Read Zou EPHESUS-TE 3 Bible Online

EPHESUS-TE 3 - Zou bible

EPHESUS-TE 3

¹Tami thu ziehin no Gentile-te tangin Khris Jesu adinga thongkie pa keima Paul in,

²note adingin Pasien’ hepina nasep kei tunga ei kipiehna le,

³lai tawh a tomno-a kang giel bangin keima tungah kilahna tawh tua thuthuh bangci bangin ei kitheisah ahei, ci thu na za zo tham ta ding uhi.

⁴Tami lai na sim ciengun Khris’ thuthuh ka theitel zie na thei ding uhi.

⁵Tuhun ciengin a siengtho ama’ sawltahpite le a kamsangte tungah tami thuthuh a kitheisah bangin nidang khang hunin mihingte tungah na kitheisah kha lo hi.

⁶Tua thuthuh i ci in: Lungdamna thu tungtawnin Gentile-te in Israel-te tawh gou luo tonin, pumpi khat’ nate suoh tonin Khris Jesu sungah kamciem a nga tonte ahi ta uhi.

⁷Keima tunga ei kipie Pasien’ hepina letsong tawh kizui-in ama’ vanglietna nasepna hang tawh kei zong tami lungdamna thu’ nasempa khat a suoh ka hi hi.

⁸Kei ka hile misiengtho zosiete lahah a neupen ka hi vangin Gentile-te tungah ciengtan a nei lo Khris’ haunate ahi lungdamna thute a puoh ding le,

⁹sil bangkim a piengsah pa Pasien sungah tangtawng peh pana a na kiphuoldap ahi tua thuthuh tawh kisai gelna pen bang ahei, ci mi zosie a musah[8] dingin tami hepina ei kipie zo a,

¹⁰tua khu tuhun hlattuom pawlpi tungtawnin vantung munte-a om thuneite le uhna a neite tungah a kicing Pasien’ pilna namcin a kitheisah nading ahi hi.

¹¹Tami pen kumtawn ama’ tupna dung zui-in ama in i TOPA Jesu Khris sunga a sepsa ahi hi.

¹²Eite in ama i upna uh tungtawnin ama sunga a om hangsanna le muonna tawh Pasien kung i lut thei uhi.

¹³Tua ahi ziehin note adinga ka thuohnate uh ziehin keima in na lungkieh lo nadingun thu kang ngetpieh hi; tuate pen note’ minthanna ahi hi.

¹⁴Tami thu ziehin ka Pa[9] mai-ah ka khupdin a,

¹⁵ama tung panin vantung le leitunga innkuon zosie a min kivaw ahi hi.

¹⁶Ama in a minthang a haunate dung zui-in ama’ Hlagau vanglietna tawh na sunglam mi uh ang thakhausah nading le,

¹⁷upna tungtawnin note’ lungsim sungah Khris ang tengin itna sungah na kiphungvua thei nadingun thu kang ngetpieh hi.

¹⁸Note in zong misiengthote zosie tawh Khris’ ei itna adung avai, a sanna le a thuhnate na thei nadingun vanglietna nei-in,

¹⁹Pasien’ bukimna namcin tawh kidim a, theina in a bat zawh lo Khris’ itna na thei nadingun thu kang ngetpieh hi.

²⁰Tu-in i nget thei zosie le i lunggel thei zosie sanga a nah thupi zawtham le, eite sungah a vanglietna tawh kizui-a a sem thei pa tungah,

²¹khang zosie tungah hlattuom pawlpi sung le Khris Jesu sunga a om minthanna kumtawnin hing om zing taheh. Amen.