Read Zou JOSHUA 14 Bible Online

JOSHUA 14 - Zou bible

JOSHUA 14

¹Tam teng pen siempu Eleazar in Nun tapa Joshua le Israel minam sunga be lutang teng tunga a hawmpieh Canaan gam sunga Israel-te’ nga gouluote ahi hi.

²Minam kuo le alangte adingin TOPA in Moses a thupiehsa bangin aisanna tawh amau’ gouluote kihawm hi.

³Bangzieh ahei cile Jordan galkhata minam ni le alangte tungah Moses in gouluo a pie zo ta hi. Hizongle ama in amate lahah Levi-te bangma gouluo pie lo hi.

⁴Bang ding ahei cile Joseph mite pen minam ni-in kikhen a, Manasseh le Ephraim minamte ahi uhi. Khum gam sungah Levi-te ading tanh kipie lo a, ahi vangin tenna ding khuopite le a ganhingte vua dingin lonona gamte kipie hi.

⁵TOPA in Moses a thupieh bangin Israel-te a gamta uhi; amate in leitang a hawm uhi.

⁶Tua ciengin Gilgal-a Joshua kungah Judah mite a pei uhi; tuale Keniz-te Jephunneh’ tapa Caleb in a kungah, “TOPA in nang le kei tawh kisai-in Kadesh-barnea-ah Pasien’ mi Moses tunga a thugente na thei hi.

⁷A gam vandap dingin TOPA’ nasem Moses in Kadesh-barnea panin ei sawl lai-in kum sawmli ka pha hi; tuale keima in ama tungah a man bangin thu ka puoh hi.

⁸Ahi vangin kei tawh a peito ka guolte in mite a lungkiesah uhi; hizongle keima in lungsim tahpi tawh TOPA ka Pasien ka zui hi.

⁹Khum ni-in Moses a kiciem a, ‘TOPA ka Pasien na lungsim tahpi tawh zui na hi ziehin na keng tawh na totsa leitangte nangma le na tate adingin gouluo ahi zing ding hi,’ ei ci hi.

¹⁰Tu-in na mu bangin ama in a cisa ma bangin gamlahah Israel-te a pei sung, TOPA in Moses tungah tam thu a gen huna kipanin kum sawmli le kum nga sung, TOPA in ei nungtasah hi; tuale tuni-in kei kum sawmgiet le kumnga ka pha ta hi.

¹¹Moses in ei sawl lai ma bangin tuni-in ka tha a hat lai hi; ka thatang zong gal do nading le vaikuon vaitun nadingin khum hun lai-a ka thatang ma bang lai hi.

¹²Tuaci’n tu-in khum ni-a TOPA in a gensa tam muoltung gam kei ei pie in; azieh pen kul tawh ki-im khuopite tawh Anak-te khum sungah bangci om ci na zahsa uh ahi hi; TOPA in ei ompi ding a, TOPA’ ci bangin amate ka notmang zo kha ding hi,” a ci hi.

¹³Tua ciengin Joshua in ama thupha pie a, Jephunneh’ tapa Caleb tungah gouluo dingin Hebron a pie hi.

¹⁴Tuaci’n ama in lungsim tahpi tawh Israel-te’ TOPA Pasien a zui ziehin tuni dongin Hebron pen Keniz mi Jephunneh’ tapa Caleb’ gouluo a suoh hi.

¹⁵Tu-a tam Hebron’ min pen nidang lai-in Kiriath-arba[24] kici hi; tam Arba pen[25] Anak-te lahah mi lienpen khat ahi hi. Tuale khum gamah gal kidona a veng hi.