Read Zou 1 CORINTH 11 Bible Online

1 CORINTH 11 - Zou bible

1 CORINTH 11

¹Khris ka ette bangin kei ei ette un.

²Na vannuoi-ah kei ei phawhin note tunga kang piehsawn tang ngainate na zui ziehun kang pahta mama uhi.

³Ahi vangin mi zosie’ lutang pen Khris hi a, zi’ lutang[26] pen pasal[27] hi-in, Khris’ lutang pen Pasien ahi hi, ci thu note in na thei ding uh ka dei hi.

⁴A lutuom kawmin thu ngenin kam a sang pasal poma pen a lutang daisah ahi hi.

⁵Ahi vangin numei khatpo in lu tuom loin thu ngenin kam a san leh tua pen a lutang’ daisah ahi a, a sam kimettol numei tawh kibang ahi hi.

⁶Bangzieh ahei cile numei in a lu a tuom sih ding leh a sam a heu ding ahi hi. Sam heu ding ahi a, a met tol ding ahi zongin zumhuoi a sah leh a lu a tuom ding ahi hi.

⁷Azieh pen pasal pen Pasien’ lim le mel kilahna[28] ahi ziehin a lu a tuom ding a kilawm sih hi. Hinanle numei pen pasal’ mel kilahna[29] ahi hi.

⁸A tahtahin cilei numei panin pasal kipiengsah lo a, pasal pana numei kipieng sah ahi hi.

⁹Numei adinga pasal kipiengsah hi lo a, pasal adinga numei kipiengsah hizaw hi.

¹⁰Tami thu zieh le vantung mite ziehin numei in a lu tungah[30] thu a kineina lim[31] a nei dingin kilawm hi.

¹¹Bangbang hitale TOPA sungah pasal loin numei tuomdin zo lo a, pasal zong numei lo-in tuomdin zo tuon lo hi.

¹²Azieh pen pasal panin numei a pien ma bangin pasal zong numei sung pana pieng ahi hi.

¹³No le no thu kikhen un: Numei khat in a lu tuom loin Pasien kunga thu a nget ding a kilawm amah?

¹⁴Pasal in a sam a sausah leh zumhuoi hi, ci thu leitung pienzie mama in zong ang hil uh hi lo amah?

¹⁵Hinanlezong numei a sam a sau leh ama’ minthanna hi lo amah? Azieh pen ama’ sam sau pen a kituom nadinga kipie ahi hi.

¹⁶Hinanle tami thu a niel nuom a op khah leh eite in tua bang ngaina i nei sih vua, Pasien’ hlattuom pawlpite in zong a nei tuon sih uhi.

¹⁷Tu-in a nei-a kithuhilnate-ah note kang pahta sih hi. Bangzieh ahei cile na kikhop ciengun hoina hi loin sietna hizaw hi.

¹⁸Bangzieh ahei cile a masa penah hlattuom pawlpi khat banga na kikhop ciengun note lahah kikhennate om hi, ci ka za a, tua pen bangtan cieng ahiei khat man dingin ka um hi.

¹⁹A tahtahin note lahah kikhenna a om ding ma ahi hi, azieh pen tua bang cieng ma behin note lahah a tahtah teng ang kitel pan ding hi.

²⁰Na kikhop uh cienga na neh uh pen TOPA’ nitah an ne tahtah na hi sih uhi.

²¹Bangzieh ahei cile a hun a tun ciengin noma’ an ciet na kineh masah vua, pawlkhat gilkielin adang pawlkhat zukhamin a om uhi.

²²Tua khu bang bep ahei! Na neh na dawn nading uh inn nei lo na hi uh amah? Tua ahi sihle Pasien’ hlattuom pawlpi simmaw-in bangma nei lote a zumsisah nuom na hi uh amah? Note kungah bang hing gen leng kilawm ding ahei? Note kang pahta ding amah? Tami thu-ah kang pahta vawt sih ding hi!

²³Bangzieh ahei cile TOPA tung pana ka nga, note tunga kang gensawn thu in, ama a kileheh ni zan-in TOPA Jesu in khomun la-in

²⁴lungdam a ko zaw ciengin phalsuo a, “Tami in note adinga[32] a kipie ka pumpi ahi hi. Kei nei phaw nadingun tam bangin na bawl un,” a ci hi.

²⁵Tua ma bangin nitah an a neh zaw ciengun hai la a, “Tami hai in ka sisan sunga thuciemna tha ahi hi. Tam banga na dawn sielun kei nei phaw nadingun na bawl un,” a ci hi.

²⁶Bangzieh ahei cile note in tami khomun ne-in hai na dawn sielun ama ang pei masangsie TOPA’ sina a tangkoko na hi uhi.

²⁷Tua ahi ziehin a kilawm lopi-in khomun ne-in TOPA’ hai a dawn poma TOPA’ pumpi le a sisan tungah a maw ahi hi.

²⁸No le no kisittel phot unlen, tua zaw cieng behin khomun ne-in hai dawn pan un.

²⁹Bangzieh ahei cile ama’ pumpi[33] telcien lopi-a a ne a dawn[34] poma in ama tungah thukhenna a tun nadinga a ne a dawn ahi hi.

³⁰Tua thu ziehin note lahah mi tampi zawngkhalin a dammaw vua, mi pawlkhat in a silaw uhi.

³¹Ahi vangin ei le ei thu i kikhen zo tah leh thukhenna i thuoh ta sih ding uhi.

³²Hinanle TOPA in thu ei khen ciengin leitung mite tawh mawsah thukhenna i thuoh lo nadinga eite thu ei kihil ahi hi.

³³Tua ahi ciengin sanggamte aw, TOPA’ nitah an ne dinga na kikhop ciengun khatlekhat na kingah bo un.

³⁴Tua banga na kikhop uh ciengin mawsah thukhenna na thuoh lo nadingun, na gil uh a kiel leh na inn vuah an ne masa un. Keima kang tun ciengin thudangdang teng kang hil ding hi.