Read Zou EPHESUS-TE 4 Bible Online

EPHESUS-TE 4 - Zou bible

EPHESUS-TE 4

¹Tua ahi ziehin TOPA sunga thongkie pa keima Paul in ang kihlatna utawh kituohin hinkhuo na nei thei nadingun kang thum hi.

²Sil bangkimah kiniemkhiehna, lungnemna, lungduoina tawh kidimin, itna sungah khatlekhat na kithuohpi ciet unlen,

³note ang khiton kilemna sungah Hlagau kipumkhatna na tuhkip thei nadingun na hi thei tawpun na bawl un.

⁴Note ang kihlatna ah lametna khat sunga ang kihlan ahi ma bangin pumpi khat le Hlagau khat,

⁵TOPA khat, upna khat, baptize-na khat,

⁶na zosie tunga om, na zosie tungtawna na zosie sunga a om pa, mi zosie’ Pa le Pasien khat beh a om hi.

⁷Ahi vangin Khris’ letsong ei kipiehna zaza tawh kituohin eite khat ciet tungah hepina ei kipie hi.

⁸Tua ahi ziehin, “Ama a sangna-ah a kato ciengin a kimansa salte zawpito a, ama in mite tungah letsongte a pie hi,” kici hi.

⁹(“Ama kato hi,” a ci ciengin bang deina ahei cile ama zong lei sungtawng tengah na kumsuh[10] zo hi, a cinopna hi lo amah?

¹⁰Sil bangkim a kicinsah thei nadingin a kumsuh pa pen vantungte zosie sanga a sangzaw-a kato pa ma ahi hi.

¹¹Ama’ pieh letsongte ahile pawlkhat sawltahpite, pawlkhat kamsangte, pawlkhat lungdamna thu gente, pawlkhat pawlpi kem siete le laihil siete hi a,

¹²amate in Khris’ pumpi a kilam nadingin Pasien’ na a sem ding misiengthote pantah ding a,

¹³tua khu upna le Pasien’ Tapa theitheina-ah eihaw zosie pumkhat suohin picing a, a bukim Khris’ cingtahna zaza cieng dong i tun thei nading uh ahi hi.

¹⁴Eite i hi ule mihingte’ ngiensiemna le a pilkhel a zuouthu gelna uh ahi thuhilna hui namcin in ei mutna zieha a hawisuh a hawito kawikawi naupangte i hi nawn sih uhi.

¹⁵Lutang ahi Khris sungah i khanto bukim thei nadingun itna tawh thuman thutah i genzaw ding uhi.

¹⁶Ama tung panin pumpi buppi tawh thahui thazam zosie kizomin kiphan dimdiem a, pumpi nate in a sep ding ciet uh hoitahin a sep ciengun itna sungah tua pumpi khangin ama le ama a kilamkip hi.

¹⁷Tu-in keima in tami thu sukipin TOPA sunga kang paugen ahi hi: Kimanna a nei lo amau’ lungsim bangin Gentile-te a nuntah bangun note nungta nawn sih un.

¹⁸A lungkhauna zieh ule a lungmawlnate ziehun a thu theinate uh suhmielin a om ta a, tuaci’n Pasien’ hinna panin a kikhenkhie ta uhi.

¹⁹Amate in maizumna mel thei nawn loin thangtatna lamah a kipumpieh sieng vua, a siengtho lo sil bangkim a sem dingin lunggulna a nei uhi.

²⁰Khris’ thu na sin uh pen tua bang ahi sih hi!

²¹Bangzieh ahei cile Jesu sungah thuman thutah a op bangin note in ama’ thu na za zo tahpi vua, ama sungah thu ang kihil zo ta uhi.

²²Nidang lai-a na hindan lui uh ahi cilesa lunggulna’ solna zieha a muot thei na milui uh a paimang ding,

²³na lungsim puohziete uh a kibawltha ding le,

²⁴dihna le siengthona tahtah sungah Pasien tawh a kisun dinga ang kisiemsa na hina uh dung zui-in, mitha na sil nadingun thu ang kihil ahi hi.

²⁵Tua ahi ciengin eite khatlekhat pumpi nate i hi ciet ziehun zuouthu gennate paimangin i unpi-un i vengte kungah thuman thutah gen ciet vai.

²⁶Lungthah unlen ahi vangin maw sih un; lungthahna tawh ni na tumsah sih unlen,

²⁷dawimangpa mun na pie sih un.

²⁸Gutate in gu nawn loin, tasamte bang khatpo a hopsawn thei nadingun a khut utawh thuman tahin gimpipi-in na semzaw uheh.

²⁹Na kamham un a za mite phattuomna a pieh thei nadingin, na kam sung panun kam gilo pusuohsah sih unlen, kisapna a om bangin mite kilamkip nadingin a kimang thei kamte beh na hamzaw un.

³⁰Tatna ni adinga ang kiciemtena uh Pasien’ Hlagau Siengtho na dasah sih un.

³¹Note kung panin kilunghimawna, thangpaina, lungthahna, kihau kiselna, le kigensietna zosie, thangsietnate zosie tawh na paimangtha un.

³²Khatlekhat kihepi-in lainatna na kinei unlen, Pasien in Khris sungah note’[11] mawna ang maisah bangin note zong khatlekhat na kimaisah un.