Read Zou COLOSSE-TE 1 Bible Online

COLOSSE-TE 1 - Zou bible

COLOSSE-TE 1

¹Pasien’ deina bangin Khris Jesu sawltahpi Paul le i sanggampa Timothy in,

²Colosse khuopi-a om Khris sunga misiengthote le a citah sanggamte tungah: Note tungah i Pasien tung panin hepina le lungmuonna hing om taheh.

³Khris Jesu sunga na upna ule misiengthote zosie na itna uh ahi a, note dinga vantunga ang kikholpieh lametna thute ahi zongin za zo ka hi ziehun note adingin i TOPA Jesu Khris’ Pa Pasien tungah lungdamna kang kopieh zing uhi.

⁶Na tung vua ang tung tua lungdamna thu in leitung buppi-ah a ga suongin a khan ma bangin, note in zong thuman thutah sungah Pasien’ hepina thu za-in na thei tahtah ni vua kipanin note lahah ga a ga zo ta hi.

⁷Tam thu pen note in ka it ka naseppi[1] uh Epaphras kung pana na zahsa uh ahi hi. Ama pen note[2] tanga Khris’ nasem muonhuoi khat ahi hi.

⁸Hlagau sungah itna na neinate uzong ama in ei theisah zo hi.

⁹Tami thu ziehin na thu uh ka zah ni vua kipanin, hlagau lam pilna le theitelna zosie nei-in Pasien’[3] deina theitheina tawh na kidim nadingun thu kang ngetpieh zing uhi.

¹⁰Tuaci’n note in TOPA’ deina bang ahi hinkhuote mang thei-in ama na lungkimsah bukim ding vua, sil hoi namkimah zong ga suongin Pasien’ thutheina-ah na khang semsem ding uhi.

¹¹Kipahtahin lungduoina tawh sil bangkim thuoh dingin kithawi a, khuovah sungah misiengthote tawh note[4] gou ang luotonsah thei[5] Pa tungah lungdamna na ko thei nadingun, a minthang ama’ vanglietna in thahatna zosie tawh hing thakhausah ta uheh.

¹³Ama in khuomiel thuneina gam panin eite ei hunkhie-in, a it a Tapa gam sungah ei koi a,

¹⁴eite in ama sungah tatkhietna le maw kimaisahnate i nei uhi[6].

¹⁵Ama pen mu thei lo Pasien’ lim hi a, a kipiengsah zosiete lahah a pieng masa pen ahi hi;

¹⁶bangzieh ahei cile ama sungah[7] vantung le leitunga om nate, a kimuthei le a kimuthei lo nate, kumpi tophate, ahi sihle uhnate, ahi sihle gam-uhte, ahi sihle vanglietnate kisiem hi, ama ading le ama tungtawnin sil bangkim kisiem zo hi.

¹⁷Sil bangkim a op masang in Ama a om zo ta bo a, ama sungah[8] sil bangkim a kizom dimdiem hi.

¹⁸Ama pen hlattuom pawlpi ahi pumpi’ lutang ahi hi; sil bangkimah a tungnung pen ahi thei nadingin ama a kipatna le misite lah panin a kithokiasah tacil ahi hi.

¹⁹Bang ding ahei cile ama sungah Pasien’ bukimna zosie a ten ding pen Pa lungkimna hi a,

²⁰ama tungtawnin ama tawh lei le vana sil bangkim kilemsahin, a singlamte sisan tungtawnin kilemna ei bawlpieh hi.

²¹Hun khat lai-in lungsim gilo-in na gamtat siet ziehun Pasien tawh na kigamla vua,

²²tu-in ahile ama mai-ah a siengtho, nuol om lo le muhkawna om loin sina tungtawnin ama’ tahsa pumpi sungah ang lemtuo[9] zo ta hi.

²³Tua khu na zahsa uh lungdamna thu in note ang kamciem lametna panin kihei loin, na upna uh na zop suoh uleh cina hi a, vansin nei-a a om a kipiengsah zosiete tungah a kitangko hi. Keima Paul zong tam lungdamna thu’ nasem khat ka hi hi.

²⁴Tu-in keima in note dinga ka thuoh gimnate-ah ka lung a dam a, ka tahsa-a ka thuoh gimnate tawh hlattuom pawlpi ahi ama’ pumpi tangin Khris in a thuoh ding a kisam lai teng thuohin a bukimsah ka hi hi.

²⁵Pasien’ thu a kicing tahin a kithei nadingin note adingin keima tunga ei kipie Pasien’ sawlna dung zui-in a nasem pa khat ka hi hi.

²⁶Tua thuthuh pen a khangkhangin na kiselcip nanle tu hunin ama’ misiengthote tungah ang kipholah ta hi.

²⁷Pasien in tami a minthang thuthuh haunate bangza-in lien ahei, ci Gentile-te le amate tungah a theisah dingin keima ei teel a, note sunga om Khris pen tua thuthuh a minthang lametna ahi hi.

²⁸Khris sungah mi zosie a picingsa-a ka pieh thei nadingun pilna namkim tawh mi vannuoi tungah genkholin, thu hilin ka tangko pen uh ama ahi hi.

²⁹Tami thu adingin Khris in keima sunga ei guot ahi ka thahatna teng zosie tawh na semin ka hanciem hi.