Read Zou GALATIA-TE 4 Bible Online

GALATIA-TE 4 - Zou bible

GALATIA-TE 4

¹Ka gennop tami ahi hi: Gouluo dingte pen neisa zosie a luo dingte hinanle naupang ahi laisie uh sila sangin a thupizaw kan sih uhi.

²Ahi vangin a pa sesa hun ciengtan a tun masangsie a cing le a kemte’ uhna nei-ah a om uhi.

³Eite zong tua bang ma i hi uhi; naupang i hi hun sungin leitung thungehte[15] khut nei-ah salin i om uhi.

⁴Ahi vangin hun bukim ang tun ciengin Pasien in numei pana a pieng thukham nei-a a suoh a Tapa ang sawl hi.

⁵Tua in thukham khut nei-a om mite ei tat nading le a tate banga tapa suona i nga thei nading ahi hi.

⁶Tapate na hi ziehun Pasien in eite’[16] lungtangah a tapa’ Hlagau ang sawl a, “Abba![17] Pa!” ci-in ei kikosah hi.

⁷Tuaci’n note na hi ule sila hi nawn loin tapa na hi ta vua, tapa na hi uleh gouluo pa zong na hi ta uhi.[18]

⁸Nidang Pasien na thei lo hun lai-un a pien limin Pasien ahi lote’ suoh le salin na om uhi.

⁹Hizongle tu-in Pasien na thei ta vua, Pasien in zong note ang thei ta hi, tua ahile bangci bangin a thanem le a gina lo ahi leitung thungehte[19] lam po-ah kihei-in khatvei salsuoh nuomkia na hi uh ahei?

¹⁰Note in ni thupite, hlate, khuohunte, le kumte na tang talawm uhi.

¹¹Note dinga ka nasep a mawhna a suo khah ding ka lunghimaw mama hi.

¹²Lawmte aw,[20] kang thum hi, note op banga kang op ma bangin note zong kei op bangin hing om vawi un. Note in kei tungah khielna na bawl sih uhi.

¹³Note tungah lungdamna thu kang gen masahna pen tahsa zawngkhalna zieh ahi lam na thei uhi.

¹⁴Ka omdan pen note adingin ze-etna a suo vangin ei muda-in nei simmaw tuon sih vua, Khris Jesu le Pasien’ vantungmi khat bangin nei limbawl zawsop uhi.

¹⁵Na ngasa uh lungnopna bang na law ta uh ahei? Azieh pen ahi thei hi leh na mittangte uh ladawhin nei pie nuom va-ia uhi, ci teci ka pang hi.

¹⁶Thuman thutah kang hilna ziehin tu-in na gal uh ka suoh ta amah?

¹⁷Amate in ang thupibawl mama vua, hinanle a ngimna uh a hoi sih hi; note in amate na thupisim nadingun ko kung pana ang khenkhie nuom uh ahi lel bo hi.

¹⁸Ngimna hoi ahi nah po leh note tawh ka op sung beh hi loin, hun zosie-ah kithupi sim ding pen a hoi ahi hi.

¹⁹Ka it taneute aw, note sungah Khris pienzie lim ang op masangsie note adingin nausuo takei natna thuoh bangin ka omkia hi.

²⁰Na tungtang thu vuah amkham gawp ka hi ziehin note tawh ang omtonin ka thugen zong ka khel nuom va-ia hi.

²¹No thukham nei-a a om nuomkia mite aw, ei gen vawi un, thukham in a gen thu bang ahei ci za lo na hi uh amah?

²²Bangzieh ahei cile Abraham in tapa ni nei-in, khat pen a sila numei tawh a nei hi a, adang khat pen a suohta numei tawh a nei ahi hi, ci-in kigiel hi.

²³Ahi vangin sila numei tawh a nei tapa pen cilesa ngaina banga pieng hi a, a suohta numei tawh a nei tapa pen kamciemna tungtawna pieng ahi hi.

²⁴Tu-in tami pen tekahna ahi hi: Tami numei ni tegel pen thuciemna nite ahi hi. Numei khat pen Sinai Muol pana ang pei Hagar hi a, ama in sila a suoh ding tate a nei hi.

²⁵Tu-in Hagar pen Arabia[21] gama Sinai Muol ahi a, tu hun Jerusalem tawh kibang hi, azieh pen a tate tawh ama salin a om hi.

²⁶Ahi vangin adang numei pen a tung lama om Jerusalem tawh kibang hi; ama pen suohta a, eite’ nu ahi hi.

²⁷Bangzieh ahei cile, “Ta nei lo-a a ciing numei aw, lungdamin kipah in. Nausuo gimna a thuoh ngai lo nu aw, awng inlen nahpi-in kiko in; bangzieh ahei cile pasal nei numei nu sangin a kinuasie numei nu in ta hauzaw hi,” ci-in kigiel hi.

²⁸Lawmte aw,[22] note[23] tu-in Isaac banga kamciemna’ tate na hi uhi.

²⁹Hizongle tua hun lai-in cilesa dan tawh a suoh pa in Hlagau dan tawh a suoh pa a na bawlsiet bangin tu-in zong tua bang ma-in a bawlsie hi.

³⁰Hinanle Lai Siengtho in bang a gen ei? “Sila numei le a tapa notdawh ta’n; azieh pen sila numei’ tapa in a suohta numei’ tapa tawh gou luoton thei lo ding hi,” na kici hi.

³¹Tua ahile lawmte aw,[24] eite pen sila numei’ tate i hi sih vua, suohta numei’ tate i hizaw uhi.