Read Zou 2 CORINTH 4 Bible Online

2 CORINTH 4 - Zou bible

2 CORINTH 4

¹Tua ahi ziehin kote in Pasien’ ei hepina tawh tami nasepna ka nei ziehun ka lungkie vawt sih uhi.

²Kote in a simtham le a zumhuoi nate ka tawpsan uhi; misol bawlnate zang loin Pasien’ thu zong ka deikai sih uhi; ahi vangin thuman thutah a langtangin ka pholah vua, Pasien’ mitmu-ah mi zosie’ kitheina lungsim tawh kituoh dingin ka gamta zaw uhi.

³Ka lungdamna thu hilte uh a kikhu leh a mangthaite tung beha kikhu ahi bo hi.

⁴Amate in Pasien’ lim ahi Khris’ minthanna zieha ang tang lungdamna khuovah a mu thei lo nadingun tami leitung pasien in a um lo mite’ lungsim mit a tawsah hi.

⁵Bangzieh ahei cile koma’ thu a gen ka hi sih vua, Jesu Khris in TOPA hi, ci thu le tua Jesu ziehin note’ sila ka hina uh ang gen ka hizaw uhi.

⁶Azieh pen, “Khuomiel lahah khuovah tang heh,” a ci Pasien in kote tungah Jesu Khris’ maitanga a tang Pasien’ minthanna theitheina khuovah ei pieh nadingin ama in kote’ lungsim sungah khuovah ang tangsah hi.

⁷Ahi vangin a lien mama tami vanglietna pen ko kung pana ang pei hi loin Pasien-a’ ahi hi, ci thu a kicien thei nadingin kote in leibeel sungah tami gougil ka nei uhi.

⁸Gimna tuomtuom ka thuoh vua, hinanle netcipin ka om sih uhi; lungmangin ka om vua, hinanle lungdongin ka om sih uhi;

⁹bawlsietna ka thuoh vua, hinanle taisanin ka om sih uhi; ei kisatpua a, hinanle ei kisusie lo hi;

¹⁰ka pumpi sung vuah Jesu’ hinna a kimu thei nadingin ka pumpi tung vuah Jesu’ sina ka puo zing uhi.

¹¹Bangzieh ahei cile a si thei ka pum tung vuah Khris’ hinna a kimu thei nadingin ka hin sungun Jesu ziehin sina a thuoh dinga a kipiekhie zing ka hi uhi.

¹²Tuaci’n sina in kote sungah nasem a, ahi vangin hinna in note sungah na sem hi.

¹³Hizongle, “Keima in ka um a, tuaci’n ka genkhie hi,” ci-a kigiel Lai Siengtho dung zui-in upna hlagau kibang ka nei ziehun kote in zong umin ka gen uhi.

¹⁴Bang ding ahei cile TOPA Jesu a thosah pa in kote zong Jesu tawh ei thosah kia-in, note tawh ama opna-ah ei tun ding hi, ci ka thei uhi.

¹⁵Hi hi, sil bangkim note khuolna ahi a, Pasien’ minthan nadingin mi tam semsemte tunga a tung tua hepina in lungdamkona a khansah thei nading ahi hi.

¹⁶Tuaci’n kote ka hi uleh ka lung uh a kie tuon sih hi. Ka pulam pienzie un muot lam ding a manaw vangin, ka sunglam pienzie uh a nini-in thasuo semsem hi.

¹⁷Bangzieh ahei cile a gentah lo bano khat sung ka thuoh uh tami gentheina in kote adingin tezawh lo a lien mama kumtawn minthanna ei bawlkhol pieh ahi hi.

¹⁸Azieh pen kote in a kimu thei nate mitsuon loin a kimu thei lo nate a mitsuon ka hi uhi; bangzieh ahei cile a kimu thei nate bakhat sung beh om ahi bo a, a kimu thei lo nate ahile kumtawnin a om hi.