Read Zou 2 CORINTH 3 Bible Online

2 CORINTH 3 - Zou bible

2 CORINTH 3

¹Ko le ko a kiphatkia dinga kipan ka hi ta uh amah? A tahtahin mi kimkhatte in a bawl bangin note kungah ahi sihle note tung panin genphatna lai ka kisam uh amah?

²Note mama pen ka lungtang tung vua a kigiel, mi zosie in simin a thei kote’ lai na hi uhi.

³Note na hi ule kote ei kipuosah Khris’ lai na hi vua, laitui tawh kigiel ahi lo, a hing zing Pasien’ hlagau tawh a kigiel, suongpeh tunga kigiel ahi lo, mihing’ lungtang suongpeh tunga a kigiel Khris’ lai na hina na lah uhi.

⁴Khris tungtawnin kote in Pasien lamah tua bang kimuonna ka nei uhi.

⁵Na khat popo ko tung pana pieng hi a, ko le ko in ka sem zo uhi, a ci ka hi sih uhi; ka sep zawhna uh pen Pasien kung pan ahi zaw hi.

⁶Ama in thuciem tha nasem siemte ei suohsah zo a, tua pen lai-a kigiel thukham tawh hi loin Hlagau tawh hinna ei pie zo hi.

⁷Tu-in a muol thei ama’ maitang pana ang kikhaw a minthanna vang ziehin Israel mite in Mose’ maitang a etcien thei lo za a, sina a piengsah nasepna ahi suongpehte tunga kigielkuoh laimalte bawn minthanna tawh ang tung ahile,

⁸Hlagau nasepna khu bangza tahin minthanna tawh ang tungzaw kan lai ding ahei?

⁹Azieh pen mawsah thukhenna nasep bawn tua za-in minthang ahile, dih tanna nasepna khu nah minthan zaw kan lai ven izaw!

¹⁰A tahtahin a lienzaw minthanna om ta ahi ziehin nidanga a nei minthanna a nei nawn sih hi;

¹¹azieh pen a kipaimangte bawn minthanna tawh tung buong sam ahile tua a kip tawntungte minthanna tawh tung zawkan lai lo ding amah!

¹²Tua ciengin kote in tam bang lametna nei ka hi ziehun hangtaha a sem ka hi uhi.

¹³Kote ka hi ule ama’ minthanna vang a kipaimang lam Israel mite in a mu khah lo nadingun a maitang diel tawh a khu Moses bang ka hi sih uhi.

¹⁴Ahi vangin a lungsim uh a khau mama hi. Tuni dong ciengin amate in thuciem lui a kisim a zah ciengun tua a kikhuna diel pen ma om lai hi, azieh pen Khris sung behah tua diel kipaimang hi.

¹⁵A tahtahin tuni dongin Moses’ thukham laite a kisim sielin tua diel in amau’ lungsim a khu lai hi.

¹⁶Ahi vangin TOPA lamah mi khat a kihei ciengin a mai a khu diel kihawpieh hi.

¹⁷Tu-in ahile TOPA pen Hlagau ahi a, TOPA’ Hlagau opna munah suotahna a om hi.

¹⁸Eite in i unpi-un maitang kikhu loin limlang sunga ei lensawn bangin TOPA’ minthanna vang i mu vua, ama’ mel sun dingin minthanna khat panin minthanna khatah i kikhel uhi; bangzieh ahei cile tami pen Hlagau ahi TOPA kung pana ang pei ahi hi.