Read Zou JOSHUA 1 Bible Online

JOSHUA 1 - Zou bible

JOSHUA 1

¹TOPA’ nasem Moses a si zaw ciengin TOPA in Moses’ a hupa Nun tapa Joshua hopi-in,

²“Ka nasempa Moses si zo hi. Tu-in ding inlen nangma le tam mite zosie in Jodan gun kantanin Israel-te tunga ka pieh gam sungah pei un.

³Moses tunga ka ciemsa ma bangin na ketaw in a totna mun popo nangma kang pie zo hi.

⁴Senel gam le tam Lebanon gama kipanin gun lienpi Euphrates gun dong, nitumna lama Tuipi Lien lam, Hit-te leitang zosie nangma’ gam hi ding hi.

⁵Na hin sung tungtawnin koima in ang langpan zo sih ding hi. Moses tawh ka opton bangin nang tawh zong kang om ton ding hi; kang tamasah sih ding a, zong kang nuasie sih ding hi.

⁶Thahat inlen hang in; azieh pen na pu na pate uh pieh dinga ka ciemsa leitang tam mite na luosah ding hi.

⁷Tha hatin hang inlen, ka nasempa Moses ang pieh thukham zosie tawh kizui-in na gamtat ding limtahin ngaisun in; na peina popo-ah na lawcin thei nadingin zietlam ahi a, veilam ahi zongin piel sin.

⁸Na kam le tami thukham laibu na kilawisah sih ding hi; tua sunga kigiel teng zosie tawh kizui-in limtaha na gamtat thei nadingin sun le zanin na lung ngaingai ding hi. Tua hile na ma vang ding a, na lawcing ding hi.

⁹Tam bangin thu kang pie hi: Tha hat inlen hang in. Zau sinlen lungkie sin, azieh pen na peina popo-ah nangma tawh TOPA na Pasien ang om hi,” a ci hi.

¹⁰Tua ciengin Joshua in mipi uliente thupie a,

¹¹“Giephual ah pei unlen, mite tam bangin thupie un: ‘Na lam-an ding uh kiging un; azieh pen TOPA na Pasien un na nei ding vua ang pieh leitang a luo dingin ni thum sungin tam Jordan a galkai ding na hi uhi,’ ci un,” a ci hi.

¹²Joshua in Reuben-te, Gad-te, Manasseh minam alangte kungah,

¹³“TOPA na Pasien un tawlngahna hing pie-in tam leitang ang pie ding hi, ci-in TOPA’ nasem Moses a thupieh phawh un.

¹⁴Moses in Jordan gal khat a ang pieh leitangah na zite, na tasente ule na ganhingte a om ding uhi. Ahi vangin note lahah galhang zosie in hiem tawi-in Jordan kantanin na sanggamte mai-ah pei-in,

¹⁵TOPA in no ang pieh bangin na sanggamte uh tungah tawlngahna pie-in, TOPA na Pasien un amate a pieh leitang a luo masangsie-un na panpi ding uhi. Tua ciengin na leitang vuah kilekia-in, TOPA’ nasem Moses in Jordan gal nisuona lamah ang pieh leitang na luo ding uhi,” a ci hi.

¹⁶Amate in tam bangin Joshua a dawng uhi: “Kote in nei thupieh zosie ka sem ding vua, nei sawlna popo-ah ka pei ding uhi.

¹⁷Sil bangkimah Moses thu ka man bang tehtehun na thu ka mang ding uhi. TOPA na Pasien in Moses a ompi bangin nang zong hing ompi taheh.

¹⁸Na thupiehnate a ledo le na kammal a mang lo poma, na thupieh popo a mang lo poma kithat ding hi. Thahatin na han ding beh ahi hi,” a ci uhi.