Read Zou SAWLTAHTE 3 Bible Online

SAWLTAHTE 3 - Zou bible

SAWLTAHTE 3

¹Ni khat, nitah lam nai thum thunget hunin biehinnpi ah Peter le John-te a peito uhi.

²Tuale a pienpi khelbai khat na kipuo hi. Tua pa in biehinn kai mite tung panin sum a nget thei nadingin mite in Kotpi Hoi kici biehinn tunkot gei-ah nisielin ama a koi uhi.

³Biehinnpi sungah Peter le John a lut kuonun tua pa in mu a, ama gel kungah sum a ngen hi.

⁴John ma bangin Peter in zong tua pa encien a, “Ko gel ei en vawi” a ci uhi.

⁵Tua pa in zong bang khat nga ding ci kinepna tawh ama gel a lim-et mama hi.

⁶Ahi vangin Peter in, “Ngun le kham ka nei poma sih hi, hizongle ka nei pen kang pie hi; Nazareth mi Jesu Khris’ min tawh ding inlen lam pei in,” a ci hi.

⁷Ama in tua pa a zietlam khut tawh manin a kaito leh thakhatin a keng le a sietmitte a khaupai lien hi.

⁸Ama kitomin dingto a, lam pei pai-in amate tawh biehinnpi sungah lut a, a lam pei kawmin dieng vazawhin Pasien min’ a phat hi.

⁹Mi zosie in ama lam pei-in Pasien a phat a mu vua,

¹⁰tuale ama pen biehinnpi’ Kotpi Hoi gei-ah to-in sum ngenngen pa ahi lam amate in a thei uhi; tuale ama tunga a pieng thute ziehin amate in lamdang sa-in a lungmang uhi.

¹¹Tua mipa in Peter le John a tuhdet laitahin mi zosie in lamdang a sa vua, amau’ opna Solomon Talap a kici innhlim lamah tai-in a kikhawm uhi.

¹²Peter in a mu ciengin mipite kungah, “No Israel-te aw, tam mipa lam ka peisah theina uh pen ka vang ule ka hoina uh zieh sa-in bang dingin ei cien-et na hi uh ahei?

¹³I pupite ahi Abraham, Isaac, le Jacob-te’ Pasien in a nasempa[10] Jesu a minthangsah zo hi. Tua pa pen Pilat in hla dingin a khensat vangin note in ama na niel vua, Pilat mai-ah tha dingin na pie ta uhi.

¹⁴Note in a Siengtho le Midih Pa na niel vua, mithat pa khat a hla nadingin na ngen zawsop uhi.

¹⁵Note in Hinna a piengsah pa na that vua, hizongle Pasien in misite lah panin ama a thosah hi. Tam thu-ah kote teci ka hi uhi.

¹⁶Ama’ min upna hang tawh tua ama’ min mama in na mu ule na thei uh ahi tua pa a thakhausah zo hi. Jesu[11] tung pana kinga upna in note zosie mai-ah dam siengthona ama a pie zo hi.

¹⁷“Tu-in lawmte[12] aw, na makaite un a na bawl bangin note in zong na thei lo ziehun na bawlkhah lam uh ka thei hi.

¹⁸Ama’ Messiah[13] in gimna thuoh ding hi, ci-in kamsangte zosie tung panin a na magensa thute Pasien in tam bangin a tangtungsah zo hi.

¹⁹Tua ahi ziehin na mawnate uh a kiphietmai thei nadingin kisiakia-in Pasien lamah kihei un.

²⁰Tuaci’n TOPA kung panin tha tha ngana hun ang tung ding a, ama in note dinga a kisekholsa Messiah[14] ahi Jesu ang sawl ding hi.

²¹Pasien in a kamsang mi siengthote tungtawnin a tangko bangin na zosie a kibawlthakia hun masangsie vantungah Jesu a op kul ding hi.

²²Moses in, ‘TOPA na Pasien un na mite[15] panin note adingin keima tawh kibang kamsang khat ang piengsah ding hi. Ama in na kung vua ang gen popo note in na man ding uh ahi hi.

²³Tua kamsangpa’ thugen a mang lo poma a mite lah panin kiphungkal ding hi,’ a ci hi.

²⁴Samuel a kipanin a nua-a ang pieng kamsang zosie in zong tuhun thupiengte a na genkhol tabo uhi.

²⁵Note pen kamsangte le Pasien in na pu na pate uh tunga a na pieh thuciemna’ suonlehlahte na hi vua, tuaci’n ama in Abraham kungah, ‘Na suon na hlahte sungah leitung innkuon zosie thupha kipie ding hi,’ a ci hi.

²⁶Pasien in a sila pa[16] a thawsah ciengin na gitlona zosie panun kihei-in thupha ang pieh thei nadingin na kung vuah ama ang sawl masah ahi hi,” ci-in a gen hi.