Read Zou JOSHUA 11 Bible Online

JOSHUA 11 - Zou bible

JOSHUA 11

¹Hazor Kumpipa Jabin in tam thu a zah ciengin, Madon Kumpipa Jobab kung, Shimron kumpipa kung, Achshaph kumpipa kung,

²leilu lam muol tung gama om kumpite kung, Chinneroth leitaw lama om Arabah gam sung, le lei ngiemna mun nitumna lama om Naphoth-dor gam sunga om kumpite kung,

³nisuona le nitumna lama om Canaan-te, Amor-te, Hit-te, Periz-te, muoltung gama om Jebus-te, Mizpah gam Hermon nei-a om Hiv-te kungah thu a puoh hi.

⁴Amate tuipi gei-a senel bangin a galkap honpi, galkap honte zosie le a tam mama sakolte le leengte tawh a kuon uhi.

⁵Tami kumpite zosie in amau’ galkapte gawmin Israel-te do dingin a kuon vua, Merom lui-ah giephuol a satton uhi.

⁶TOPA in Joshua kungah, “Amate giing sin, azieh pen zing cieng tu hunin amate a unpi-un a sisa-in Israel-te tungah ka pie ding hi; a sakolte uh a kapzahui na vatsan ding vua, a leengte uh mei tawh na hal ding uhi,” a ci hi.

⁷Tuaci’n Joshua zong a galkap zosie tawh thakhatin Merom lui gei-a amate kungah pei-in a va sim uhi.

⁸TOPA in Sidon Lien le Misrephoth-maim cieng dong, le nisuona lam Mizpeh kuom dong amate a del Israel-te’ khut sungah amate a pie hi. A suohta khat beh a om nawn lo dongin a that gam uhi.

⁹TOPA thupiehsa bangin Joshua in amate tungah a bawl hi; ama in a sakolte uh a kapzahui vatsan piehin a leengte uh mei tawh a halpieh hi.

¹⁰Khum hunin Joshua kiheikia-in Hazor la a, namsau tawh a kumpipa a vat hi. Khum hun masangin Hazor khuo pen tua kumpipa gamte zosie’ lutang ahi hi.

¹¹Khum sunga teng zosie namsau tawh vatmai-in a sumaimang uhi; a husang thei khat beh kihingkhawi lo a, tuale ama in mei tawh Hazor a haltum hi.

¹²TOPA’ nasem Moses in a thupiehsa bangin Joshua in tua kumpite opna khuo teng le a kumpi teng uh la a, namsau tawh vatmai-in a sumaimang hi.

¹³Hinanle Joshua in a na haltum Hazor simlo, muol tunga khuopite khat zong Israel-te in hal lo hi.

¹⁴Israel-te in galvan lah dingin tami khuopite sunga van kinuasiete le ganhingte a la uhi; ahi vangin amate a suhsiet masangsie-un namsau tawh a vatmai vua, a husang thei khat zong a hen sih uhi.

¹⁵TOPA in a nasempa Moses a thupieh ma bangin Moses in zong Joshua thu piesawn a, tuaci’n Joshua zong tua bang ma-in a gamta hi; TOPA in Moses a thupieh zosie Joshua in sep loin a nuasie khat zong om lo hi.

¹⁶Tuaci’n Joshua in tam gam zosie a la hi: Muoltung gam, Negeb gam zosie, Goshen gam zosie, gam niem gam le Arabah gam, Israel muoltung gam le a ngiemna gam,

¹⁷Seir lama kihlungto Halak Muol panin Hermon Muol nei Lebanon kuoma om Baal-gad cieng dong a la hi. Ama in a kumpi zosie uh man a, vat gawpin a that hi.

¹⁸Tua kumpite zosie le Joshua sauveipi a kido hi.

¹⁹Gibeon-a teng Hiv-te longal Israel-te tawh kilemna a bawl khuopi khat zong om lo hi; tua khuote zosie gal sunga a lah uh ahi hi.

²⁰Azieh pen TOPA in Moses a thupiehsa bang lienin amate kihepi loin a kisuhsiet kilkel nading le a amate a cigam thei nadingun Israel-te tawh kido dinga ang kuon thei nading uh pen TOPA’ nasep ahi hi.

²¹Khum hunin Joshua pei-in muoltung gam, Hebron, Debir, Anab le Judah muoltung gam zosie pan le Israel muoltung gam zosie panin Anak-te a notmang hi; Joshua in a khuopite utawh amate a susiemang hi.

²²Israel-te’ gam sungah Anak-te khat beh om nawn lo hi; Gaza, Gath, le Ashdod sung behah pawl khat omlai hi.

²³Tuaci’n TOPA in Moses tunga a gensa zosie bangin Joshua in gam buppi a la hi; Joshua in amau’ minam tanh tawh kizui-in Israel-te tungah a luo dingun gamh-in a pie hi. Tuale tua gamah gal a veng hi.