Read Zou 2 CORINTH 7 Bible Online

2 CORINTH 7 - Zou bible

2 CORINTH 7

¹Ka itte aw, eite in tam bang thuciemte i nei zo tah ngalin pumpi le hlagau buana zosie panin eima le eima kisiensuo-in Pasien zatahna lamah siengthona bukimsah vai.

²Na lungtang[10] sung vuah kote ading mun ei pie un; koima tungah ka khiel kha sih vua, koima khat zong siesah loin kote’ phattuom nadingin koima khat zong ka zang sih uhi.

³Note mawsah nopna tawh tami thu a gen ka hi sih hi, azieh pen i si leh sitonin i hin lezong a hington dingin ka lungsim sung vuah na om uhi, ci-in masang lai-in kang gen zo ta hi.

⁴Note tungtangah tamveipi ka kisathei hi; note tungah kisahtheina lienpi ka nei hi; henepna tawh ka kidim hi; ka thuoh uh gentheina zosie-ah genzawh loin ka lung a dam hi.

⁵Macedonia ka tun cieng nangawnun ka pumpi un khawl hun ci a nei sih a, ka kiheina zosie vuah gimna thuohin, a pulamah kihauna, le a sunglamah zaunate a om hi.

⁶Ahi vangin a lungkie mite a henem Pasien in Titus ang tunna tawh kote ei henem a,

⁷ama ang tunna hang beh hi loin, note in ama na henepna hang uh zong ahi hi. Note in kei nei lunggulna uh, na dana ule keima dinga nei deisahnate uh zong ei gen a, tuaci’n ka kipah semsem lai hi.

⁸Bangzieh ahei cile kang laihlahna tawh note kang dasah lezong ka kisiakia sih a, (kisiakia nanleng tua laihlah tawh kang dasahna uh pen bakhat sung beh hi lel hi, ci ka thei hi).

⁹Tu-in kei ka kipah hi; na da zieh vua kipah ka hi sih a, na dana un ang kisiakiasahna zieha kipah ka hizaw hi; bangzieh ahei cile banglam banglamah kote ziehin bangma suplaw loin Pasien’ deina tawh kituoha a da na hizaw uhi.

¹⁰Azieh pen Pasien’ deina tawh a kituoh dana in hutdamna ei tut thei kisiakiana piengsah a, da nading bangma a om sih hi, ahi vangin leitung dana in sina a piengsah hi.

¹¹Bangzieh ahei cile tami Pasien lama dana in note sungah bang citahna, no le no kisiensuo nadingin bang lawpna, bang lungthahna, bang patauna, bang lunggulna, bang pawnthawna, bang gawtnate piengsah ahei ci thu en un! Note in tami thu-ah bang mun bang munah na maw lo lam uh na kilangsah zo ta uhi.

¹²Tuaci’n keima in lai kang hlah vangin khielna bawl pa ahi sihle khielna thuoh pa zieha kang giel ahi sih a, note in Pasien mai-ah kote nei deisahna a kilah thei nadinga ang giel ka hizaw hi.

¹³Tami thu-ah ka lung uh a nuom mama hi. Kote lungmuonna beh hi loin note zosie zieha Titus in lungsim tawldamna nga ahi ziehin ama’ lungdamna ziehin ka lungdam deudeu hi.

¹⁴Bangzieh ahei cile note kang kisielpina thu pawlkhat ama kungah gen nanleng ka maizum tuon sih hi; hinanle a hi bangbanga note tunga kang gensa thu zosie a man ahi ma bangin, Titus tunga ka kipawhna uzong a man ahi hi.

¹⁵Note zosie in bangci bangin thumangin zauna le linna tawh ama na sanna lam uh a ngaisutkia ciengin note ang itna a khang semsem hi.

¹⁶Note tungah a bukim lungmuonna ka nei ziehin ka kipah mama hi.