Read Zou PHILIPPI-TE 2 Bible Online

PHILIPPI-TE 2 - Zou bible

PHILIPPI-TE 2

¹Tua ahi ciengin Khris sungah kihansuona, itna tawh kihenepna, hlagau sunga kipawl theina, kilainatna le kilungsietna khatpo a op leh,

²lungsim kibang kuo-in, itna kibang nei a, lungsim kihuolin kithutuoh unlen, ka lungnopna kicingsah un.

³Huoihamna le kihisahna tawh bangma sem loin, kiniemkhiehin noma sangin midangte a hoizaw-in ngaisun un.

⁴Noma’ phattuomna ding beh ngaisun loin, midangte’ phattuomna ding zong ngaisutpieh un.

⁵Khris Jesu sunga a om[9] tami lungsim, note sungah zong omsah un.

⁶Ama in Pasien’ pienzie nei napi, Pasien tawh kizakim ding a tu tentun sih a,

⁷ama le ama kihawmsuohsah tawmin, sila lim la-in mihing bangin ang piengzaw hi.

⁸Tuaci’n mihing mel hing puo a, ama le ama kiniemkhieh tawmin, a sina tanpha-in thu mangin, singlamte tung nangawnah sina a thuoh hi.

⁹Tua ahi ziehin Pasien in ama thupi tahin tawisang a, min zosiete sangin a thupizaw min a pie hi.

¹⁰Tuaci’n vantung, leitung le lei nei-a om zosiete in Jesu’ minin a khupdin ding vua,

¹¹Pa Pasien’ minthan nadingin leii zosie in Jesu Khris khu TOPA ahi hi, ci-in a pulah ding uhi.

¹²Tua ahi ziehin ka itte aw, note in ka thu nei man zingsa ma bangun, ka op sung beh hi loin, tu ka op lo sungin zong ei mangzaw kan lai unlen, zauna le linna lungsim tawh na hutdamna uh na cingtahsah un.

¹³Bangzieh ahei cile ama’ lungkimna banga na sep nop nading ule na sep thei nadingun note sunga na ang sem pa, Pasien ahi hi.

¹⁴Phun lo niel loin sil bangkim sem un,

¹⁵tua hile lungsim kawi le a letat khang mite laizangah mukawh om lo, nuol bei le khielna a nei lo Pasien’ tate na suoh ding vua, leitungah aasi bangin na tang ding uhi.

¹⁶Hinna thu na tuhkip ziehun Khris’ ni ang tun ciengin kei pen a mawh tai le a mawh sep ka suo lona thu ka kisiel thei ta ding hi.

¹⁷Ahi vangin na upna ziehun silpieh ding le biehpiehna-a gaw dingin ei kisungsuh nanle note zosie tawh lungdamin ka kipah veve hi.

¹⁸Tua ma bangin note zong kipahin keima tawh a lungdamton ding na hi uhi.

¹⁹Note’ thu ka zahna ziehin keima zong ka lungnop tuom nadingin a sawt loin na kung vuah Timothy kang sawl ding hi, ci-in TOPA sungah ka kinem hi.

²⁰Note’ phattuom nadinga ang lunghimawpi tahtah ding ama bang koima dang ka nei sih hi.

²¹Amate in a unpi-un Jesu Khris’ phattuom nading sui loin amau’ phattuom nading a sui uhi.

²²Hizongle tapa in a pa tawh na a septon bangin, ama in lungdamna thu nasepna-ah keima tawh na semton zo a, note in zong Timothy’[10] manphatna na thei uhi.

²³Tua ahi ziehin ka vai ding a kitel zaw lien ciengin ama ang sawl pai dingin ka kilamen hi.

²⁴Keima zong a sawt loin ang haw thei dingin TOPA tungah muonna ka nei hi.

²⁵Ka sanggampa, ka naseppi le ka galkappi pa, ka kitasapna ei seppieh, na kamtai pa[11] Epaphroditus zong na kung vuah sawl ding kisam hi, ci-in ka ngaisun lai hi.

²⁶Bangzieh ahei cile ama in note zosie ang ngai ngetngut a,[12] note in a dam lona thu na zah ziehun ama zong a lunghel mama hi.

²⁷Ama pen a cina tahpi hi a, zong a si dihtah phiel ahi hi. Hizongle Pasien in ama hepi a, ama beh hi loin kei zong ei hepi hi. Tua hi sihle ka dana a kibelap to sawnsawn ding ahi hi.

²⁸Tua ahi tah ziehin note in ama na mukia ciengun na lungdam thei nading ule ka lunghimawna a kiem tuom nadingin ama kang peisah ding ka kin semsem hi.

²⁹Tua ahi ciengin TOPA sungah lungdam tahin ama na sang unlen, tam bang mite na patawi bo un.

³⁰Bangzieh ahei cile ama pen Khris’[13] nasepna dingin note in nei seppieh thei lo uh nasepnate a sem dinga a hinna khamin a silaw dihtah vawt pa ahi hi.