Read Zou GALATIA-TE 3 Bible Online

GALATIA-TE 3 - Zou bible

GALATIA-TE 3

¹No Galati mimawte! Koi in ang bumlawm ta uh ahei? Singlamte tungah Jesu Khris a kikhailia bangin na mitmu-un kicientahin ang kilah zo hi!

²Note tung panin tami thukhat beh ka thei nuom hi: Thukham zuina hang tawh Hlagau nga na hi uh amah, ahi sihle na zah uh thu na upna zieh vua a nga na hizaw uh ahei?

³Tamza taha maw na hi talawm uh amah? Hlagau tawh na kipat zaw ciengun, tu-in cilesa tawh khup sawm na hi uh amah?

⁴tua za taha na gim thuohna uh a mawhna suoh ding a ta amah?

⁵Hoi hi, tuale thukham na zui ziehun Pasien in Hlagau hing pie-in note lahah nalamdang ang sep ahi amah, ahi sihle na zahte uh na upna zieh uh hizaw ahei?

⁶Tua ma bangin Abraham in, “Pasien um a, tua a upna pen dihna-in kisimpieh hi,”.

⁷Tuaci’n note in a um mite Abraham’ suonlehlahte hi, ci thei ta un.

⁸Pasien in upna tawh Gentile-te dih a tansah ding lam Lai Siengtho in na mukhol a, “Nangma sungah Gentile-te zosie thupha kipie ding hi,” ci-in Abraham tungah lungdamna thu na magen zo hi.

⁹Tami thu ziehin a um mite, Abraham tawh thupha kipieton hi.

¹⁰Azieh pen thukham zuina tunga a kinga mi zosie pen samsietna nei-a om ahi uhi; bang ding ahei cile, “Thukham laibu sunga kigiel thu zosie zui-in a mang lo mi zosie in samsietna a thuoh uhi,” ci-in kigiel hi.

¹¹Tu-in ahile thukham zuina tawh koima in Pasien mai-ah dih a tan zo lo lam kicien mama hi; azieh pen, “Midih pa upna tawh nungta ding hi,” kici hi.[10]

¹²Hizongle upna tungah thukham a kinga sih hi; tuale mahin, “Thukham a zui mi poma tuate ma tawh a nungta ding hi,” ci-in kigiel hi.

¹³Khris in thukham samsietna panin ei tankhie zo a, eite adingin a kisamsie pa ang suoh hi. Bangzieh ahei cile, “Singkhuom tunga kikhai mi zosie samsiet thuoh ahi hi,” ci-in kigiel hi.

¹⁴Tua pen Gentile-te kungah Khris Jesu sunga om Abraham’ thuphate a tun thei nading le upna tungtawnin eite in Hlagau’ kamciem i nga thei nading uh ahi hi.

¹⁵Sanggamte aw, nisim hinkhuo panin gentena khat kang gen ding hi: Mi khat’ thuciemna pen khatvei a kikipsah zaw ciengin koima in belap thei loin, zong phiet thei lo hi.

¹⁶Tu-in ahile Abraham le ama’ suonlehlah pa[11] tungah kamciemte kibawl zo hi. “Na suonlehlahte,”[12] ci-in mi tampi gen hi loin, mi khat beh ahi Khris gennopna-in, “Na suonlehlah pa,”[13] na cizaw hi.

¹⁷Ka gennop tami ahi hi: Tua kamciem a kiphiet thei nadingin tua zaw kum zali le sawm thum cienga a tung pan thukham in masang lai-a Pasien in a kipsahsa tua thuciemna pen a phiet thei malmal sih hi.

¹⁸Azieh pen thukham panin gouluoza ang pei hi mawh leh kamciemna zieh hi nawn lo ding hi; ahi vangin Pasien in kamciemna tungtawnin Abraham tungah tua gouluoza a pie hi.

¹⁹Tua ahile bang dinga thukham na kipie ahei? Ama tungah kamciem a kibawlna ama’ suonlehlah[14] pa ang tun masangsie, tua tawnkhielnate zieha kipiehbe ahi bo hi; tua thukham pen vantung mite tungtawnin palai khat tawh kikipsah ahi hi.

²⁰Tu-in ahile mi khat sanga a tamzaw munah palai kizang hi; ahi vangin Pasien khat beh ahi hi.

²¹Tua ahile thukham in Pasien’ kamciemte a langpan amah? A langpan vawt sih hi! Bangzieh ahei cile hinna a pie thei thukham na kipie ahile dihtansahna pen thukham tungtawna ang pei tahtah hi ta ding hi.

²²Hizongle Jesu Khris upna tungtawnin a um mite tungah tua a kikamciem pen a kipieh thei nadingin Lai Siengtho in mawna vanglietna nei-ah sil bangkim a khumcip hi.

²³Upna ang tun masang, upna thu ang kilah masang tengin thukham nei-ah eite ei kikhumcipin ei kicing hi.

²⁴Tua ahi ziehin upna tawh dih i tan thei nadingin Khris ang pei cieng dong, tua thukham pen eite ei cingpa a suoh hi.

²⁵Hinanle tu-in upna ang tun zo tah ziehin tua a cingpa’ khut nei-ah i om nawn sih uhi.

²⁶Azieh pen na unpi-un upna tungtawnin Khris Jesu sungah Pasien’ tate na hi ta uhi.

²⁷Bangzieh ahei cile Khris sungah a ki-baptize sa note zosie in Khris na sil uhi.

²⁸Judah mi le Greek mi ci om nawn lo a, sila le suohta mi, numei le pasal ci bang om nawn lo hi; azieh pen na unpi-un Khris Jesu sungah khat na hi ta uhi.

²⁹Note Khris-a’ na hi uleh Abraham’ suonlehlahte na hi ta vua, kamciemna bangin gouluote zong na hi ta uhi.