin khauhuol tawh a gah uhi. Syrtis sehtalte a phuh khah ding a zau ziehun siakawi khaisa-in hui in tembaw a tawsah uhi.

¹⁸Huipi in ei nah sem gawp ta ahi ziehin a zing ciengin amate in tembaw vante paimangin,

¹⁹a ni thum ni-in tembaw’ vanzahte a khut utawh a paimang uhi.

²⁰Ni tampi sung ni le aasite ang dawh nawn loin huipi ang hat semsem ciengin, kote in suotah nading lametna kici zosie ka nuasie ta uhi.

²¹Sawtveipi an ne loin a op zaw ciengun amate lahah Paul dingin, “Lawmte aw, ka thugen ei mangin Crete tuikul pana a peikhie lo hi poma leih tam sietna le supna tawh i kipel ding hi.

²²Tu-in kilungkhausah un, azieh pen tembaw khat simlo note lahah mihing a si koima na om sih ding uhi.

²³Bangzieh ahei cile tuzanin keima ei nei le ka bieh Pasien’ vantungmi khat ka gei-ah ang ding a,

²⁴‘Paul aw, zau malmal sin; kumpipa mai-ah na ding valon ding hi; tuale Pasien in tuipi tunga nangma le na zawpite zosie tungah bihna ang pie zo hi,’ ei ci hi.

²⁵Tuaci’n lawmte aw, kilungkhausah un, azieh pen ei kigensa bangin ang pieng tahpi ding hi, ci-in Pasien sungah upna ka nei hi.

²⁶Ahi vangin tuikul tung khatah i tung teitei ding uhi,” a ci hi.

²⁷Huipi in ei mut ziehin Adria tuipi tungah ka lam kawikawi laitah uh a zan sawm le lina zankim pawlin tembaw nasemte in lei tawh i kinai ta hi, ci-in ang ummaw uhi.

²⁸Tuaci’n amate in tuithuhna ang te uleh lam sawm ni bang thuh hi, ci-in ang mu uhi; bano khat zaw ciengin ang tekia uleh lam sawm le lam nga a thuh hi.

²⁹Suongtum ka phuh khah ding uh ka zau ziehun tembaw nua lamah tembaw khawlsahna siakawi li ka khiesuh vua, zingmawng khuovah nading thu ka ngen uhi.

³⁰Hizongle tembaw tung panin tembaw nasemte daptai sawm uh ahi ziehin tembaw khawlsahna siakawi a khiesuh kinei-in tuipi sungah gunkuong a khie dap uhi.

³¹Tuale Paul in mi zakhat uh galkap bupa le galkapte kungah, “Tam mite tembaw sunga a op sih uleh, no zong na suohta zo sih ding uhi,” a ci hi.

³²Tua ciengin galkapte in gunkuong khina khauzamte attanin tui sungah a khiesuh uhi.

³³Khuo vah kuon ciengin Paul in amate zosie an ne dingin sawl a, “Tuni pen patau-in bangma an ne loin na om zaw uh a ni sawm le ni li a cin ni ahi ta hi.

³⁴Tua ahi ziehin an halkhat ne teitei bo un, kang thum hi, azieh pen tua in note ang hinsuo ding hi; bangzieh ahei cile note khat beh in na samzam khat zong na mansuo sih ding uhi,” a ci hi.

³⁵Ama in tam thu a gen zaw ciengin khomun a la hi; tuale mi zosie’ mitmu-in Pasien kungah nuomthu tut a, ama in phalsuo-in a ne dingin a kipan hi.

³⁶Tua ciengin amate zosie zong a lung uh ang nuom a, an a ne ciet uhi.

³⁷(Tembaw sunga om mi a unpi-in zani sawm sagi le guh[128] ka pha uhi).

³⁸An khamtahin a neh zaw ciengun tembaw a zan nadingin tuipi tungah mangbu vuite a pai uhi.

³⁹Zingmawng ciengin leitung bang mun tung ci a thei sih vangun amate in tuipi pieuzang khat a mu vua, ahi thei leh tua munah tembaw khawlsah dingin a gel uhi.

⁴⁰Tuaci’n tembaw khina siakawipi a khiesuh vua, tuipi sungah tuate a nuasie uhi. Tua hun sung ma-in amate in tembaw hawlna’ a khina khaute a sut dawh vua, huipi in mutin tuipieu lam a pei thei nadingun a mailama tembaw puon a khaisang uhi.

⁴¹Ahi vangin tuihuol ni in a tetuona muna om sehtal khosang khat a phuh khah ziehin leitungah tembaw a kinga ta hi. Tembaw’ a malam teng tumin a pia thei ta sih a, ahi vangin tuihuol in a nualam a satkeh gawp hi.

⁴²Galkapte’ gelna pen thongkiete khat mama in tui ngapin a suotah lo nadingun amate tha sawm ahi uhi.

⁴³Hinanle mi zakhat a uh galkap bupa in Paul a suohtahsah nuom ziehin a ngimna bang vua a bawl lo nadingun amate a kham hi. Ama in tuingap theite tui sungah leng masa-in galkai-in,

⁴⁴tuale a om lai teng singpehte tung po le tembaw van them tung po-ah tuongin a pei nadingun thu a pie hi. Tua bangin leitungah mi zosie galkai-in a suohta kim uhi.