Read Zou COLOSSE-TE 4 Bible Online

COLOSSE-TE 4 - Zou bible

COLOSSE-TE 4

¹Pute aw, na silate uh dihtah le kilawmtahin na bawl un, azieh pen note in zong vantungah pu khat na nei lam na thei uhi.

²Kikemcing kawmin lungdamkona tawh thunget na pawnthaw un.

³Khris’ thuthuh zieha thongkie ka hi a, Pasien in kot ei honpiehin tua thu ka phuongzah thei nading le,

⁴keima in ka hil ding bangin a kicien taha ka hil thei nadingin tu mama-in kote adingin zong thu ei na ngetpieh un.

⁵Pulam mite tungah na gamtat zie uh pilvang unlen, hun[24] hoi na nga zosie uh na zah siem un.

⁶Mikim tungah bangci dawn dinga kilawm ahei, ci na thei nadingun na kamham uh nemsah zingin ci bangin na alsah un.

⁷Tychicus in kei vai thutha zosie note kungah ang gen ding hi; ama pen TOPA sunga ka it sanggampa, nasem muonhuoi, le ka naseppi[25] ahi hi.

⁸Kote pen bangci bang ka hi uh ahei ci nei thei nading ule[26] na lungnop thei nading uh ngimna tawh na kung vua ama kang sawl ahi hi;

⁹note lahah khat ahi a muonhuoi, i it sanggampa Onesimus zong ama tawh ang zawh hi. Ama gel in tam sunga thupieng zosie na kung vuah ang gen ding uhi.

¹⁰Barnabas’ tupa Mark in ang noset bangin ka thongkiehpi Aristarchus in zong ang noset uhi, a thu kang gen na zahsa uh ahi hi, ama ang pei leh na na dawn un.

¹¹Justus a kici Jesu in zong ang noset uhi. Pasien’ manggam adinga ka naseppite lahah tam teng pen tep kitan a omsun teng hi a, kei adingin amate pen ka hlamuonna ahi uhi.

¹²Note lahah Khris Jesu’ nasem[27] khat ahi Epaphras in ang noset uhi. Ama pen note picingin na dinkip nading ule Pasien’ deina zosie a bukima na telcien thei nadingun note tangin nahpitaha thu ang ngetpieh zing pa ahi hi.

¹³Azieh pen ama in note ading le Laodicea khuo le Hierapolis khuo-a om mite adingin na a hasepna thu keima a teci ka hi hi.

¹⁴Eite in i it mama uh sievuonpa Luke le Demas in zong ang noset uhi.

¹⁵Laodicea-a sanggamte, Nympha le ama’ inn a kikhawm hlattuom pawlpi mite ei na noset pieh un.

¹⁶Na lah vuah tu-a kang laihlah na sim zaw ciengun Laodicea khuo-a om hlattuom pawlpi mite tungah na simsah un; Laodicea pana ki-at lai zong na simthuo pai un.

¹⁷Tuale Archippus kungah, “TOPA sunga na nga nasep zo sieng in,” ci-in na gen un.

¹⁸Tami hopina lai pen keima Paul in ka khut mama tawh ka giel ahi hi. Ei kikolbulna thu na phawh zing un. Note tawh hepina hing om taheh.[28]