Read Zou COLOSSE-TE 3 Bible Online

COLOSSE-TE 3 - Zou bible

COLOSSE-TE 3

¹Tuaci’n Khris tawh a thoto zo na hi tah uleh, note in Pasien’ zietlam kumpi topha tunga a to Khris opna mun ahi tunglam nate sui-in nei un.

²Leitunga om nate tungah na lungsim uh nga sih unlen, tunglam a om nate tungah nga un,

³azieh pen note na si zo ta vua, na hinna uh Khris tawh Pasien sungah kiphuoltonin a om hi.

⁴Note’[20] hinna ahi Khris ang kilah ciengin note zong ama’ minthanna sungah ama tawh na kilahton ding uhi.

⁵Tua ahi ziehin na tahsa sung vua om numei-pasal pahtatna, siengtho lona, huana lanna, gitlo deigawna, le milim biehna ahi huoihamna-a kipan leitung sil poma na thatlia un.

⁶Tam teng ziehin mi thunung lote tungah[21] Pasien’ lungthahna a tung ding hi.

⁷Hun khat lai-in note zong tam bang gamtatnate tawh[22] a nungta ngaite na hi uhi.

⁸Hizongle tu-in na kam sung panun tua bang nate ahi, lungthahna, thangpaina, mudana, mindaisahna, le kam gilo[23] poma na paimang un.

⁹Hindan lui le gamtatna luite a suokhiesa na hi lam uh kithei-in khatlekhat kisol sih un.

¹⁰Note pen ang piengsah pa’ lim le mel tawh kisunin theitelna lamah a kibawltha ahi mitha silte na hi ta uhi.

¹¹Tua thasuona sungah Gentile-te le Jew mite, teptan le teptan lote, nam tuolte, Scythia-te, silate le sila lote ci bang a om nawn sih hi; hizongle Khris pen bangkim ahi a, bangkimah ama a om hi.

¹²Note pen Pasien’ teelsa a siengtho le a ithuoite na hi ma bangun lainatna, migitna, kiniemkhiehna, lungnemna le lungduoina-te na sil un.

¹³Mi khatpo in adang khat tungah mawsah nading a nei leh khatlekhat kithuoh zo-in na kimaisah un. TOPA in note’ mawna ang maisah bangin note zong khatlekhat maw na kimaisah un.

¹⁴Tamte zosie tungah note in sil bangkim kihuol taha a khiton itna na sil un.

¹⁵Pumkhat ahi dinga note ang hlan Khris’ kilemna in na lungtang na uhsah unlen, kipah tahin na om un.

¹⁶Note sungah Khris’ thu kicingtahin tengsah un; pilna bukim tawh khatlekhat thu kihilin na kisam un; na lungtang vuah lungdamna tawh Pasien tungah phatna late, biehna late, le hlagau late na sa un.

¹⁷Na hamna vuah ahi a, na gamtatna vuah ahi zongin TOPA Jesu’ minin sil bangkim na bawl unlen, ama tungtawnin Pa Pasien tungah lungdam na ko un.

¹⁸Zite aw, TOPA sunga na bawl ding uh a kilawm ahi ma bangin na pasalte’ thu na mang un.

¹⁹Pasalte aw, na zite it unlen amate tungah sitsie lungham vapual ngai sih un.

²⁰Tate aw, sil bangkimah na nu na pate thu na mang un, azieh pen tam pen TOPA sungah a bawltah na nasep uh ahi hi.

²¹Pate aw, na tate uh thangpaisah sih un, tua hi sihle amate ang lungkie kha ding uhi.

²²Silate aw, sil bangkimah leitung na pute uh’ thu na mang un, ang kimu sung beh ule amate lungkim thei nadinga thumang hi loin, TOPA na zatahna ziehun na lungsimtahpi utawh thu mang na hizaw un.

²³Na sepna khat popo vuah na pute uh’ nasem bangin na kingaisun sih unlen, TOPA adinga nasem bangin na kingaisun un.

²⁴TOPA tung panin thaman dingin gouluo na nga ding uhi, ci na thei uhi; note pen TOPA Khris’ nasemte na hi uhi.

²⁵Azieh pen deisahtuom om loin, a bawlkhiel na khatpo ziehin tua khielna bawlpa tungah kithuhkia ding hi.