Read Zou GALATIA-TE 6 Bible Online

GALATIA-TE 6 - Zou bible

GALATIA-TE 6

¹Ka lawmte aw,[27] mi khatpo in khielna bawl hi, ci-a na thei uleh Hlagau a ngasa note in lungsim nunnem tawh tua mipa na phongkia ding uhi. Ze-etna na thuoh lo nadingun no le no kikem un.

²Khatlekhat vangih na kipuohpi un, tua hile tam bang dan tawh Khris’ thukham na tangtun ding uhi.

³Azieh pen bangma ahi lote a kithupi ngaisut uleh amau le amau kisol ahi uhi.

⁴Mi zosie in a vengte’ nasepna tawh ki-ette zaw loin amau’ nasepna ciet kisittel phot uheh; tua hile a kisielna uh ahang pen a nasepna uh ahi ding hi.

⁵Bangzieh ahei cile mi zosie in amau’ van ciet a puo ding uhi.

⁶Pasien’ thu a kihil mite in amau’ siepa tawh sil hoi bangkim a ngaton valon ding uhi.

⁷Mi kisolsah sih un; Pasien pen simmawbawl thei ahi sih hi, bangzieh ahei cile na vaw bangin na atkia ding hi.

⁸Cilesa ading khaici na vaw leh cilesa panin sietna na at ding hi; ahi vangin Hlagau adingin khaici na vaw leh Hlagau pan ma-in kumtawn hinna na at ding hi.

⁹Tua ahi ciengin na hoi sep ding cimtah sih vai, azieh pen lungkie lo-a i sep nah po leh a hun tun ciengin a ga i at ding hi.

¹⁰Tuaci’n hun lemtang i nei petun mi zosie adingin sil hoi bawlin, a deudeu-in upna lama innkuonpite tungah bawl vai.

¹¹Keima’ khut tawh kang giel laimal golpite en vawi vun!

¹²Cilesa lamah mihoi a hina uh a talang nuomte in Khris’ singlamte zieha bawlsietna a thuoh lo nadingun note teptan dinga ang paubawl uh ahi bo hi.

¹³Tep kitansa mite nangawn in thukham a zui tuon sih vua, ahi vangin na cilesa tung vuah amate ang kisiel nop ziehun tep ang tansah nuom uh ahi bo hi.

¹⁴Kei ka hi leh TOPA Jesu Khris’ singlamte simlo bang khatpo ka kisielpi ngai sih ding hi, tua singlamte ziehin keima tungah leitung kikhailia-in, keima zong leitungah ka kikhailia zo ta hi.

¹⁵Azieh pen teptanna le teptan lona pen a thupi hi loin, a thupi pen siemthana hizaw hi!

¹⁶Tami zui ding thu banga kalsuon sawmte tung le Pasien’ minam Israel-te tungah lungnopna le hepina om taheh.

¹⁷Tu-a kipanin koima in ei subuoi ta sih heh; azieh pen ka pumpi tungah Jesu’ melcina himapawn a om hi.

¹⁸Sanggamte aw, i TOPA Jesu Khris’ hepina in na hlagau utawh hing om taheh. Amen.