Read Zou JOSHUA 13 Bible Online

JOSHUA 13 - Zou bible

JOSHUA 13

¹Tu-in Joshua vuoi-in a kum a tam mama ta hi; tuale TOPA in ama kungah, “Nang lah vuoi-in na kum a tam ta a, gam lah ding tampitah omlai hi,” a ci hi.

²Gam lah ding a omlai tam teng ahi hi: Philistia gam sung zosie le Geshur gam zosie,

³(Egypt nisuona Shihor panin leilu lama Ekron gamgi dong, tua pen Canaan-te’ gamin kiciemte hi; Gaza, Ashdod, Ashkelon, Gath, le Ekron gamte a uh Philistia mi nga a om hi) le Avvim gam,

⁴leitaw lama Canaan-te’ leitang zosie, le Sidon-te’ gam ahi Mearah gam, Amor-te’ gamgi ahi Aphek cieng dong,

⁵le Gebal-te’ leitang, le Lebanon gam zosie, nisuona lamah Hermon Muol nei-a Baal-gad panin Lebo-hamath cieng dong,

⁶Lebanon panin Misrephoth-maim cieng dong, Sidon-te zosie nangawn ahi hi. Kei mama in Israel-te mai panin amate ka notmang ding hi; nang kang thupiehsa bangin Israel-te tungah a luo dingun leitang beh hawm in.

⁷Tua ahi ziehin tu-in minam kuo le Manasseh minam alangte tungah a luo dingun tam leitang hawm in,” a ci hi.

⁸Manasseh[21] minam alang dang khatte tawh Reuben-te le Gad-te in TOPA’ nasem Moses in amate a piehsa bangin nisuona lam Jordan galkhatah gamh nga zo uhi:

⁹Arnon Lui monga om Aroer pan, le kuom laikima om khuopi, le Medeba panin[22] Dibon cieng donga kihlung phei muolzang gam zosie;

¹⁰le Ammon-te’ gamgi cieng dong ahi Heshbon-a kumpi a sem Amor-te’ kumpipa Sihon’ khuopite zosie;

¹¹Gilead le Geshur-te’ gam le Maacath-te’ gam, le Hermon Muol zosie, le Salecah dong Bashan gam zosie;

¹²Ashtaroth le Edrei-a kumpi sem Bashan gam sunga Og kumpi gam zosie ( Rephaim-a a suohtate lahah a ma beh om hi); Moses in tam teng zo-in a notmang hi.

¹³Hizongle Israel-te in Geshur-te ahi a, Maacath-te ahi zongin notmang lo hi; ahi vangin tu-ni dongin Israel-te lahah Geshur-te le Maacath-te a teng uhi.

¹⁴Moses in Levi minamte tung behah gouluo pie lo hi; ama in a kung vuah a gensa bangin Israel-te’ TOPA Pasien tunga kipie meihal biehnate pen amau’ gouluo ahi hi.

¹⁵Moses in Reuben minamte tungah amau’ be tawh kizui-in gouluo a pie hi.

¹⁶Amau’ gouluo pen Arnon Lui gei-a om Aroer pan, le kuom laizanga om khuopi, le Medeba gei-a muolzang zosie,

¹⁷Heshbon, le muolzang tunga om a khuopite zosie; Dibon, Bamoth-baal, Beth-baal-meon,

¹⁸Jahaz, Kademoth, Mephaath,

¹⁹Kiriathaim, Sibmah, le tua kuom muoltunga om Zereth-Shahar,

²⁰Bethpeor, Pisgah kenpang suh, le Bethjeshimoth ahi a,

²¹muolzang khuopi zosie, le Moses in Midian makaite Evi, Rekem, Zur, Hur, le Reba, tua gama teng Sihon’ uliente tawh a na zaw ton ahi Heshbon-a kumpi sem Amor mi Kumpi Sihon’ kumpi gam zosie ahi hi.

²²Beor’ tapa, aisan siempa Balaam zong, Israel-te in adang a thate lahah namsau tawh a thatton uhi.

²³Reuben-te’ gamgi pen Jordan le a gunpang ahi hi. Tam pen amau’ be tawh kizui-in a khuopite le a khuoneute tawh Reuben-te’ gouluo ahi hi.

²⁴Moses in Gad minamte tungah zong amau’ innkuon tawh kizui-in gouluo a pie hi.

²⁵Amau’ gam pen Jazer, le Gilead khuopi zosie, Rabbah nisuona lama om Aroer cieng dong Ammon-te’ leitang phallang khat,

²⁶le Heshbon panin Ramath-mizpeh le Betonim cieng, le Mahanaim panin Debir[23] gam cieng,

²⁷le Beth-haram kuom sungah Beth-nimrah, Succoth, le Zaphon, Heshbon-a kumpi Sihon’ kumpi gam a omlai teng, Jordan le a gunpang teng, Chinnereth Tuipi a niemna lam mong cieng dong, Jordan galkhat nisuona lam dong ahi hi.

²⁸Tam pen amau’ be tawh kizui-in a khuopite ule a khuoneute tawh Gad-te’ gouluo ahi hi.

²⁹Moses in Manasseh minam alangte tungah gouluo a pie hi. Amau’ innkuon tawh kizui-in Manasseh minam alangte tungah kihawm hi.

³⁰Amau’ gam pen Mahanaim panin Bashan gam sung zosie kansanin Bashan kumpi Og’ kumpi gam buppi, le Bashan gam sunga om Jair-te tenna zosie, khuopi sawmguhte,

³¹le Bashan-a Og’ kumpi gam khuopite ahi Gilead alang le Ashtaroth, le Edrei khuopite ahi hi. Tam teng pen amau’ be tawh kizui-in Machir-te alang adingin Manasseh’ tapa Machir mite tungah kipie hi.

³²Tam teng pen Jericho nisuona lam Jordan galkhat, Moab zanglei-ah Moses in a hawm gouluote ahi hi.

³³Ahi vangin Levi minamte tungah Moses in gouluo pie lo hi; Israel-te’ TOPA Pasien a kung vua a gensa bangin ama pen amau’ gouluo ahi hi.