Read Zou SAWLTAHTE 5 Bible Online

SAWLTAHTE 5 - Zou bible

SAWLTAHTE 5

¹Ahi vangin Ananias kici pasal khat in a zi Sapphira’ thukimna tawh a neisa uh khat a zua hi.

²Ama in a zi’ thei-in sum kimkhat hendap a, halkhat beh peipi-in nuazuite’ keng phungah a lui hi.

³Peter in, “Ananias aw, Hlagau Siengtho sol ding le na logam zua man sum pawlkhat a hendap dingin Satan in bang dingin na lungsim kizosah na hei?

⁴Na zua masangin nangma-a’ hi a, na zua zaw ciengin zong nangma-a’ ma hi lo amah? Bang dinga tua banga gamtat ding hanciem na hei? Kote[23] ei sol na hi sih a, Pasien sol na hi hi,” a ci hi.

⁵Ananias in tam thu teng a zah behin puasuhin a si hi. Tam thu a za zosie zong a zau mama uhi.

⁶Tangvalte pei-in puon tawh a luong a tun vua, tua ciengin ama puo-in a vui uhi.

⁷Tua zaw nai thum bang ciengin a zi zong thupieng teng thei loin a lut hi.

⁸Peter in tua nu kungah, “Nang le na pasal in na logam uh tamza ma na khawh uh amah, ei gen in,” ci-in dong hi. Tua nu in, “Hi hi, tua za ma hi,” a ci hi.

⁹Tua ciengin Peter in ama kungah, “ TOPA’ Hlagau ze-et dingin bang dinga hici kithukim gel na hi uh ahei? En in, na pasal vuite kot lamah om hi, nang zong ang puokhie ding uhi,” a ci hi.

¹⁰Thakhatthu-in a keng phungah tua nu puasuhin a si pai hi. Tangvalte a lut ciengun a sisa-in ama a mu vua, tuaci’n amate in puodawhin a pasal gei-ah a vui uhi.

¹¹Hlattuom pawlpi buppi le tami thu a za zosie a zau mama uhi.

¹²Tu-in sawltahpite tungtawnin mite lahah lim le na lamdang tampi a pieng hi. Tuale Solomon’ Talap ah amate a omton uhi.

¹³Koima dang in amate a kipawlpi ngam sih vua, ahi vangin mite in amate a pimu mama uhi.

¹⁴Ahi vangin thu um mi numei le pasalte a tam semsem vua, nidang sangin TOPA sungah mi a kibelaplap hi.

¹⁵Tuaci’n Peter in tua mun nawhin a pei ciengin amate kimkhat tungah a hlim a tuh khah nadingin, lampi-ah cinate puo-in lupna tung le pheh tungah a siel uhi.

¹⁶Jerusalem kima a om khuote panin zong mi tampi kisutuo-in cinate le hlabua in a bawlsiet mite a peipi vua, a unpi-un damna a nga uhi.

¹⁷Tua ciengin siempu lien pa in na sep a sawm ta hi; ama le a kipawlpi zosie in (Sadducees pawlte a ci na) hazatna tawh a kidim ziehun,

¹⁸sawltahpite manin taangpi thong sungah a khum uhi.

¹⁹Ahi vangin zan lai-in TOPA’ vantungmi khat in thong kotte hongin amate a hladawh a,

²⁰“Pei-in biehinnpi sungah ding unlen, mite tungah hinna thu bucing va hil ta un,” a ci hi.

²¹Tam thu a zah ciengun khuova behin biehinnpi sungah lutin a thuhilna maban a zom uhi. Siempu lien pa le a pawlte a tun uh ciengin, amate in biehna uliente le Israel upa buppi kikhawmsahin amate hlakhie dingin thong sungah a sawl uhi.

