Read Zou 1 CORINTH 15 Bible Online

1 CORINTH 15 - Zou bible

1 CORINTH 15

¹Tu-in sanggamte aw, note kunga kang gen, note in zong na sansa ule kiptaha na dinpisa uh lungdamna thute na phawkia ding uh ka dei hi.

²Keima in na kung vua kang gen thute note in hoitaha na tuhkip nah uleh lungdamna thu tungtawnin gupna nga na hi vua, tua ahi sihle na upna uh a mawhna ahi hi.

³Bangzieh ahei cile a thupi masa penin keima in ka sansa kang hopsawn thu in tami ahi hi: Lai Siengtho in a gen ma bangin eite’ mawna tangin Khris in sina thuoh a,

⁴ama kivui-in Lai Siengtho in a gen bangin a ni thum ni-in thokia a,

⁵Peter tungah kilahin tua ciengin sawm le nite kungah kilah hi.

⁶Tua ciengin sanggam za nga sanga a tamzawte tungah thakhatin kilah a, tuate lahah pawlkhat a si[40] zo tah vangun a tamzaw in ei hinpi lai uhi.

⁷Tua ciengin James kungah ama kilah a, tua ciengin sawltahpite zosie kungah zong kilah hi.

⁸A nukhia penin a hun cing lopi-a a suoh nausen tawh a kibang keima kungah ang kilah hi.

⁹Bangzieh ahei cile kei pen sawltahpite lahah a gina lo pen ka hi a, Pasien’ hlattuom pawlpi ka bawlsiet ziehin sawltahpi ci dingin zong a kilawm ka hi sih hi.

¹⁰Ahi vangin Pasien’ hepina ziehin kei pen ka hi bang ka hi a, ama in kei tunga ei pieh a hepina pen a mawhna suoh lo hi. Tuale mahin amate khatpo sangin zong nasep ka hakat zaw a, - tua khu kei sep hi sih nanle - keima ei ompi Pasien’ hepina in a sep ahi hi.

¹¹Tua ahile keima ka hi a, amate ahi zongin tua bangin thu ka hil vua, note in zong tua bang ma-in na um uhi.

¹²Tu-in sina panin Khris thokia zo hi, ci-in kihil zo ahile no pawlkhat in bangci dan a misite’ thawkiana om lo hi, ci thei na hi uh ahei?

¹³Misite thawkiana om lo hi leh Khris zong a kithosah lo hi ding hi;

¹⁴Khris a kithosah lo khat hi poma leh ka thugenna uh a mawhna suoh ding a, na upna uzong a mawhna ma suoh ding hi.

¹⁵Misite thokia lo hi, ci thu a man tahpi leh Pasien in Khris zong a thosah lo ahi hi. Pasien in sina panin Khris thosahkia zo hi, ci-in teci ka pan ziehun kote nangawn zong Pasien thu’ a man lopi-a genin ei kimu ding hi.

¹⁶Bangzieh ahei cile misite thokia lo hi leh Khris zong a thokia lo hi ding hi.

¹⁷Khris a thokia lo hi leh na upna uh a thawn hi ding a, na mawna sung vua omlai na hi ding uhi.

¹⁸Tua ciengin Khris sunga a sisa[41] mite zong a mangthai sieng ahi ta uhi.

¹⁹Khris sungah tami hinkhuo ading beha lametna nei i hi uleh mi zosie lahah a hepihuoi pen i hi ding uhi.

²⁰Hinanle sina panin Khris thokia tahtah zo a, a sisa[42] mite lah panin ga masa pen ahi ta hi.

²¹Azieh pen mi khat ziehin sina a tun ma bangin mi khat tungtawn ma-in misite thawkiana a tung hi.

²²Bangzieh ahei cile Adam sungah mi zosie a si bangin Khris sungah mi zosie kihingsah ding hi.

²³Hizongle a hun ciet uh zui-in hi ding hi: Khris ahile ga masa pen hi a, ama ang peikia ciengin Khris-a’ teng a hingkia ding uhi.

²⁴Tua zaw ciengin tawpna[43] hun ang tung ding a, ama in vaihawmte zosie, thuneite zosie, le vanglietna zosie a suhsiet zaw ciengin Pa Pasien kungah kumpi gam a ap ding hi.

²⁵Bangzieh ahei cile ama in a galte zosie a keng nei-ah a koi masangsie vai a hawm ding hi.

²⁶A kisusie ding gal nukhia pen sina ahi hi.

²⁷Azieh pen, “Pasien in ama’ keng nei-ah sil bangkim koi zo hi,” kici hi. Hinanle, “Ama’ keng nei-ah sil bangkim kikoi zo hi,” a ci ciengin Khris’ nei-ah sil bangkim a koi Pasien a huom khah lo lam kitel hi.

²⁸Khris’ khut nei-ah sil bangkim a kikoi ciengin Pasien pen sil bangkim ah sil bangkim ahi thei nadingin a khut nei-a sil bangkim a koi Pasien’ khut nei-ah Tapa mama zong a om ding hi.

²⁹Tua hi sih mawh leh misite tanga ki-baptize mite in bang a bawl ta ding vuoi? Misite a thokia lo hi leh amate tangin bang dingin mite ki-baptize uh ahei?

