Read Zou EPHESUS-TE 2 Bible Online

EPHESUS-TE 2 - Zou bible

EPHESUS-TE 2

¹Note na hi ule khielnate le mawnate ziehin na si vua,

²tami leitung tawndante, tulaitaha thumang lote lahah na a sem hlagau ahi hui lah a uh pa’ deina bangin zui-in tuate sungah na tuolbuol ngai uhi.

³Eihaw zosie in i lungsim le i pumpi’ lunggulnate zui-in amate lahah cilesa deinate sungah i na nungta ngai vua, i pienpi ngainate ziehin eite zong midangte bangin thangpaina’ tate i na hi uhi.

⁴Ahi vangin khuotuona a hau Pasien in a lien mama eite ei itna ziehin

⁵i khielnate tungtawnin si-a i op laitah nangawnun Khris tawh[2] ei hingtonsah a, hepina ziehin hutdamin i om ta uhi.

⁶Pasien in Khris tawh eite ei thotonsah a, vantung munte-a om Khris Jesu sungah ama tawh ei totonsah hi.

⁷Tua khu ang tung ding khang hunah Khris Jesu sunga a om tezawh lo ama’ hepina ziehin eite tungah ama’ migitna ei lah thei nading ahi hi.

⁸Azieh pen hepina ziehin upna tawh hutdamsa na hi ta vua, tua khu noma’ sepna zieh ahi vawt sih hi; Pasien’ letsong ahi bo hi.

⁹Nasep zieh ahi lo ziehin koima in a kisahtheipi thei sih ding hi.

¹⁰Bangzieh ahei cile eite pen nasep hoite a sem dinga Khris Jesu sunga ei kipiengsah ama’ bawlsate i hi vua, tua khu Pasien in a na gelkholsa i nuntahzie ding uh ahi hi.

¹¹Tua ahi ciengin nidang lai-in pienpi[3] Gentile-te na hi vua, “tep kitante ka hi uhi,” a kici mite in- cilesa tungah mihing’ khut tawh tahsa teptanna- a tep kitan lo mite ang ci uh phawh un.

¹²Tua hun lai-in Khris nei loin Israel innkuon belpawl panin ang kipuse-in kamciem tawh a kipawl thuciemnate a nga lo gamdang mite na hi vua, leitungah lametna nei lo le Pasien nei lote na hi lam uh phawh un.

¹³Ahi vangin Khris’ sisan ziehin hun khat lai-a gamlapi-a om note, tu-in ama in Khris Jesu sungah ang kinaisah ta hi.

¹⁴Azieh pen ama eite’ kilemna ahi hi; ama in ama’ cilesa ah eite kikala a om huotna a kici dalna kulpi cimsahin pawl nite pawlkhat a suohsah zo hi.

¹⁵Ama in amama’ sungah tua minam nite munah minam tha khat a siem thei nadingin, thukham’ thupiehte, le tawndan ngainate phietmangin kilemna bawl a,

¹⁶singlamte tungtawnin Pasien tungah pawl nite pumkhat a suoh dingin[4] ei lemtuo kia-in, tua tungtawnin[5] ama in kigalbawlnate a sisah hi.

¹⁷Tuaci’n ama pei-in a gamlapi-a om note le a nai-a om mite kungah kilemna thu a gen zo hi.

¹⁸Bangzieh ahei cile ei minam nite in ama tungtawnin Hlagau khat sungah Pa kung lut theina thu i nei uhi.

¹⁹Tuaci’n note pen khuolmi le gamdang mite hi nawn loin misiengthote tawh gammi suohtonin Pasien’ innkuon sung mite zong na hi ta vua,

²⁰innkiu suongpi[6] Jesu Khris mama tawh khuombul ahi sawltahpite le kamsangte tunga a kilam na hi uhi.

²¹Ama sungah tua inn buppi kizom dimdiemin khang a, tuaci’n TOPA sungah a siengtho biehinnpi khat a suoh hi;

²²note zong Pasien a Hlagau-a[7] ang tenna mun a suoh dingin a kilamton na hi uhi.