Read Zou SAWLTAHTE 7 Bible Online

SAWLTAHTE 7 - Zou bible

SAWLTAHTE 7

¹Tua ciengin siempu lien pa in ama kungah, “Tam thu a man ma amah?” ci-in dong hi.

²Stephen in: “Sanggamte le pate aw, na ngai un. Haran khuo ah i pu uh Abraham a ten masang, Mesopotamia gama a op lai-in ama kungah vanglien Pasien na kilah a,

³‘Na gam na lei le na be na phungte nuasie inlen, nangma kang lah ding gamah pei in,’ na ci hi.

⁴Tua ciengin ama in Chaldea-te gam nuasie-in Haran khuo ah a teng hi. A pa a si zaw ciengin Pasien in tua panin tu-a na tenna uh gamah na lalsah hi.

⁵Ama in tua gamah a luo ding leitang kephangcie khat nangawn a na pie sih a, ta a nei sih vangin ama’ nua-a pieng a suon a hlahte tungah tua gam pieh dingin a na kamciem hi.

⁶Tua ciengin midang gam khatah a suon a hlahte pemta-in omin salin kiman ding a, amate in kum zali sung bawlsietna a thuoh ding uhi, ci-in Pasien in tam bangin a gen hi.

⁷‘Ahi vangin keima in amau’ na a semsah tua minam tungah thu ka khen ding hi,’ Pasien in ci a, ‘Tua zaw ciengin amate pusuohin tam munah keima ei bie ding uhi,’ a ci hi.

⁸Tua ciengin Pasien in ama teptan thuciemna a pie hi. Tuaci’n Abraham pen Isaac’ pa hi a, a suo zaw ni giet ni-in a tep a tanpieh hi. Isaac pen Jacob’ pa hi a, Jacob pen sawm le nite’ pienna pupi ahi hi.

⁹Pupite in Joseph a na haza vua, Egypt gamah a na zua uhi; hizongle Pasien in ama a oppi a,

¹⁰gentheina panin ama na hunkhie-in Egypt kumpi pa Pharaoh mai-ah a din ciengin pilna le maipha na ngasah ahi ziehin Egypt gam le ama’ inn sung vai zosie a uhsah hi.

¹¹Tua ciengin Egypt gam le Canaan gam sung teng zosie-ah kielpi le hahsatna lienpi tung a, i pu i pate in an neh ding a na mu zo sih uhi.

¹²Ahi vangin Jacob in Egypt gamah an om hi, ci a zah bepin tua munah a khatveina a haw dingin i pate a na sawl hi.

¹³A niveina a haw ciengun Joseph in a sanggamte kungah ama koi ahei, ci ama le ama na kigen a, tuaci’n Pharoah in Joseph’ innkuonpi teng na thei hi.

¹⁴Tua ciengin Joseph in mi sawlin ama kunga pei dingin a pa Jacob le a hieng a san teng zosie hlansah a, amate a unpi-un sawm sagi le nga a pha uhi;

¹⁵tuaci’n Egypt gamah Jacob peisuh a, i pu i pate ma bangin tua gamah ama zong a si hi.

¹⁶Shechem-ah a luong uh[29] kipuokia a, Abraham in Shechem khuomi Hamor’ tapate tung panin dangka tawh a na leisa hankhuh sungah ama kivui hi.

¹⁷Pasien in Abraham tunga a bawl a thuciemna a tun kuonin Egypt gamah ei mite pungin a tam tehteh vua,

¹⁸Egypt gamah Joseph thei lo kumpi dang khat a khan cieng dongin amate a pung a meng uhi.

¹⁹Ama in i minamte a ngien tawh bawl a, a tasente uh a si nadingin a paimang nadingun i pu i pate zawthaw bawlin a sawl hi.

²⁰Tua hun sungin Moses suoh a, ama pen Pasien mai-ah a meel hoi mama hi. A pa inn ah ama hla thum sung kikem hi.

²¹Ama a kipaimang ciengin Pharaoh’ tanu in a tapa dingin la a, ama in a tapa bang lienin bawlin a khansuo hi.

²²Tuaci’n Egypt pilna zosie Moses kihil a, thugenna le na sepna-ah mi thupi mama khat a suoh hi.

²³Kum sawmli a phah ciengin a sanggam Israel-te kunga haw ding a lungsim ah a kilo hi.

²⁴Egypt mi khat in a mipite khat a bawlsiet a mu ciengin phu la a, ama in a bawlsiet pa humin Egypt pa a that hi.

²⁵Pasien in ama tungtawnin amate a hunkhie ding ahi lamtah a tanaute in a thei ding sa a, ahi vangin amate in a thei sih uhi.

²⁶A zing ciengin amate lahah a kihau mi pawlkhat kungah pei-in lemtuo ding hanciem a, ‘Guoite aw, sanggam na hi bo uhi; bang dinga kihau na hi uh ahei?’ a va ci ta hi.

²⁷Ahi vangin a vengpa a bawlsie pa in Moses[30] thalsawn a, ‘Ko ei uh ding le thu ei khen dinga koi in nang ang se ahei?

²⁸Zani-a Egypt mipa na tha banga kei zong ei tha sawm na hi amah?’ na ci giap hi.

²⁹Tam thu a zah ciengin Moses taimangin Midian gamah pemta-in a va om ta a, khum gamah tapa ni a va nei ta hi.

³⁰“Kum sawmli a cin zaw ciengin Sinai Muol gamlah sawlbawh kawm meikuong sung panin vantungmi khat ama kungah a va kilah ta hi.

³¹Moses in tua a sil mu pen lamdang a sa mama hi; a en dingin ama in a va nai ta leh tua panin TOPA’ aw ging a:

³²‘Kei pen na pu na pate uh’ Pasien, Abraham, Isaac, le Jacob-te’ Pasien ka hi hi,’ a ci hi. Moses citun gawpin a en ngam sih hi.