³⁰Tuale bang dingin ko le ko a nai simin kizausah den uh ka hei?

³¹Sanggamte aw, note ziehin i TOPA Jesu Khris sungah ka kisahthei zakhat ma bangin nisimin sina a thuohthuoh ka hi hi!

³²Mihing lametna maimai tawh hi leh Ephesus khuo-a gamsate tawh ka kibawna bang phattuompi leltah ding ka hei? Misite kithosah lo hi leh, “Zing cienga si ding i hi tah ziehun kineh kidawn va vui,” i ci lel ding uhi.

³³Mi kisolsah sih un: “Kigoppi hoi lo in opdan hoite siesah hi.”

³⁴Hoitahin thu ngaisun pha unlen na maw nawn sih un; bangzieh ahei cile mi kimkhat in Pasien thu a thei sih uhi. Keima in na maizum nading vua kang gen ahi hi.

³⁵Ahi vangin mi pawlkhatte in, “Misite bangci danin ang thokia ding uh ahei? Bangci pumpi tawh ang tho ding uh ahei?” ci-in ang dong ding uhi.

³⁶Mimaw pa! Na khaici tu pen a si phot sih leh a hing thei sih hi.

³⁷Tua na tu khaici khu ang po ding pen ahi sih a, mangbu hile, adang khatpo hile a tang tahtah na tuzaw hi.

³⁸Ahi vangin ama’ teelsa bangin Pasien in a kung posah a, khaici namciet ah ama’ kung ciet a pie hi.

³⁹Sa zosie zong a kibangkim sih a, mihing sa, ganhing sa, va sa, nga sa, ci bangin a nam tuomtuom a om hi.

⁴⁰Van pumpite om a, lei pumpite zong a om hi, ahi vangin van pumpite’ thupina nam khat hi a, lei’ pumpite’ thupina a tuom khat ahi hi.

⁴¹Ni in thupina nam khat nei a, hlapi in thupina a tuom khat nei-in, aasite in zong a tuom khat ma nei uhi; a tahtahin ci leih aasi khat le khat zong a thupina kilamdang hi.

⁴²Misite thawkiana zong tua ma bang ahi hi. A kitu pen a sie thei hi a, a thokia pen a sie thei lo ahi hi.

⁴³A melsie-in kitu a, a mel hoi-in ang thokia hi. A thanemin kitu a, a vanglienin ang thokia hi.

⁴⁴Tahsa pumpi kitu a, hla pumpi-in ang thokia hi. Tahsa pumpi om ahile hla pumpi zong a om hi.

⁴⁵Tua ahi ciengin, “Mi masa Adam pen hinna a nei mi khat ang suoh hi,” ci-in kigiel hi; hizongle a nukhia Adam pen hinna a pie hlagau a suoh hi.

⁴⁶Ahi vangin hla pumpi om masa lo a, tahsa pumpi om masa-in tua ciengin hla pumpi a om ahi na bo hi.

⁴⁷Mi masapen pa leitung pan ahi a, leivui tawh kibawl mi ahi hi; a nina pa pen vantung pan[44] ahi hi.

⁴⁸Leivui-a kisiem mite pen leivui pana kisiem pa ma tawh kibang a, van mite pen vantung pana ang peipa ma tawh kibang hi.

⁴⁹Eite in leivui-a kibawl mihing mel i puoh ma bangin vanmi mel zong i puo ding uhi.

⁵⁰Sanggamte aw, na kung vua kang gennop pen tami thu ahi hi: Tahsa le sisan in Pasien’ manggam a luo thei sih a, a kisie theite in a kisie thei lote a luo thei sih hi.

⁵¹Ngai un, thuthuh khat kang gen ding hi! Eite zosie a si[45] sieng ding i hi sih vua,

⁵²pengkul nukhia pen ang gin ciengin mitphet kal bano khat sungin i unpi-un i kikhel sieng ding uhi. Azieh pen pengkul ang ging ding a, a sisa mite a sie thei nawn lo dingin ang tho ding a, eite i kikhel ding uhi.

⁵³Bangzieh ahei cile tami a sie thei pumpi in siet thei lona sil ta ding a, tami a si thei pumpi in zong si thei lona sil ta ding hi.

⁵⁴Tami a sie thei pumpi in siet thei lona silin, tami a si thei pumpi in si thei lona a sil ciengin, “Guol zawna sungah sina kival tum zo hi,”

⁵⁵“Sina aw, na gu hei-ah a om ta a, sina aw, na guolzawna hei-ah a om ta ahei?” ci-a a kigielsa thu ang tangtung ding hi.

⁵⁶Sina gu in mawna hi a, mawna’ vanglietna in thukham ahi hi.

⁵⁷Ahi vangin i TOPA Jesu Khris tungtawna guolzawna ei pie Pasien tungah lungdam i ko hi.

⁵⁸Tua ahi ziehin kang itte aw,[46] kiptahin dingin kilawh sih unlen, note in TOPA sunga na nasepna uh a mawhna a hi lo lam thei na hi ziehun TOPA’ nasepna ah a hoi thei penin ma na pang zing un.