Read Zou SAWLTAHTE 28 Bible Online

SAWLTAHTE 28 - Zou bible

SAWLTAHTE 28

¹Ka suotah zaw ciengun tua tuikul pen Malta kici ahi lam ka thei na bo uhi.

²Tua tuikul mite in lamet lopi-in ka tung vuah migitna ei lah uhi. Guo ang zu-in khuo ang vot pan ta ahi ziehin amate in ka kimkot vuah mei ei tawpiehin ei na zin do uhi.

³Paul in singkang lomkhat tomin meikuolai-ah a vang leh meisa lah panin gulsum khat hing pusuohin Paul khutah a kiviel hi.

⁴Tuikul mite in Paul khuta gul kiviel a mu ciengun, “Tam pa pen tuol that khat hi ngelngel ding hi; tuipi tung panin ang suotah vangin a thutang Pasien in a hin ding phal lo hi ding hi,” ci-in khatlekhat a kiho uhi.

⁵Ahi vangin Paul in tua gul meikuolai-ah thing dawh a, bangma a ci sih hi.

⁶Amate in ama pen hing pawmzahin ahi sihle hing thalpua-in ang si ding hi, ci-in sawtveipitah a khuongai vangun ama tungah thu lamdang a pien lo lam a mu bepun a lungsim uh kikhelin ama pasien khat hi va, a ci ta leuleu uhi.

⁷Tuami mun tawh a kigamla seng lo ah Publius a kici tuikul hausapa’ neisa logamte om a, tuapa in kote ei tungsahin ni thum sung limtahin zin ei do hi.

⁸Publius’ a pa cithua natna le gilsan vei-in lup mun tung ngahin na om hi. Ama kungah Paul va haw a, ama tungah a khut nga a, thu ngetpiehin a damsah hi.

⁹Tami thu a pien zaw ciengin tuikul tunga om cina dangte zong hing pei-in damna a nga uhi.

¹⁰Amate in patawina tampi ei pie vua, ka pei kuon ciengun lamkala zah ding a kisamte zong tembaw tungah ei guonpieh uhi.

¹¹Hla thum zaw ciengin tua tuikul ah phalbi sunga a na tamsa Unau Kopsuo nite’ lim kisuong Alexandria tembawpi khat zui-in ka pei uhi.

¹²Sirakus khuo ah ka tung vua, tua munah ni thum sung ka tam uhi;

¹³tua ciengin ding leuleu-in Rhegium khuo ka tung uhi. Tua munah ni khat zaw ciengin leitaw lam hui hing langin a ni ni ni-in Puteoli khuo ka tung uhi.

¹⁴Tua munah thu um mite[129] ka mu vua, amate in ni sagi tam dingin ei ciel uhi. Tuaci’n Rome lam zuonin ka pei uhi.

¹⁵Tua Rome-a om thu um mite in ka haw lam a zah ciengun pawlkhatte kei ei dawn dingin Appius Sumbuh le Zinbuh Thum dongah ang pei uhi. Paul in amate a mu ciengin Pasien kungah nuomthu tutin a lung a nuom mama hi.

¹⁶Rome khuo ka tun ciengun ama a cing galkap pa tawh a dei bangbanga a op nadingin Paul phalna kipie hi.

¹⁷Ni thum zaw ciengin ama in tuol sung Jew makaite a kikhawmsah hi. Amate a kikhop ciengun ama in amate kungah, “Sanggamte aw, keima in i mipite tungah hile, i pu i pate’ ngaina tungah hile ka sepkhiel bangma om lo napi-in, amate in Jerusalem khuo ah ei manin thong ei khie vua, tua panin Rome-te’ khut sungah ei ap uhi.

¹⁸Amate in thu ei sit zaw ciengun Rome-te in kei ei hla nuom uhi, azieh pen ka thu tawh kisai-in keima in sina dan ka thuoh nading a hang om lo hi.

¹⁹Hizongle Jew mite in ang niel ciengun- ka mipite tungah mawsahna bangma ka nei sih vangin-kumpipa tungah ka thu ka khan lo ang phamaw veve hi.

²⁰Tami thu ziehin note tawh kimu-in a kiholim dinga kang khop uh ahi hi, bangzieh ahei cile Israel-te’ lametna thu ziehin tam banga siakhau tawh ei kikhi ahi hi,” a ci hi.

²¹Amate in, “Judea gam panin nang thu tawh kisai lai bangma ka na nga sih vua, tana ang pei sanggamte koima khat beh in zong nang thu ei ko-in a sie lama ei gen a om sih hi.

²²Ahi vangin mun zosie-ah tam biehna pawlte’ thu a kigensie hi, ci thei ka hi ziehun, nang tung panin na ngaisutnate ka za nuom uhi,” a ci uhi.

²³Ama tawh a kimu nading uh ni khat a se zaw ciengun Paul zintunna-ah mi tampitah a va haw ta uhi. Ama in zingmawng panin nitah dongin Moses’ thukham le kamsangte’ laibu panin amate thuhil a, Pasien’ manggam thu teci pangin Jesu’ thu lamah amate a thuzaw ding a hanciem hi.

²⁴Ama’ thugen ziehin mi pawl khatte in a um vua, hinanle adangte in a um sih uhi.

²⁵Tuaci’n amate khatlekhat kithutuoh loin a om uhi. Amate a peikhiet ciengun Paul in thugenna khat neibe lai hi: Kamsang Isaiah tungtawnin na pu na pate uh’ kunga Hlagau Siengtho’ thugen khu a man ahi a,

²⁶‘Tam mite kungah pei-in gen in, note in na zah vangun na tel zo ngai sih ding uhi. Note in na et vangun na mucien ngai sih ding uhi.

²⁷Azieh pen tami mite lungsim a bol a, a bilte un khuo za thei loin, a mit a siing uhi. Tua hi sihle amate in a mit utawh cien mu-in, kei lamah amate hing kihei-in, keima in amate kadam sah ding hi,’ a ci hi.

²⁸Tua ciengin Gentile-te kungah tami Pasien’ hutdamna thu kipuoh zo hi; amate in a ngai ding uhi,” ci-in a gen hi.

²⁹Paul in tam thute a gen zaw ciengin Jew mite pei dawhin amate sungah kiselna nahpi tahin a om hi.[130]

³⁰Paul, kum ni sung vilvel ama le ama kisihin[131] om a, ama kunga a haw mi zosie hoitahin na lamdotin,

³¹a lie a dal om loin Pasien’ manggam le TOPA Jesu Khris’ thu hangtahin a hil hi.