Read Zou COLOSSE-TE 2 Bible Online

COLOSSE-TE 2 - Zou bible

COLOSSE-TE 2

¹Bangzieh ahei cile note le Laodicia khuomite a kipanin ka maitang ei mu ngai nai lo mi zosie adingin keima in bangza-in hanciemin sem ka hei, ci na thei ding uh ka dei hi.

²A lungsim sung vuah amate kihanthawnin itna sungah kipumkhat a, tuaci’n amate in hauna kicing theitelna bukim le, Khris mama ahi Pasien’ thu thuhpi theina[10] a nei ding uh ka dei a,

³ama sungah pilna le theina gougil zosie kiphuolin a om hi.

⁴Thu hoi lim a sut mawh vangin thuman lote tawh koima in note ang sol zo lo nadinga tami thu kang gen ahi hi.

⁵Bangzieh ahei cile ka pumpi tawh kang oppi sih vangin Hlagau sungah kang oppi veve a, na lungsim puoh dante ule Khris sungah a kip na upna uh ka mu ciengin ka kipah mama hi.

⁶Tua ahi ziehin note in Khris Jesu TOPA na sansa uh ahi ma bangin na hinkhuote uh ama sungah nungta suoh a,[11]

⁷ang kihilsa bang tehtehin ama sungah zunghla-in, kilamin upna-ah na bulkip unlen, a kicing lungdamkona na nei un.

⁸Khris’ deina dan tawh a kituoh lo, mihingte’ tang ngainate le leitung a uh hlagaute’[12] dei dan tawh a kituoh thuthuh ngaisutnate le a hawmpi ahi kisolnate tungtawnin koima in note sala ang mat lo nadingin kikem un.

⁹Bangzieh ahei cile ama’ pumpi-ah Pasien’ pienzie bukim om a,

¹⁰note in a uhte le aana neite zosie’ lutang ahi ama sungah hinna bukim na nei uhi.

¹¹Note zong Khris’ teptanna sungah cilesa pumpi suokhie-in khut tawh a kitan ahi lo, hlagau teptanna[13] tawh ama sungah tep kitansa na hi uhi.

¹²Baptize-na sungah Khris tawh na kivuiton ciengun sina panin ama a thosah Pasien’ vanglietna sungah upna tungtawnin note zong ama tawh ang thotonsah kia ta hi.[14]

¹³Na khielnate ule na cilesa teptannate sung vuah na si lai-un Pasien in ama tawh a hington dingin note ang bawl a,[15] na khielna zosie uh ang ngaidam lai-in,

¹⁴ama in eite langah thukham’ ei kalh ciemtena laite phietmangin hemkhie dawh a, singlamte tungah a kildet ta hi.

¹⁵Ama in a uhte le thuneite gal lelsah[16] a, singlamte hang tawh tuate tungah a guolzo a, mipi’ ette dingin tuate a bawl hi.

¹⁶Tua ahi ziehin anneh tuidawn ahi a, biehna pawite, hladet pawite, le sabbath tanna thute-ah ahi zongin, na tung vuah koima in thu na khensah sih un.

¹⁷Tamte pen ang tung ding nate’ hlim beh ahi a, a tahtah pen Khris hizaw hi.

¹⁸Amate in mangmuna a mu ziehun a thupi deu-in a kingaisun vua, tuaci’n a dih lo kiniemkhiehna le vantung mite bieh ding a paugen mite khatpo in na thaman uh na tan nadingun kibawlsah sih un. Tua bang mite pen a hang om lopi-in mihing’ ngaisutna tawh[17] a kimot phatsah uh ahi a,

¹⁹tua a lutang pen a tudet sih uhi, tua panin pumpi na zosie in thahatna nga-in, gu le tangte le thahuite tawh kizom dimdiem a, Pasien kung pana khanna tawh a khangto hi.

²⁰Khris tawh leitung thungehte[18] a sisa na hi tah uleh, bang dingin leitung tawh kipawl bangin nungta lai na hi uh ahei? Bang dingin note in tam bang ngainate ahi,

²¹tham sin, ciem sin, khoi kha sin, ci thute mang na hi uh ahei?

²²Tam ngaina zosie pen eite tawh a kisietha ding nate a genna hi a, tuate pen mihingte’ thupieh le thuhilnate hi lel hi.

²³Tamte pen bawltawm biehna, kiniemkhiehna, le tahsa genthei bawlnate a khangsah pilna tawh a kibah vangin nop banga gamtatna kham nadingin kimanna a nei sih uhi.[19]