Read Zou EPHESUS-TE 5 Bible Online

EPHESUS-TE 5 - Zou bible

EPHESUS-TE 5

¹Tua ahi ziehin ang ki-it tate na hi ziehun Pasien a ette mite na hi unlen,

²Khris in eite[12] ei itin, eite adingin Pasien tungah a namtui silpieh le biehpiehna dingin ama le ama a kipieh bangin itna sungah na nungta un.

³Hinanle misiengthote lahah a om dinga a kilawm lo ahi bang ma-in note lahah numei-pasal pahtatna, sil sieng lo nam khat popo le huoihamna kicite nangawn genin kinei vet sih heh.

⁴Na kam panun zummaw hamna, mot-hamna, a thanghuoi ciemmuina cite na omsah sih un; tua bang sangin lungdamkona na neizaw un.

⁵Numei-pasal khielna a bawl mi, a siengtho lo mi, le a huoiham mi in (milim bie pa a cinopna) Khris le Pasien’ gamah gouluo bangma a nei sih hi.

⁶Bangzieh ahei cile tam thute ziehin mi thunung lote tungah Pasien’ thangpaina tung ding ahi ziehin, koima in thugina lote tawh kisolsah sih un.

⁷Tua ahi ziehin amate tawh kigop sih un.

⁸Azieh pen nidang lai-in note khuomiel sungah na om vua, ahi vangin tu-in ahile TOPA sungah khuovah na hi ta uhi. Khuovah’ tate bangin na nungta un,

⁹azieh pen a hoi, a dih, le a man sil bangkimah khuovah’ ga kimu hi.

¹⁰TOPA’ lungkimna bang ahei, ci na mu nadingun na hakat un.

¹¹A ga nei lo khuomiel nasepnate ah kihal loin tuate na pholah zaw un.

¹²Bangzieh ahei cile tua bang mite in guhsima a septe uh gen ding nangawnin zumhuoi hi;

¹³hizongle khuovah in a pholah sil zosie mu thei a suoh hi.

¹⁴Azieh pen tua a kimu thei sil zosie khuovah ahi hi. Tua ahi ziehin, “A kimu mi aw, khanglo in! Sina panin tho in, tua hile nangma tungah Khris in ang tanvah ding hi,” ci hi.

¹⁵Tua ciengin a pil lote bang hi loin, a pilte bangin na nuntah ziete uh kidawm unlen,

¹⁶hun le nite a siet tah ziehin na hun neisunte uh a hoi lamin zang un.

¹⁷Tuaci’n mawlawm sih unlen, TOPA’ deina bang ahei, ci theisiemzaw un.

¹⁸Zu in mi siesah thei ahi ziehin zu kham sih unlen, Hlagau tawh kidimzaw un.

¹⁹Note lahah phatna late, biehna late, le hlagau lam late na sah ciengun, na lung sung vuah kihuol tahin TOPA tungah na sa un.

²⁰I TOPA Jesu Khris’ minin sil bangkim adingin Pa Pasien tungah nuomthu tut zing un.

²¹Khris zatahna zalin khatlekhat thu na kimang un.

²²Zite aw, TOPA’ thu na man bangun na pasalte’ thu na mang un.

²³Azieh pen Khris in hlattuom pawlpi’ lutang ahi ma bangin pasal in a zi’ lutang ahi hi.

²⁴Hlattuom pawlpi in Khris’ thu a man bangin zite in zong sil bangkimah a pasalte’ thu a man ding uh kilawm hi.

²⁵Pasalte aw, Khris in hlattuom pawlpi itin ama adingin ama ma a kipieh bangin na zite na it un.

²⁶Ama in hlattuom pawlpi a sienthosah thei nadingin thu tungtawnin tui tawh sawp sieng a,

²⁷tua in hlattuom pawlpi pen a nieh, a vuntun le tua bang nam khatpopo om loin, ama ma tungah a siengtho le kawbang loin etlawm taha a kipieh thei nading ahi hi.

²⁸Tua ma bangin pasalte in a pumpi uh a it bangun a zite a it ding uh kilawm hi.

²⁹Bang ding ahei cile ama’ pumpi a muda koima a om ngai sih a, Khris in a hlattuom pawlpi va-in a kep bangin ama’ pumpi va-in kemzaw hi.

³⁰Azieh pen eite ama’ pumpi nate i hi uhi.[13]

³¹“Tami thu ziehin pasal in a nu le a pa nuasie-in a zi tawh kigawm ding a, tua nite sa khat a suoh ding uhi,” ci hi.

³²Tami pen thuthuhpi khat hi a, Khris le hlattuom pawlpite tunga a zang ka hi hi.

³³Ahi vangin note a koi mapo in ama le ama a ki-it bangin na zite uh na it ding uh kilawm hi. Zi in zong a pasal a zatah ding kilawm hi.