Read Zou PHILIPPI-TE 3 Bible Online

PHILIPPI-TE 3 - Zou bible

PHILIPPI-TE 3

¹A tawpna-ah ka sanggamte aw, TOPA sungah lungdam[14] un. Note tungah a kibang ma gielkia ding pen gimhuoi ka sa sih a, tua khu note adingin kihumbitna a suoh zaw hi.

²Uite na pel un, gilo nasemte na pel unlen tahsa atkeh gawpte na pel un![15]

³Bangzieh ahei cile eite pen cilesa a suong lo, Pasien’ hlagau tawh[16] biehna a pie, Khris Jesu sunga a kisiel le teptanna a man a zangte i hi uhi.

⁴Hizongle ke’n zong cilesa sungah suon ding thu ka nei veve hi. Midang khatpo in cilesa sungah suon ding nei-a a kingaisut leh ke’n ka nei zaw kan lai hi.

⁵Ni giet ni-in ka tep ei kitan a, Israel’ mi, Benjamin suon, Hebrew-te pana a pieng Hebrew mi, thukham lamah zong Pharisee mi,

⁶pawnthawna lamah cilei hlattuom pawlpi a bawlsie pa, thukham tawh kisai dihna lamah zong gen a baang lo pa ka hi hi.

⁷Hizongle ka nei hamphatna kici poma, Khris ziehin supna-in ka ngaisun hi.

⁸Tua tham loin, sil bangkim sanga a manphazaw ka TOPA Jesu Khris’ thu ka theina ziehin sil bangkim supna-in ka ngaisun hi. Ama ziehin sil bangkim ka tanlaw a, tuate buathah lomtang bangin ka ngaisun hi. Tua khu Khris ka nga thei nading le

⁹ama sungah ei kimu thei nading ahi a, thukham pana ang pei keima’ dihna a nei ka hi sih a, Khris upna tungtawnin[17] Pasien pana ang pei upna bulphu dihna a nei ka hizaw hi.

¹⁰Keima in Khris le a thawkia vanglietna le, ama’ sina sungah ama bang hina tawh ama’ thuohnate thuohpi theina thu ka thei nuom hi.

¹¹Tua pen lampi khatpopo tawh misite lah panin thawkiana ka nga thei khah leh a ci ka hi hi.

¹²Tami ka nga zo ta a, ka mungtup ka tung zo ta hi, [18]a ci ka hi sih a, hizongle Khris in ama’ neisa banga ei bawl ziehin keima in zong tua pen keima-a’ ka hisah thei nadingin mai ka nawt tentun hi.

¹³Ka Itte aw,[19] tuate a nei zo-in ka kingaisun nai sih hi; hizongle ka sil bawl khat pen tami ahi hi: Nua lam thute mangngil bawlin mai lama om nate hanciemin ka del tentun a,

¹⁴Khris Jesu sungah vantung pana[20] Pasien’ hlatna ahi patawina ka nga thei nadingin ka mungtup lam ka manaw vevaw hi.

¹⁵Tua ahi ciengin a picingsa eite in tam bang lungsim nei ciet vai; thu khatpo ziehin lungsim dang na nei uleh Pasien in tua thu zong ang teltheisah ding hi.

¹⁶I ngasa uh thu beh tukip ciet bo vai.

¹⁷Sanggamte aw, keima ei ette unlen, kote tung pana na nga uh gamtat zie tawh kituohin a nungta mite ciemte un.

¹⁸Bangzieh ahei cile Khris singlamte’ galte bangin mi tampi a nungta uhi; amau’ thu tamveipi kang gen ngai ta a, tu-in zong hlitui nangawn tawh kang genkia lai hi.

¹⁹Amau’ lam tawpna pen kisietna ahi hi; a pasien uh zong gilpi ahi hi; maizum nadingte-ah a kisiel zawsop vua, leitung nate beh ngaisutin a nei uhi.

²⁰Gammi i hina uh pen vantung ahi zaw a, tua panin TOPA Jesu Khris Gumpa khat ang pei ding lawptahin i ngah uhi.

²¹Ama in sil bangkim ama’ khut nei-a a koisah vanglietna tawh a gina lo i pumpi[21] pen a minthang ama’ pumpi[22] tawh a kibang dingin ei khelpieh ding hi.