Read Zou ROME-TE 14 Bible Online

ROME-TE 14 - Zou bible

ROME-TE 14

¹Upna[48] lama zawngkhal mite na pawlbawl unlen, a ngaisutnate uh kinielpi sih un.

²Mi pawlkhat in an khat popo neh thei dingin a um vua, hinanle upna neu mite in ante lohing mete beh a ne uhi.

³A ne mite in a tang mite simmaw sih hinlen, a tang mite in zong a ne mite tungah thu khen sih heh; bangzieh ahei cile Pasien in amate zong sang veve hi.

⁴Midang khat’ nasemte tungah thu khen ding koi na hi vuoi? A pupa uh mai-ah amate kip thei-in zong pua thei uhi. Tuale TOPA in kipsah thei ahi ziehin amate a kip ding uhi.

⁵Mi pawlkhat in ni khat pen adang khat sangin a thupizaw-in a ngaisun uhi; adangte leuleu in ni zosie a kibangin a ngaisun uhi. Mi zosie in amau’ lungsim cietah kithei ciet ta uheh.

⁶Ni a tangte in TOPA zatahna tawh a tan uh ahi hi. An ne mite in zong Pasien tungah lungdam ko veve ahi ziehin TOPA zatahna ma tawh a ne ahi uhi; an tangte in zong TOPA zatahna tawh a tang ahi a, Pasien tungah lungdam a ko uhi.

⁷Eima dinga a hing mi koima i om sih a, eima dinga a si zong koima i om sih hi.

⁸I hin leh TOPA adinga hing i hi a, i si le zong TOPA ading ma-a si i hi uhi. Tua ahi ciengin i hing a, i si zongin TOPA-a’ ma i hi uhi.

⁹Bangzieh ahei cile Khris in a sisa mite le a hinglai mite’ TOPA ahi thei nadingin si-in a hingkia hi.

¹⁰Nang in bang dinga na sanggam pa tunga thu na khen ahei? Ahi sihle bang dinga na sanggam pa na simmaw ahei? Azieh pen eite zosie zong i unpi-un Pasien’ [49]thukhenna topha mai-ah a ding ciet ding i hi uhi.

¹¹Azieh pen Lai Siengtho sungah, “Kei ka hin ma bangin ka mai-ah mi zosie khupdinin, leii zosie in Pasien phat[50] ding uhi,” ci-in kigiel hi.

¹²Tua ahi ciengin eite khat ciet in Pasien kungah i kungtung ciet i kisut ding uhi.

¹³Tua ahi ziehin khatlekhat thu kikhen nawn loin, midang khat’[51] peina lampi-ah a pal thei ding le a khahtan thei dingte i koi ngai lo nadingin i lungsim uh khensat va vui.

¹⁴Keima in TOPA Jesu sungah a siengtho lo bangma om lo hi, ci thei-in ka kizo hi; ahi vangin a siengtho lo-a a ngaisun mi khatpo adingin tua pen a siengtho lo hi pai hi.

¹⁵Na nehna ziehun na sanggam pa’ lungsim na natsah uleh itna sungah a kalsuon na hi nawn sih uhi. Na an nehna ziehun Khris in a silaw mi khat’ siet nading piengsah sih un.

¹⁶Tuaci’n mite in na hoinate uh a sie lamin kigensah sih un.

¹⁷Bangzieh ahei cile Pasien’ manggam pen neh le dawn thute ahi sih a, Hlagau Siengtho sungah dihna, lungmuonna le kipahna hizaw hi.

¹⁸Tua banga Khris ading na a sem mi in Pasien mai-ah a sanhuoi suohin mite’ lungkimpi zong ahi hi.

¹⁹Tua ciengin kilem nading le khatlekhat kilapsang tuoh thei nading a piengsah thute delin hanciem vai.

²⁰An nehna ziehin Pasien’ nasepna susie sih un. A tahtahin na zosie siengtho a, hizongle na neh na tah ziehun midangte na puasah ule a khiel na hi uhi;

²¹na sanggamte a puasah[52] thei na khatpopo ahi, an nehna, zu nehnate bawl lo ding hoi hi.

²²Na nei upna pen nangma le Pasien kikal thu hisah in. Man a sah uh nate ziehin amau le amau a kimawpai lo mite pen mi hampha ahi uhi.

²³Ahi vangin a lungkaa mite in a neh ule zong upna tawh a neh lo ziehun mawsah thukhenna a thuoh ding uhi; bangzieh ahei cile upna[53] pana a pei lo poma mawna ahi hi.[54]