³³Tua ciengin TOPA in ama kungah, ‘Na dinna mun leitang a siengtho ahi ziehin na kedap suo in.

³⁴Keima in Egypt gama ka mite kibawlsietna ka mu tahtah ta a, a tauna uh zong ka za zo ta a, amate hunkhie dingin keima kang kumsuh zo hi. Tu-in hing pei in, Egypt gamah nang kang sawl ding hi,’ a ci hi.

³⁵“Moses pen amate in, ‘Koi in ei uh ding le thukhen dinga nang ang se ahei? ci-a a niel pa uh ahi a, tu-in ahile Pasien in sawlbawh kawm ama tunga a kilah vantungmi tungtawnin a uh ding le a hunkhie dinga a sawl pa ahi hi.

³⁶Ama in Egypt gam, San tuipi le senel gam sungah kum sawmli sung lim le na lamdangte a bawl zaw ciengin amate a peipi hi.

³⁷‘Pasien in note adingin na mipite sung panin kei tawh a kibang kamsang khat ang piengsah ding hi,’ ci-a Israel-te kunga a gen pa khu tami Moses ahi hi.

³⁸Ama pen senel gam mihon kikhopna lah, Sinai Muol tunga ama a hopi vantungmi, le i pu i pate tawh a omton pa ahi hi. Eite tunga ei pieh ding thuphuonte a sangsawn pa zong a hi hi.

³⁹I pu i pate in ama’ thu a mang nuom sih uhi; tuale mahin ama na puse-in Egypt gamah kilekia nopna lungsim a nei vua,

⁴⁰Aaron kungah, ‘Ka lampi vuah kote ei pui dingin pasien-te ei bawlpieh in; azieh pen Egypt panin ei peipi tami Moses lah bang tuoh a ta ahei, ka thei zo ta sih uhi,’ a ci uhi.

⁴¹Tua hunin amate in bawngno lim khat bawl pai-in tua milim adingin kithoina silpieh a pie vua, amate in a khut vua a bawl uh a nasepte uh tungah a kipah mama uhi.

⁴²Ahi vangin Pasien in amate elngat a, a kamsangte laibu sungah a kigiel ma bangin vantung nate a bie dingin amate a pie ta hi: ‘Israel innkuonte aw, gamlahah kum sawmli sung, gante go-in na biehpiehnate uh kei tunga nei pieh uh ahi ngel ei mah?

⁴³Ahi sih hi; note in Moloch pasien’ puonbuh tawh, na pasien uh ahi Rephan aasi le na bieh ding vua na bawl uh milimte na puoton uhi. Tuaci’n Babylon galah note kang hemkhie ding hi,’ a ci hi.

⁴⁴I pu i pate in gamlahah teci panna puonbuh a nei vua, tua khu Pasien[31] in Moses kunga a na hilsa, a musa a lim banga kibawl ahi hi.

⁴⁵Pasien in i pu i pate mai-a a na naw dawh minamte’ leitang a suonmang ciengun, i pu i pate in Joshua tawh tua puonbuh na puo leuleu vua, tua munah David hun cieng dong a om hi.

⁴⁶David in Pasien’ maipha nga a, Jacob’ biehinn[32] opna mun khat a mu thei nadingin Pasien kungah thu ngen hi.

⁴⁷Ahi vangin ama adinga biehinn a lampieh pa pen Solomon ahi bo hi.

⁴⁸Ahi vangin mihingte’ khut[33] tawh a kibawl inn sungah Sangpen Pasien a teng sih hi. Kamsang pa in a gen bangin:

⁴⁹‘Vantung ka tona ahi a, leitung, ka keng ngahna ahi hi. Kei adingin bang inn lam ding na hi uh ahei? Ahi sihle ka khawl nading bang mun ahei? TOPA in ci hi.

⁵⁰Tamte zosie keima’ khutsuo vive hi lo amah?’ a ci hi.

⁵¹“No a lungkhau, na lungsim ule na bil vua tep kitan lo mite aw, na pu na pate uh’ gamtat bang lienin na gamta vua, Hlagau Siengtho na langpang ngitnget uhi.

⁵²Na pu na pate un a bawlsiet lo kamsang koi om ahei? Amate in Midih Pa pei nadinga thu magente a that vua, tu-in note pen tua pa a lehehte le a thatte na suoh ta uhi.

⁵³Note in vantung mite tung pana ang kipie thukham na nga vangun na zui tuom sih uhi,” a ci hi.

⁵⁴Tam thute a zah ciengun amate lungso-in Stephen a ha a gawisan uhi.

⁵⁵Ahi vangin Stephen pen Hlagau Siengtho tawh kidim a, ama in vantung a ento leh Pasien’ vanglietna le Pasien’ zietlama a ding Jesu a mu hi.

⁵⁶Ama in, “En un,” vantungte kihongin Pasien’ zietlamah mihing Tapa a ding ka mu hi!” a ci hi.

⁵⁷Hizongle amate in a bil uh humin awging tah tawh kiko-in ama lamah a honpi-un a tai uhi.

⁵⁸Tua ciengin khuo pulamah ama kaiphit gawpin suong tawh a sep uhi. Tecite in a puontungsilte uh Saul a kici tangval pa khat’ keng phungah a koi uhi.

⁵⁹Amate in suong tawh Stephen a se laitahun ama in thungen a, “TOPA Jesu aw, ka hla la ta’n,” a ci hi.

⁶⁰Tua ciengin khupdinin nahpi tahin kiko a, “TOPA AW, amate na mawsah sin,” a ci zaw ciengin a si[34] hi.