Read Zou 2 CORINTH 6 Bible Online

2 CORINTH 6 - Zou bible

2 CORINTH 6

¹Ama tawh na semton ka hi bangun Pasien’ hepina a mawhna-a a sang ka suo lo nadingun kang thum uhi.

²Azieh pen ama in, “San thei hunin na thu gen uh ka ngai a, hutdamna ni ciengin note kang hu hi,” a ci hi. En un, tulaitah pen san thei hun tah ahi hi; tulaitah pen hutdamna ni ahi hi!

³Ka nasep vuah khielna a kimu lo nadingin mi khatpo’ lampi-ah pua nading bangma ka koi sih uhi.

⁴Hizongle ko mama in Pasien’ nasemte ka hina uh sil bangkimah ka kilangsah uhi: thuohzawhna lienpite, genthei liengvainate, hahsatnate, vangsietnate,

⁵satnate, thongkiehnate, buoinate, na ham sepnate, zanlai-a kimutmaw law nate, le gilkielnate ahi a;

⁶siengthona, thu theina, lungduoina, migitna, lungsim siengthona, itna tahtah tawh,

⁷thuman thutah genna le Pasien’ vanglietnate a kipan, zietlam le veilam ading dihna galhiemte tawh,

⁸patawina le simmawna ahi zongin, gensietna le genphatnate dong ciengah ka langsah uhi. Kote pen mi thumante ka hi vangun zuouthu gente bangin ei kingaisun hi;

⁹mi zosie in ei theitel vangin koima’ thei lote ka bang uhi; nei thei bangun a hing ka hi vangun a si dihtahte bangin ei kingaisun hi; gawtna dan ka thuoh vangun thalupin ka om sih uhi;

¹⁰a date tawh ka kibah vangun ka lungdam zing uhi; a zawng ka bah mawh vangun mi tampi ka hausah uhi; bangma nei lo ka bah vangun na zosie ka nei uhi.

¹¹No Corinth mite kungah siengtahin kang gen zo vua, ka lungsim uh ka golhon uhi.

¹²Kote’ itna sungah ciengtan bangma a om sih a, noma’ sunga om hizaw hi.

¹³Kote-a’ bangin a kilawmin nei thuhkiana-un note in zong na lungsim uh golhon un, ci-in tate tunga thugen bangin kang gen hi.

¹⁴Thu um lo mite tawh a kituoh lo hahkol na puoton sih un. Azieh pen dihna le gitlona kikalah bang kipawlna om thei ding ahei? Ahi sihle khuovah le khuomiel kikalah bang kipawlna om thei ding ahei?

¹⁵Khris in Beliar tawh bang thukimna nei ahei? Ahi sihle thu um mi khat in thu um lo mi khat tawh bang neiton ahei?

¹⁶Pasien’ biehinnpi in milimte tawh bang kithukimna nei ahei? Bangzieh ahei cile eite[9] pen a hing zing Pasien’ biehinnpi i hi uhi. Pasien in, “Amate sungah tengin a lah vuah ka vah ding a, amau’ Pasien hi-in, amate keima’ mi ahi ding uhi.

¹⁷Tua ziehin amate kung panin hing peikhie unlen, amate lah panin a tuomin om un, TOPA in ci hi. A sieng lo poma tham kha sih un, tua hile keima in note kang sang ding hi.

¹⁸Keima na pa uh kang hi ding a, note zong keima’ tapate le tanute na hi ding uhi,” Vanglien TOPA in ci hi.