Read Zou 2 CORINTH 10 Bible Online

2 CORINTH 10 - Zou bible

2 CORINTH 10

¹Note tawh i kimaituo cienga a kiniemsah pa le i kigamlat cienga note tunga a hangsan pa keima Paul in Khris’ nunnemna le migitna tawh kang thum hi!

²Leitung mite dan tawh[20] a gamta-a ei ngaisunte tungah keima kang op ciengin hang taha ci ka sawm bangin ci a kul lo nadingin kang thum hi.

³Leitung mite[21] bangin ka ten vangun leitung mite’ zie[22] zui-in gal ka do sih uhi;

⁴bangzieh ahei cile kote’ zah galdona hiemte ahile mihingte’ galhiem maimaite ahi sih a, galte’ panmun phuolpite a susie zo Pasien’ vanglietna hizaw hi. Kote in kiselnate le

⁵Pasien’ thu theina ding a khahtan thei kiphatsahna vannuoi ka susie gawp vua, Khris’ thu a mang dingin ngaisutna vannuoi salin ka man uhi.

⁶Na thumanna uh a kicin ciengin thumang lo zosie dan pie dingin a kigingsa-in ka om uhi.

⁷Na maitang vua nate en un. Khris-a’ ka hi hi, ci-in na kimuon uleh note, Khris-a’ na hi ma bangun ko zong Khris-a’ ma ka hina thu uh phawh ta un.

⁸Tu-in note suhsiet nading hi lo, na kilam nadingun TOPA in ei pieh thuneina tawmkhat hing kinah sielpi phiel leng zong ka maizum sih ding hi.

⁹Ka laihlahte tawh ang zausah ka suo khah ding ka nuom sih hi.

¹⁰Bangzieh ahei cile amate in, “A laihlahte khau-in nasie mama napi eite tawh a opton tah ciengin thahat vawt loin, a thugente zong bangma ahi sih hi,” ei ci uhi.

¹¹Tua bang mite in kang op lo sung vua laihlah tawh ka gente uh kang op tah ciengun ang sem ding ka hi lam uh na kithei ta uheh.

¹²Kote ka hi ule amau le amau a kiphattawmte tawh a kisimton ahi sihle a kitekah ngam ka hi sih uhi. Ahi vangin amate khatlekhat a kitekah ciengun theisiemna a nei sih uhi.

¹³Hizongle a kalvalin ka kisiel sih ding vua, ahi vangin Pasien in kote adinga ei sesahsa za ahi note kung dong nangawn zong kang bat zawhna uh cieng behah ka kisiel ding uhi.

¹⁴Azieh pen na kung vua kang tun ciengun ka ciengtan uh vala a kalsuon ka hi sih uhi; kote ka hi ule note kungah Khris’ lungdamna thu tawh ang tung masa pente ka hi uhi.

¹⁵Midangte’ nasepnate-ah a kalvalin ka kisiel sih vua, hinanle kote lametna ahile na upna uh a khanna tawh kizui-in ka nasepna huong uzong na tangzaisah semsem ding uh ahi hi.

¹⁶Tua hile kote in midangte nasepna huong sunga kisemsate kisielpi loin na gam uh hlengin lungdamna thu ka tangko thei ding uhi.

¹⁷“A kisiel mi in TOPA sungah kisiel taheh”.

¹⁸Azieh pen ama le ama a kiphattawm mipa kisang lo a, ahi vangin TOPA in a phat mite kisang hi.