²²Ahi vangin khumnah biehinncing palihte a tun ciengun thong sungah amate a mu sih uhi. Tua ahi ciengin a kilekia vua, amate in,

²³“Thonginn kot hoitahin kikilin kot mai-a ding thongcingte ka mu vua, ahi vangin kot ka hon ciengun a sungah koima ka mu sih uhi,” ci-in thu a zasah uhi.

²⁴Biehinnpi uhpa le siempu liente in tam thu bang ang suoh diei izaw! ci-in a lungmang uhi.

²⁵Tua ciengin mi khat ang tung a, “En un, thong sunga na khum uh mite in biehinnpi sungah dingin mite thu a hil uhi!” ci-in a kiko hi.

²⁶Tua ciengin biehinnpi uhpa le palihte in amate bangma bawlsie loin a zawpi uhi, azieh pen mite in amate suong tawh a se khah ding a zau uhi.

²⁷Amate a tunpi zaw ciengun biehna uliente mai-ah a dingsah uhi. Siempu lien pa in amate thu dong a,

²⁸“Tam pa’ min tawh thu na hil nawn lo nadingun khautahin thu kang pieh hi napi na thuhilna un Jerusalem khuo sung teng na dim zo ta vua, ko tungah tam pa’ sisan ang tun nadingin zong na hanciem uhi,” a ci hi.

²⁹Ahi vangin Peter le nuazuite in, “Mihing’ thu sangin Pasien’ thu ka man uh kulzaw ding hi.

³⁰I pu i pate’ Pasien in singkhuom tunga na khailia pa uh Jesu a thokiasah zo hi.

³¹Pasien in Israel-te tungah kisiana le mawmaina a pieh nadingin a zietlamah Lamkai pa ding le Hundam pa dingin ama a tawisang zo hi.

³²Tam thu-ah kote teci ka hi vua, Pasien in a thu a mang mite tungah a pieh Hlagau Siengtho zong teci ahi hi,” ci-in a dawng hi.

³³Amate in tam thu a zah ciengun a lungthah mama vua, sawltahpite tha a sawm uhi.

³⁴Ahi vangin biehna uliente sung panin mi zosie in a zatah Gamaliel a kici thukham hil sie Pharisees-te khat ding to-in bakhat sung tua mite a pusuo nadingun thu a pie hi.

³⁵Tua ciengin ama in tua mite kungah, “Israel-te aw, note in tam mite tunga na bawl dingte uh pilvangin kidawm un.

³⁶Bangzieh ahei cile masang lai khatin kei zong mi khat ma ka hi hi, a kici Theudas ang khang a, mi zali bang in ama a pawlpi uhi; ahi vangin tua pa kithat a, tuale ama a zui zosie kithezahin a mangthai sieng uhi.

³⁷Ama’ nua, mi phaza a kisim hun sungin Galilee mi Judah ang khang leuleu a, ama in zong nuazui ding mi a nei hi; ama a si ciengin a nuazui zosie zong a kithezah uhi.

³⁸Tuaci’n tulaitah i thu tawh kisai-a kang gen nuom ah, amate pel-in hici opsah phot lel un; azieh pen tami gelna le sepna pen mihing pana ang kipan ahile ang kisie lel ding hi;

³⁹ahi vangin Pasien tung pana ang kipan ahile lah na zo sih ding vua, tami thu-ah Pasien tawh kido-in ang kimu zaw ding uhi!” a ci hi. Amate in tua pa thugen a sang thei vua,

⁴⁰inn sungah sawltahpite hlanin a satziel uhi. Tua ciengin Jesu’ min tawh thu a gen nawn lo nadingun amate thu a pieh zaw ciengun a hlakia uhi.

⁴¹Biehna uliente kung pan a peikhiet ciengun amate in ama’ min ziehin mindaina thuoh tah sa-in a lungdam mama uhi.

⁴²Nisimin biehinnpi sung le inn[24] sungah Jesu, Messiah[25] ahi hi, ci-in khawl loin thu hilin a tangko uhi.