Read Zou 2 CORINTH 5 Bible Online

2 CORINTH 5 - Zou bible

2 CORINTH 5

¹Azieh pen i tenna uh leisiet puonbuh a kisiet a ahile khut tawh a kibawl lo, Pasien in a bawlsa kumtawn inn khat vantungah i nei lamtah i thei uhi.

²Bangzieh ahei i cile vantunga i ten nading mun ei kisilsah ding kal ngahla-in tami puonbuh ah khuisa-in i tau vangut uhi.

³Eite in tuami i sil tahtah ciengin guohtanga om bangin ei kimu nawn sih ding hi.

⁴Azieh pen tami puonbuh sungah i op laitahin eite in vagih puo-in khuisa-in i tau vangut uhi, tua pen eite in puon i sil nuom lo zieh uh ahi sih a, puon ei kisebe ding i nop zieh ule hinna in a si thei pumpi a valtum ding i nop zieh uh hizaw hi.

⁵Tami thu ei na bawlkholpieh pa pen khamkholna van dinga Hlagau ei pie Pasien ahi hi.

⁶Tuaci’n eite i hi leh lungmuongtahin i om zing uhi; i pumpi sunga i op laisie TOPA tawh i kigamla hi, ci i thei uhi.

⁷Bangzieh ahei cile muna tawh hi loin upna tawh i kalsuon uhi.

⁸Hi hi, eite lungmuongtahin i om vua, pumpi tawh kigamla-in TOPA tawh opton ding i nuomzaw uhi.

⁹Tuaci’n eite in inn ah i om a, a gamla-ah i om zongin, ama lungdamsah ding tup penin i nei uhi.

¹⁰Bangzieh ahei cile Khris’ thukhenna topha mai-ah eite zosie i unpi-un i kilaa valon ding vua, tuaci’n i pumpi-a i bawlsa i gamtatna utawh kizui-in a sie ahi a, a pha ahi zongin a nga ciet ding i hi hi.

¹¹Tua ahi ziehin kote in TOPA zatah dan ding ka thei ziehun midangte zawl ding ka hakat uhi; ahi vangin Pasien in koma mama ei theitel a, note in zong a sie le a pha na theina lungsim sung vuah ei theitel dingin kang lamen uhi.

¹²Note mai-ah ko le ko a kiphattawm kia ka hi sih vua, a lungsim tawng uh ahi lo, a putham a kisahtheipi mite na dawnkia thei nading ule kote zieha na kisahthei nading uh hizaw hi.

¹³Azieh pen ka mot uleh Pasien ading hi a, ka pil ule zong note ading ahi hi.

¹⁴Bangzieh ahei cile mi zosie adingin mi khat si zo hi, ci thu thei ka hi ziehun tua Khris’ itna in kote ei thuzaw hi; tua ahi ziehin mi zosie a si uhi.

¹⁵Tuale ama pen mi zosie adinga ang si ahi a, tua ahi ziehin a hing tasunte zong amau’ adinga a hing hi nawn loin, amau’ adingin si-in a thokiasah pa adinga hing ahi zaw uhi.

¹⁶Tua ahi ziehin tu-a kipanin kote in mihing mudan[6] tawh koima ka mu nawn sih uhi; hun khat lai-in mihing mudan[7] tawh Khris ka na thei ngai vangun, tua bang danin ama ka thei nawn sih uhi.

¹⁷Tuaci’n mi khatpo Khris sunga a op leh a kisiemtha ahi ta hi: a lui nate zosie mangthai zo hi; en un sil bangkim a tha a suoh zo hi!

¹⁸Tami thu zosie pen Khris tungtawnin ama tawh kote ei kilemsahkia Pasien kung pan ahi hi; ama in kote tungah kilemkiana nasep ei pie zo hi.

¹⁹Tua pen a deina bang ahei cile Pasien in amau’ thupalsatnate ciemte loin, Khris sungah leitung mite le ama a kilemsahkia a, ama in tua kilemkiana thu a gen dinga kote ei ngansie ahi hi.[8]

²⁰Tuaci’n kote pen Khris adingin palaite ka hi uhi; Pasien tawh na kilem un, ci-in Pasien in kote tungtawnin ang thum ma bangin kote in zong Khris tangin kang thum uhi.

²¹Ama sungah Pasien’ dihna ka tan thei nadingun, mawna a thei lo pa pen kote tang dingin Pasien in mawnei mi a suohsah hi.