Read Zou 2 CORINTH 8 Bible Online

2 CORINTH 8 - Zou bible

2 CORINTH 8

¹Sanggamte aw, note in Macedonia gam hlattuom pawlpite tunga kipie Pasien’ hepina thu na thei ding uh ka dei hi;

²azieh pen amate in gentheina lienpi a thuoh hun sungun zawng mama nan ule zong a lungdamna uh lien luo ahi ziehin amau’ lam panin piehkhietna lamsang a kiphal mama uhi.

³Bangzieh ahei cile amate in a nei za uh dung zui-in pieh nopna lungsim tawh a pie vua, a nei za uh sanga a tamzaw nangawnin zong a pie uhi, ci thu teci ka pang hi.

⁴Tam misiengthote adinga nasepna-ah amate kihalin hamphatna[11] a nga thei nadingun kote kungah ang thum ngetngut uhi.

⁵Tua khu kote’ lametna maimai bang ahi sih a, amate mama TOPA tungah kipie masa-in, tua zaw ciengin Pasien’ deina bangin amate in ko tunga ang kipiekhie uh ahi hi.

⁶Tuaci’n Titus in tam bang nasep a patsa ahi ma bangin, amate in note lahah tami phalna nasep[12] a sep suoh nadingun amate ka hanthawn uhi.

⁷Tu-in note in thu upna, thugenna, thu theina, nasep hakatna le nei itna vua kipanin midangte sangin bang kimah na tung tuon zawh ma bangun, tami phalna nasepna-ah[13] zong na tungtuong un.

⁸Thupieh dan banga ang gen ka hi sih a, midangte’ hakatna tawh sittelin na itna uh a tahtah amah ci thu ka theinopna hizaw hi.

⁹Azieh pen i TOPA Jesu Khris zong hau mama napi note ang khuolna ziehin ama’ zawnna tawh note mihau na suo thei nadingun, note ziehin ama mizawng hing suoh ahi ziehin note in kiphalna tawh ama’ nasepna na thei uhi.

¹⁰Tami thu-ah ka ngaisutna kang pie hi: Nuasie kumin bang khat sep ding a pan masa beh na hi sih vua, bang khat sep ding nangawn a lunggul note adingin tua bang na bawl ding uh a kilawm ahi hi.

¹¹Na neisa uh tawh kizui-in note in na hakatna ule na nasep man ding uh a kituo thei nadingin tu-in tami nasep zo sieng un.

¹²Bangzieh ahei cile thanopna a op nah po leh nei lona pansia loin neina tawh kizui-a kipie letsong pen a santah ahi hi.

¹³Mi dangte donghu dinga ang pau bawl hi loin,

¹⁴na kikal vuah na kihu diemdiem nading uh ka cinopna hizaw a, tulai taha na citheina un amau’ tasapna hu-in, amau’ citheina in zong note’ tasapna ang hukia ding ka deina ahi hi.

¹⁵“Tampi a khawmte-a’ val tuon loin them khat a khawmte-a’ zong cingla tuon lo hi,” ci-in kigiel hi.

¹⁶Ahi vangin Titus’ lungsim sungah kei nei banga thanopna lungsim a guon pa Pasien tungah nuomthu ka tut hi.

¹⁷Azieh pen ama in kote’ ngetna ei sang khop loin, nidang sangin a thanop zawh ziehin ama’ thu-a na kung vua ang haw sawm ahi hi.

¹⁸Lungdamna thu a genna zieha hlattuom pawlpi zosie-ah a kithang sanggampa khat ama tawh kang zawhsah hi.

¹⁹Tua beh hi loin, TOPA mama’[14] minthan nading le ka lungsim hoina uh a kilah nadingin, ama pen tami phalna nasepna[15] ka sep sungun ka khuolzinpi ding vua hlattuom pawlpite in a se pa zong ahi hi.

²⁰Phalna tawh a kipie tami letsongte ka zehna vuah koima in ei mawsah lo nadingin ka kidawm mama uhi.

²¹Bangzieh ahei cile TOPA muna behah a man gamtat sawm hi khop loin, mihingte muna-ah zong a man a gamtat sawm ka hi uhi.

²²Tua thu tamveipitah sittelin citah hi, ci-a ka mu sa uh i sanggam pa khat amate tawh kang zawhsah hi. Ama in note ang muon mama ziehin a lawp tasem hi.

²³Titus pen note ading nasepna-ah ka kithuopi le ka naseppi ahi hi; i sanggamte ahi ule Khris’ min a thangsah hlattuom pawlpite’ kamtaite[16] ahi uhi.

²⁴Tua ahi ziehin note’ itna le kote in note zieha ka kisielna uh a hang bang ahei ci hlattuom pawlpite mai-ah siengtahin na lah un.