Read Zou 1 CORINTH 14 Bible Online

1 CORINTH 14 - Zou bible

1 CORINTH 14

¹Itna del unlen, hlagau letsongte lunggul un, adiehin kamsang a thugenna lunggul pen un.

²Bangzieh ahei cile kamsang a thugente in mihingte kunga thugen hi loin Pasien kunga thugen ahi zaw uhi; azieh pen amate in hlagau sungah thuthuhpite a gen ziehun koima in amau’ thugen a theithei sih hi.

³Ahi vangin kamsang thu hilte pen midangte’ kilam nading, a kihanthot nading le a kihenep nading vua thugen ahi uhi.

⁴Kamtuom tawh a hamte in amau le amau kikipsah ahi a, ahi vangin kamsang a thu hilte in hlattuom pawlpi a kipsah hi.

⁵Tu-in na unpi-un kamtuom tawh na ham ding uh ka dei a, hinanle kamsang a thu na hil ding uh ka deizaw pehpeh hi. Hlattuom pawlpi a kilam nadingin mi khat in kamtuom a thuhil pa’ thugen a phenpieh sih leh ama sangin kamsang a thuhil pa a thupizaw ahi hi.

⁶Tu-in sanggamte aw, na kung vua kang haw ciengin kamtuom tawh thu hing genin, kilahna ahi a, theina ahi zongin, kamsanna ahi a, thuhilnate ahi zongin kimkhat hing gen sih mawh leng bangci bangin note hing phatuomsah ding ka hei?

⁷Hinna a nei lo tum thei vante ahi theile, harp lasahnate zong tua bang ma ahi uhi. A aw cientahin hing ging sih mawh leh bang awkaih tawh kitum ahei, ci pen koi-in theithei ding ahei?

⁸Pengkul zong kicientahin ging sih leh galsim dingin koi kithawi thei ding ahei?

⁹Note zong tua bang ma na hi uhi; note in a kithei lo ham tawh thugen locin na thugen uh koi in bangci theithei ding ahei? Bangzieh ahei cile hui lahah thugen na hi lel ding uhi.

¹⁰Leitungah kamham nam tuomtuom tampi om tahpi a, a khietna nei lo khat beh a om sih hi.

¹¹Tua ahi ciengin kamham a khietna ka thei sih leh thugen pa adingin kei pen gamdang mi ka suoh a, thugen pa zong kei adingin gamdang mi a suoh hi.

¹²Note zong tua ma bang na hi uhi; note in Hlagau letsongte lunggulin na nei tah ngalun hlattuom pawlpi a kilamkip nadingin a thupizawte nei ding na hanciem un.

¹³Tua ahi ziehin kamtuom tawh thu gen mi in a khietna a gen thei nadingin thu ngen heh.

¹⁴Bangzieh ahei cile kamtuom tawh thu ngen leng ka hlagau tawh thu ngen ka hi vangin ka lungsim in phattuomna a nga sih hi.

¹⁵Tua ahile bang ka law ta diei? Keima in hlagau tawh thu ka ngen ding a, ahi vangin lungsim tawh zong thu ka ngen ding hi; keima in hlagau tawh la ka sa ding a, ahi vangin lungsim tawh zong la ka sa ding hi.

¹⁶Tua bang ahi sihle na hlagau tawh lungdam na ko ciengin pulam mi khatpo in na lungdam kona-a na thugente a thei lo ziehin bangci bangin “Amen’ ci thei ding ahei?

¹⁷Nang na hile hoitaha lungdam a ko na hi kha ding a, ahi vangin tua in midangte a kipsah sih hi.

¹⁸Keima in note zosie sangin kamtuom tawh thu gen theizaw ka hi ziehin Pasien tungah ka lungdam hi.

¹⁹Hizongle hlattuom pawlpi sungah midangte thuhil nadingin kamtuom teng tul sawm ka ham sangin a kithei kamteng nga ka gen nuomzaw hi.

²⁰Sanggamte aw, na thu ngaisutna vuah naupang bang sih un; gitlona lamah ahi thei tanin nausen bang unlen, ahi vangin thu ngaisutna lamah khanghamte bang un.

