Read Zou SAWLTAHTE 8 Bible Online

SAWLTAHTE 8 - Zou bible

SAWLTAHTE 8

¹Tuale ama a kitha pen Saul in zong a thukimpi hi. Tua ni-in Jerusalem ah hlattuom pawlpi bawlsietna lienpi kipan a, sawltahpite simlo mi zosie, Judea gam le Samaria gam mun zosie-ah a kithethang uhi.

²Pasien’ thu-a kipumpieh mite in Stephen a vui vua, ama ziehin nahpi tahin a kap uhi.

³Hinanle inn khat zaw inn khatah Saul lutin hlattuom pawlpi susie a, numei le pasalte kaiphitin thong sungah a khum hi.

⁴Tu-in a kithethang mite mun khat pan mun khatah a vah kawikawi vua, Pasien’ thu a tangko uhi.

⁵Samaria khuopi khatah Philip peisuh a, amate kungah Messiah[35] thu a tangko hi.

⁶Mihonpi in Philip’ thugente za-in, a na lamdang bawlte a mu ciengun lungsim kikhatin a thu gente lawptahin a ngai uhi.

⁷Azieh pen dawivei mi tampite sung panin hlabua nei mite a awng vagua uhi; tuale amate zong pusuohin phalsi le khelbai mi tampi in damna a nga uhi.

⁸Tuaci’n tua khuopi sungah kipahna lienpi a om hi.

⁹Tuami khuo sungah Simon kici mi khat om a, ama in ni dangin mitphiel lahin, Samaria mite a na cizasah mama a, kei zong mi thupi khat ka hi hi, na kici hi.

¹⁰Amate in a neupen panin a golpen dongin a unpi-un a thugen lawptahin a ngai vua, “Tam pa khu Vanglienpa a kici Pasien’ vanglietna ahi hi,” a ci uhi.

¹¹Ama in a mitphiel tawh hun sauveipi sung amate lamdang sasah ahi ziehin amate in a thugen lawptahin a ngai uhi.

¹²Ahi vangin amate in Pasien’ manggam lungdamna thu le Jesu Khris’ min a tangko Philip a up uh ciengin a numei pasalin a ki-baptize uhi.

¹³Simon mama nangawn in zong a um hi. A ki-baptize zaw ciengin Philip kungah ama om den a, a pieng limte le na lamdang lienpite a mu ciengin lamdang a sa mama hi.

¹⁴Samaria-te in Pasien’ thu sang thei ta uhi, ci thu Jerusalem-a om sawltahpite in a zah ciengun amate kungah Peter le John a sawl uhi.

¹⁵Ama gel peisuhin Samaria-te in Hlagau Siengtho a nga nadingun thu a ngetpieh uhi.

¹⁶(azieh pen amate khat beh tungah Hlagau tung[36] nai lo hi. Amate ahile TOPA Jesu’ min beh tawh a ki-baptize zo pan ahi na bo uhi).

¹⁷Tua ciengin Peter le John[37] in amate tungah khut a nga vua, tuale amate in Hlagau Siengtho a nga uhi.

¹⁸Sawltahpite’ khut ngahna tawh Hlagau a kipieh lam Simon in a mu ciengin ama gel tungah sum lui-in,

¹⁹“Mi khatpo tunga khut ka ngah ciengin Hlagau Siengtho a nga thei nadingin tami vanglietna kei zong ei pie gel in,” a ci hi.

²⁰Ahi vangin Peter in ama kungah, “Sum tawh Pasien’ letsong nga sawm na hi ziehin na sum tawh mangthaiton in.

²¹Pasien mai-ah na lungtang dih lo ahi ziehin tami thu-ah na kihal thei sih a, tanh zong na nei sih hi.

²²Tua ahi ziehin tami na gitlona panin kisiakia inlen TOPA kungah thu ngen in. Ama in na lungsim sunga na ngaisutna ang maisah thei kha ding hi.

²³Bangzieh ahei cile sinkha bangin na lungsim zong kha a, gitlona in nang ang kanbawm lam ka mu hi,” a ci hi.

²⁴Simon in, “Na[38] thugen khat beh ka tunga ang tun lo nadingin TOPA kungah thu ei ngetpieh in,” a ci hi.

²⁵Tu-in Peter le John in teci pangin TOPA’ thu a gen zaw cieng gelin Jerusalem khuopi ah kilekia-in Samaria khuo tampite-ah lungdamna thu a tangko uhi.

²⁶Tua ciengin TOPA’ vantungmi khat in Philip kungah, “Tho inlen Jerusalem pan Gaza lam zotna leitaw lamah va pei ta’n,” a ci hi. (Tua khu senel gam lampi ahi hi.)

²⁷Tuaci’n ama zong tho-in a pei pai hi. Khumin Ethiopia kumpinu Candace’ khut nei-a vaihawm mangpa le kumpinu’ gou zosie a uh cilgesa Ethiopia mangpa khat a om hi. Pasien bie dingin Jerusalem khuo ah ama a pei hi.

²⁸A kilekia ciengin a sakol leeng tung tuong kawmin kamsang Isaiah’ laibu a sim hi.

²⁹Tua ciengin Hlagau in Philip kungah, “Pei inlen tami sakol leeng zui in,” a ci hi.

³⁰Tuaci’n Philip zong tua pa kungah tai phei a, kamsang Isaiah laibu a sim a za hi. Ama in, “Tua na laisim a thu na telsiem ei mah?” ci-in a dong hi.

³¹Ama in, “Ei hil a op sih leh bang ka ci thei ding ahei?” ci-in a dawng hi. Leeng tungah tua pa tuongin ama gei-a to dingin Philip a ciel hi.

³²Tua a lai siengtho mun sim khu tami ahi hi: “Tha dinga kipeipi tuu bangin ama kipeipi hi. A mul metpa mai-ah a ham lo tuuno bangin ama in a kam a kah sih hi.

³³Ama a kiniemkhieh ziehin ama tungah thutang kizang lo hi. Ama’ khanggui koi in sut thei ding ahei? Azieh pen leitung panin ama’ hinna kila zo hi,” a ci hi.

³⁴Cilgesa Ethiopia mangpa in Philip kungah, “Thu khat hing dong vang, tami kamsangpa ama le ama kigen amah, ahi sihle midang khat’ thu gen hizaw ahei?” ci-in a dong hi.

³⁵Tua ciengin Philip thugen kipan a, tua a lai siengtho simna mun panin ama kungah Jesu’ thu ahi lungdamna thu a tangko hi.

³⁶Lampi-ah amate a pei laitahun tui opna mun khatah a tung uhi. Cilgesa mangpa in, “En un, tanah tui a om hi! Ka ki-baptize ding bang in ei kham ahei?” a ci hi.

³⁷Tuale Philip in, “Na lungsim zosie tawh na up leh na ki-baptize thei hi,” a ci hi. Tuale ama in, “Jesu Khris pen Pasien’ Tapa ahi hi, ci-in ka um hi,” ci-in a dawng hi.[39]

³⁸Ama in a leeng khawlsah a, tui sungah Philip le cilgesa mangpa a nipi-in a kumsuh vua, Philip in ama a baptize hi.

³⁹Tui sung panin ama gel a kato ciengun TOPA’ Hlagau in Philip a lato hi; tua cilgesa mangpa in ama a mu nawn sih a, tuale ama’ lampi-ah lungdam tahin a pei ta hi.

⁴⁰Ahi vangin ama in Azotus khuo-ah Philip mukia a, ama in tua gam teng nawh a, Caesarea a tun dongin khuo zosie-ah lungdamna thu a tangko hi.