Read Zou EPHESUS-TE 6 Bible Online

EPHESUS-TE 6 - Zou bible

EPHESUS-TE 6

¹Tate aw, TOPA sungah[14] na nu na pate uh na it un, azieh pen tami khu thudih ahi hi.

²“Na nu le na pa zatah in,” tami in kamciem tawh kikop thupieh masa pen ahi hi:

³“Tuaci’n leitungah note nuomsa-in na dam sawt ding uhi.”

⁴Pate aw, na tate lungthahsah sih unlen, pattahna le TOPA lamlahna ah khangliensah zaw un.”

⁵Silate aw, note in Khris’ thu na man bangun zauna le linna tawh lung khat khai-in na leitung pute uh’ thu na mang un.

⁶Amate ang mu sungin a lungkim nading beh uh hi loin, Khris’ silate bangin na lungtang sung vuah Pasien’ deina bangin na sem un.

⁷Numei le pasalte’ na a sem bang hi loin TOPA’ na a sem bangin thanopna tawh na sem un.

⁸Silate i hi a, sila lote i hi zongin, TOPA kung panin na hoi i sep poma a kibangin i ngakia ding uhi, ci i thei uhi.

⁹Pute aw, amate tungah tua bang ma-in na bawl un. No gel pen vantungah na ni-un pu kibang nei na hi vua, ama in deidan a nei lo lam thei unlen, na silate na hugih nawn sih un.

¹⁰A tawpna-ah TOPA sung le ama’ vangliet thahatna sungah thakhauh un.

¹¹Dawimangpa’ solna na nan zawh nadingun Pasien’ galvan bukim tawh kivon un.

¹²Bangzieh ahei cile eite[15] do pen tahsa le sisan nei galte hi loin, uhna neite, thuneinate, tu hun tami leitung khuomiel vanglietnate, le vantung munte a om hlagau gilo galkapte ahi zaw uhi.

¹³Tua ahi ziehin sietna ni ang tun ciengin na nan zawh nading ule sil bangkim na sep zaw ciengun na dinkip zawh nadingun Pasien’ galvan bukim keng un.

¹⁴Tua ahi ziehin na kawng vuah thutah kawnggah gah unlen, dihna awmdal tawh kivonin ding un.

¹⁵Kedap bangin na keng vuah kilemna lungdamna thu bulin a baisa-in om un.

¹⁶Gilopa’ meikuong thaltangte na suhmit zawh nadingun tam teng zosie tawh upna lum na tawi un.

¹⁷Hutdamna sia lukhu le Pasien’ kammal ahi Hlagau namsau tawi un.

¹⁸Hun zosie-ah Hlagau Siengtho tawh thungetna namcin le thumna namcin na nei un. Tua banga na bawl thei nadingun pilvang unlen, misiengthote zosie adingin thu na ngetpieh zing un.

¹⁹Ka thu gen ciengin ka gen ding thu ei kipieh nading le lungdamna[16] thuthuh hangtaha ka theisah thei nadingin kei adingin zong thu ei na ngetpieh un.

²⁰Kei ka hile tua thu ziehin kol kibul palai khat ka hi hi. Ka gen ding bangin hangsan taha ka gen thei nadingin thu ei na ngetpieh bo un.

²¹Note in zong kei bangci op a, bang sem ka hei, ci thu nei thei nadingun Tychicus in na kung vuah thu zosie ang gen ding hi. Ama pen TOPA sungah nasem muonhuoi ka it sanggam khat ahi hi.

²²Kote bangci op ci note in na thei nading ule na lungsimte uh ang hansuo thei nading mama tupna tawh na kung vuah ama kang sawl hi.

²³Mi buppi[17] tungah Pa Pasien le TOPA Jesu Khris tung panin upna tawh kipawl itna le kilemna hing tung taheh.

²⁴A tul thei lo itna tawh i TOPA Jesu Khris a it mi zosie tungah zong hepina om taheh.[18]