²¹Thukham laibu sungah, “A lamdang mite’ ham le gamdang mite’ ham tawh tam mite tungah thu ka gen ding a, tua cieng nangawnin zong amate in ka thugente a ngai sih ding uhi,” ci-in kigiel hi, TOPA in a ci hi.

²²Tua ciengin kamtuomte pen thu um mite adingin lim hi loin thu um lo mite ading hizaw hi. Tua ma bangin kamsang a thuhilna zong thu um lo mite ading hi loin thu um mite ading hizaw hi.

²³Tua ahi ziehin hlattuom pawlpi buppi kikhawmin kamtuomte tawh ham cietin, a pulam mite ahi sihle thu um lo mite hing lut uleh mimaw lomtang hi bo, ang ci sih ding uh amah?

²⁴Tua ahi ziehin note in na unpi-un kamsang a thu na hil laitahun thu um lo mi khat ahi a, pulam mi khat ahi zongin hing lut leh mi zosie in tua pa a mawsah ding vua, mi zosie in ama’ khielna a kiphawhsah ding uhi.

²⁵Thu um lo mipa’ lungtang sunga a thusimte kipholah zaw ciengin, Pasien mai-ah tua pa kunin bie-in, “Note lahah Pasien om tahtah hi,” ci ding hi.

²⁶Tua ahi ciengin ka lawmte[37] aw, bang bawl ding i hei? Note na kikhop ciengun biehna la khat ahiei, hil ding khat ahiei, kilahna khat ahiei, kamtuom khat ahiei, a khietna genna khat ahiei, khat ta na nei ciet uhi. Sil bangkim kilamkip nadingin na zang un.

²⁷Mi khatpo in kamtuom tawh thu a gen leh mi ni ahi sihle a tam pen mi thum in khat zaw khat a banbanin gen beh hinlen khat in kamphen taheh.

²⁸Kamphen ding koima a op sih leh kikhopna sungah kamtuom tawh a gen dingte sip dide uh hinlen, amau le amau Pasien tawh kiho ta uheh.

²⁹Kamsang ni ahi sihle thum bang in thu gen hinlen, adang teng in a kigente khinkhai uheh.

³⁰A gei-a to midang khat tungah Pasien kilahna a tun leh thugen masa pa sip phot heh.

³¹Bangzieh ahei cile mi zosie in thu a thei nading ule a kihanthawn thei nadingun na unpi-un khat zaw khat a banbanin kamsangin thu na hil thei uhi.

³²Kamsangte’ hlate kamsangte’ uhna nei-ah a om uhi.

³³Bangzieh ahei cile Pasien pen buoina Pasien hi loin kilemna Pasien hizaw hi. (Misiengte’ hlattuom pawlpi zosie-ah a kizah dan bangin,

³⁴biehinn sungah numeite sip dide uheh. Bangzieh ahei cile amate a thu gen ding uh a kiphal sih a, thukham in zong a gen ma bangin amate pen uhna nei-a om ding hizaw uhi.

³⁵Amate in thei nop khatpo a nei uleh inn ah a pasal ciet uh dong ta uheh. Azieh pen hlattuom pawlpi sungah numei khat in thu a gen ding a zumhuoi ahi hi.[38]

³⁶Ahi sihle no tung pana Pasien’ thu hing kipan amah? Ahi sihle Pasien’ thu tunna no beh na hi uh amah?

³⁷Mi khatpo, kamsang ahi sihle hlagau vanglietna nei bang khata a kingaisut leh ama in na kung vua kang gielte TOPA’ thupiehin sang taheh.

³⁸Mi khatpo in tam thute a thudon sih leh ama zong thudon da pai un.

³⁹Tuaci’n ka lawmte[39] aw, note in kamsang a thuhil ding lunggul penin na nei unlen, kamtuom tawh thugen zong na kham sam sih un.

⁴⁰Ahi vangin sil bangkim a kilawm a kituoha bawl ding ahi hi.