Read Zou ROME-TE 6 Bible Online

ROME-TE 6 - Zou bible

ROME-TE 6

¹Tua ahile bang i gen ding vuoi? Hepina a khan thei nadingin mawna bawlbawl ding i hi uh amah?

²Bawlbawl buong lo e! Mawna thu-a a sisa eite in bangci bangin tua mawna sungah hing thei lai ding i hi uh ahei?

³Khris Jesu sungah a ki-baptize sa eite zosie pen ama’ sina sungah zong a ki-baptize sa i hi lamtah thei lo na hi uh amah?

⁴Tua ahi ziehin sina-ah i ki-baptize ziehin ama tawh a kivuiton i hi vua, tuaci’n Pa’ vanglietna tawh misite lah panin Khris ang thawkia ma bangin eite zong hinna tha-ah i hin thei nading uh ahi hi.

⁵Azieh pen a sina sungah ama tawh pum khat i suo leh, a thawkiana sungah zong ama tawh pum khat i suoh tahtah ding hi.

⁶Eite in mawna pumpi kisusie-in mawna sungah sal tanga i op nawn lo nadingin Khris tawh singlamte tungah i milui uh kikhailia zo hi, ci thu i thei uhi.

⁷Bangzieh ahei cile a sisa mi khat popo pen mawna pana a suohta zo ahi ta hi.

⁸Ahi vangin Jesu tawh i siton zo uleh ama tawh zong i hington ding hi, ci thu i um uhi.

⁹Bangzieh ahei cile misite lah pana a thokia Khris pen si ngai nawn lo ding hi, ci thu i thei hi; sina in zong ama tungah thu a nei thei nawn sih ding hi.

¹⁰Ama’ thuoh sina pen mawna thu-ah a kimang den ding khatvei sina hi a, ahi vangin ama’ hinna pen Pasien adinga hing ahi hi.

¹¹Tuaci’n noma mama zong mawna lamah si-in Pasien lamah Jesu Khris ziehin a hinga na kingaisut ding uh ahi hi.

¹²Tua ahi ziehin a si thei na pumpi sung vuah na tahsa uh’ deina ang zuisah thei ahi mawna in thu neisah sih un.

¹³Na pumpi nate uh gitlona vanzah[13] dingin mawna-ah na pie nawn sih unlen, sina pan tho-in hinna a ngasa mite bangin dihna vanzah[14] dingin Pasien tungah na pumpi uh’ nate na piezaw un.

¹⁴Bangzieh ahei cile thukham nei-ah na om nawn sih vua, hepina nei-ah om zo ta na hi ziehun note tungah mawna in thu a nei nawn sih ding hi.

¹⁵Tua ahile bang himawh ahei? Thukham nei-ah om nawn loin hepina nei-ah om ta i hi ziehin eite in mawna i bawl nading vuoi mah? Bawl nawn buong lo e!

¹⁶Sila thumangte bangin mi khatpo kungah noma mama na kipieh uleh tua a thu na man pa uh’ sila na hi pai ta vua, sina ang tut mawna sila ahi a, dihna ang tut thumanna sila ahi zongin, khat zawzaw’ sila na hi lam thei lo na hi uh amah?

¹⁷Ahi vangin nidang lai-in mawna sila ahi ngai note in lungsim tahpi tawh na tung vua ang ki-apsa thuhilnate na man zo tah ziehun Pasien kungah nuom thu i tut uhi.

¹⁸Note pen mawna panin suohta-in dihna’ sila na hi ta uhi.

¹⁹Na tahsa hindan uh a zawngkhal ziehin mihing’ ham banga kang gen ahi hi. Bangzieh ahei cile nidang lai-in siengtho lona le gitlona a bawl semsem dingin na pumpi nate na pieh bang lien ma-un, tuaci’n tu-in a siengtho hinkhuo adingin dihtanna lamah sal bangin na pumpi nate na pie un.

²⁰Mawna’ sila na hi lai-un dihna tawh kisai thu-ah a suohta na hi uhi.

²¹Tua ahile tulai taha na zumpi uh nate panin bang phattuomna nga na hi uh ahei? Tua nate’ tawpna lampi khu sina ahi hi.

²²Hizongle tu-in ahile mawna panin suohta-in Pasien’ sila na hi ta uhi. Note in na nga uh phattuomna in sienthona hi a, lam tawpna khu kumtawn hinna ahi hi.

²³Azieh pen mawna’ thaman in sina hi a, ahi vangin Pasien ei’ hlawnpieh letsong ahile TOPA Jesu Khris sunga a om kumtawn hinna ahi hi.