Read Zou EPHESUS-TE 1 Bible Online

EPHESUS-TE 1 - Zou bible

EPHESUS-TE 1

¹Pasien’ deina ziehin Khris Jesu’ sawltahpi Paul in, Ephesus khuo-a om misiengthote, Khris Jesu sunga mi muonhuoite tungah:

²I Pa Pasien le TOPA Jesu Khris tung pan hepina le kilemna om taheh.

³Khris sungah vantung munte sunga om hlagau thupha namcin tawh eite thupha ei pie, i TOPA Jesu Khris’ Pa Pasien in thupha nga ta hinlen,

⁴eite in ama mai-ah itna hang tawh siengtho-in paubanna i nei lo nadingin leitung pien masangin ama in Khris sungah ei teel zo hi.

⁵Ama’ hoisah le ama’ dei dan tawh kizui-in ama in Jesu Khris tungtawnin ama’ tate ahi dinga tapa za nga dingin ei na laitan kholsa ahi a,

⁶tua khu a Itpa sungah eite ei hlawnpieh ahi, a minthang ama’ hepina i patawi thei nading uh ahi hi.

⁷Eite in ama’ sisan tungtawnin ama sungah tatkhietna i nga vua, ama’ hepina zieha haunate tawh kizui-in i thupalsatnate uh tungah ngaidamna i nga vua,

⁸ama in pilna namcin le thuthuh theina tawh eite tungah a dimlet a ei pieh ahi hi.

⁹Ama in Khris sunga a koisa ama’ hoisah dan tawh kizui-in ama’ deina thuthuhpi zong ei theisah zo ta hi.

¹⁰Tua thuthuhpi i ci pen in, a hun a cin ciengin vantung le leitunga a om sil bangkim Khris sunga gawmtuo ding gelna ahi hi.

¹¹A ngaisutna le a deina tawh kituoha sil bangkim a muolsuo pa in ama’ ngimna tawh kituohin a laitansa bangin kote in zong Khris sungah gouluo za ka nga vua,

¹²Khris tungah lametna a koi masa kote a minthanna a patawi dinga ka nuntat thei nading uh ahi hi.

¹³Note in ang kihutdamna lungdamna thu ahi thuman thutah za-in ama na up zaw ciengun, nohaw zong ama sungah kamciemna tawh kipawl Hlagau Siengtho tawh ang kiciemtesa na hi ta uhi;

¹⁴tua khu ama’ minthanna patawi nadingin Pasien neisa mite’ tatkhietna dongin i luo ding ei khamkholna gou ahi hi.

¹⁵Keima in TOPA Jesu sunga na upna ule misiengthote zosie tunga na itna uh[1] ka na za zo ta a, tua thu ziehin

¹⁶ka thungetnate-ah hing phawh kawmin note adingin khawl hun nei loin lungdam ka ko den hi.

¹⁷Note in ama na thei ziehun i TOPA Jesu Khris Pasien, a minthang Pa in note lungpilna le kilahna ang pieh thei nading,

¹⁸na lungsim mitte uh vahsahin note ang hlatna tawh kipawl lametna, misiengthote lahah a minthang ama’ gouluo zieha haunate,

¹⁹le a lien ama’ vanglietna nasep thupite dung zui-in a um eite adingin tezawh ahi lo ama’ vanglietna lienpite bang ahei ci note in na thei nadingun thu kang ngetpieh hi.

²⁰Pasien in sina panin ama thosahin, vantung munte sunga ama’ zietlamah a tosah lai-in Khris sungah na sem dingin tami vanglietna guonpieh a,

²¹vaihawmna le thuneina, vanglietna le uhna vannuoite tungah hile, tu khanghun beh ah hi loin, ang tung ding khanghun ah zong hile a kiphuo min zosie tungah a tosah hi.

²²Pasien in ama’ keng nei-ah sil bangkim koi a, a hlattuom pawlpi adingin a lutangin ama a bawl zo hi.

²³Tua hlattuom pawlpi pen ama’ pumpi ahi a, bangkimah bangkim a kicingsah pa’ kicinna ahi hi.