Read Zou SAWLTAHTE 4 Bible Online

SAWLTAHTE 4 - Zou bible

SAWLTAHTE 4

¹Mipite tungah Peter le John in thu a gen laitahun ama gel kungah siempute, biehinn uhpa, le Sadducees-te a pei uhi.

²Ama gel in Jesu sungah misite thawkiana om hi, ci-in a gen zieh gelin nawngkai a sa mama uhi.

³Tuaci’n amate in Peter le John a man vua, nitah lam hi ta ahi ziehin a zing cieng dong thong sungah a khum uhi.

⁴Ahi vangin thungaite lahah mi tampi in a um vua, thu um mi tul nga bang a pha uhi.

⁵A zing ciengin Jerusalem ah a gam-uhte uh, upate, le thukham hil siete a kikhawm uhi.

⁶Tua sungah siempu lien Annas, Caiaphas, John,[17] Alexander, le siempu liente’ innkuonpi zosie zong a om uhi.

⁷A laikim vuah thongkie tegel[18] dingsahin, “No gel in bang thuneina le bang min tawh tami na bawl uh ahei,’ ci-in a dong uhi.

⁸Tua ciengin Hlagau Siengtho tawh Peter kidimin amate kungah, “Gam uhte le upate aw,

⁹tuni-in cina pa khat tunga sil hoi ka bawl ziehun tam pa bangci banga a natna dam thei ahei, ci-in ei dong na hi uleh,

¹⁰note zosie le Israel-te zosie in kithei ta un. A dam sienga na mai vua ang ding tam mipa pen singlamte tunga na khailia uh, Pasien in misite lah pan a thawsahkia pa Nazareth mi Jesu Khris’ min zieha dam ahi hi.

¹¹Tami Jesu pen, ‘No innlamte in na nildawh uh suong, innkiu suong bulpi a suoh hi,’ kici pa ahi hi.

¹²Midang koima khat beh sungah hutdamna a om sih hi, azieh pen vansin nei-a a om mihingte lahah i kihutdamna nadinga kipie min dang khat zong a om sih hi,” a ci hi.

¹³Tu-in amate in Peter le John pen sinna nei vawt lo mi maimai hi lel napi uh, amau’ hangsanna a mu ciengun lamdang a sa mama vua, Jesu tawh kithuo ngaite ahi lam uh zong a phawh uhi.

¹⁴Ama tegel’ gei-ah damna nga pa dingin a om a mu ciengun amate in langpan nading thu bangma a gen thei ta sih uhi.

¹⁵Tuaci’n khatlekhat tam thu a kikup sungun biehna uliente kung panin a peikhiet nadingun thu a pie uhi.

¹⁶Amate in, “Tam mite bang law ding i hei? Bangzieh ahei cile amate tungtawnin a kilang mama lim khat a pieng zo hi, ci thu Jerusalem khuo-a tengte zosie in cientahin a thei ta vua, eite in zong tua thu i niel thei sih uhi.

¹⁷Ahi vangin mite lahah tam thute a kizelthang nawn lo nadingin, tulang kalsie koima kungah tami min tawh thu a gen nawn lo nadingun amate thu pie vai,” a ci uhi.

¹⁸Tuaci’n ama gel hlanin Jesu’ min tawh thu genin thu a hil nawn lo nadingun thu a pie uhi.

¹⁹Ahi vangin Peter le John in, “Note’ thu manzawh ding le Pasien’ thu manzawh ding, Pasien muna-ah koi manzaw ding ahei, ci noma ma in khensat un.

²⁰Bangzieh ahei cile kote in ka musa ule ka zahsa uh thute gen loin ka om thei sih uhi,” ci-in a dawng uhi.

²¹Amate in mipite ziehin ama gel dan pieh nading lampi a mu lo ziehun a galgih zaw ciengin a hlakia uhi. Bangzieh ahei cile a pieng thute ziehin amate in a unpi-un Pasien a phat uhi.

²²Azieh pen tami damna lim lamdang a kibawlna mipa pen a khan kum sawm li val pha zo hi.

²³Ama gel a kihla zaw ciengin a guolte kungah pei-in siempu uhpite le upate in ama gel kunga a gen uh thu zosie a zasah uhi.

²⁴Amate in tua thu a zah ciengun a aw uh sangsahin Pasien kungah thu a ngenton vua, “Vanpi le leipi, tuipi, le tua teng sunga a om sil bangkim a siem Thunei pen TOPA aw,

²⁵nang in na nasempa ka pu uh David tung panin Hlagau Siengtho tawh thu na gen a: ‘Bang dingin Gentile-te lungthahin, bang dingin mite in thu mawhnate ngaisun uh ahei?

²⁶TOPA le ama’ Messiah[19] do dingin leitung kumpite in panmun la-in, gam uhte kikhawm zo uhi,” na ci hi.

²⁷Azieh pen Herod le Pontius Pilat in Gentile-te le Israel-te tawh na sathau nusa pa, a siengtho na nasem[20] Jesu langpang dingin tam khuopi sungah amate a kikhawm uhi.

²⁸Nangma in na gelna bangin a pieng dinga na khut tawh na sekholsa popo amate in a sem ding uhi.

²⁹TOPA aw, tu-in amau’ ei galgihna ei theipi inlen, ko na nasemte[21] hangsan tahin thu ei gensah in.

³⁰Cinate dam nadingin na khut zah inlen, a siengtho na nasempa[22] Jesu’ minin lim le na lamdangte kibawl heh,” a ci uhi.

³¹Amate in thu a nget zaw ciengun a kikhopna mun uh a kiling hi; amate zong a unpi-un Hlagau Siengtho tawh kidimin Pasien’ thu hangsan tahin a gen uhi.

³²Tu-in thu um mite a lungsim le a ngaisutna uh a kikhat vua, tuaci’n koima in a a neisa khat popo kei-a’ tuom ci loin neisa zosie a neiton uhi.

³³Sawltahpite in vanglietna lienpi tawh TOPA Jesu’ thawkiana thu teci a pang vua, amate zosie tungah Pasien’ hepina lienpi a tung hi.

³⁴A neisa uh inn le lote zua-in a nga uh sumte a tawi ciet ziehun amate lahah a tasam koima a om sih hi.

³⁵Amate in sawltahpite keng zungah tua sumte koi-in a kisapna dung zui-in mi zosie a hawmpieh uhi.

³⁶Cyprus khuo-a pieng, Joseph kici Levi-te khat, sawltahpite in Barnabas (Hanthawn Siempa’ Tapa a cinopna) a ci uh mipa khat a om hi.

³⁷Ama in a neisa logam khat zua-in a sum teng peipi-in sawltahpite’ keng phungah a koi hi.