Read Zou 1 CORINTH 5 Bible Online

1 CORINTH 5 - Zou bible

1 CORINTH 5

¹Note lahah lawkite lah nangawn a zong a om ngai lo numei-pasal pahtatna a om hi, ci-in ang kigen tahpi hi; azieh pen mi khat in a pa’ zi a kinunpi hi.

²Note kisahthei mawh uteh! Note lah panin tua banga a gamta mipa hemkhie ding na hi ziehun a da a kap ding na hizaw sih uh amah?

³Azieh pen tahsa tawh kang ompi lo vangin hlagau tawh kang ompi veve hi; tuale a omton za ma bangin keima in tua banga a gamta mipa tungah

⁴TOPA Jesu Khris’ minin thu ka khen zo ta hi. Na kikhop ton ciengun TOPA Jesu’ vanglietna tawh ka hlagau in note ang ompi hi.

⁵TOPA’[6] ni ang tun ciengin ama’ hlagau in hutdamna a nga thei nadingin Satan’ khut sungah suhsiet dingin tuami tahsa na pie ta un.

⁶Na kisahthei mawh pen uh a hoi sih hi. Tol themno khat in annel lompi zelin a pawmsah thei lamtah na thei sih uh amah?

⁷Note tol saw lo annel lom tha na hi tahpi bangun na hi suoh nadingun tol lui teng na hemsieng un. Azieh pen biehpiehna dingin eite’ peisan tuuno ahi Khris kigo zo hi.

⁸Tua ahi ziehin eite in kheltatna le gitlona tol luite tawh hi loin, lungsim siengthona le thuman thutah ahi tol kisaw lo anlum tawh pawi bawl zaw va vui.

⁹Numei-pasal pahtatte tawh na kigop lo nadingun kang laihlah sungah ka giel zo hi.

¹⁰Tua bang ka ci ciengin tami leitunga a pahtatte, a huoihamte le a gutate, ahi sihle milim a biete ka ci nopna hi lo hi. Tua bang hi mawh leh leitung pana na pusuo uh ngai ding hi.

¹¹Tu-in sanggam min puo sam napi a pahtat le a huoiham, milim a bie, mi a gensie, zukham, ahi sihle a guta khatpo tawh na kigop sih un, ci-a na kung vua lai ang giel ka hizaw hi. Tua bang mite tawh an nangawn na ne ton sih un.

¹²Azieh pen pulam mite tunga thu khen ding pen kei tawh bang kisai ahei? A sunga om mite tunga thukhen ding na hi sih uh amah?

¹³A pulam mite tungah Pasien in thu a khen ding hi. “Note lah panin tam migilo pa na notmang un,” na ci hi.