Read Zou JOSHUA 18 Bible Online

JOSHUA 18 - Zou bible

JOSHUA 18

¹Tua ciengin Shiloh-ah Israel mihon buppi a kikhawm vua, khum munah kikhopna puonbuh a lam uhi. A mai vuah khum gam zawsa-in a om hi.

²Israel-te lahah gouluo kipie nai lo minam sagi omlai hi.

³Tuaci’n Joshua in Israel-te kungah,”TOPA, na pu na pate uh Pasien in no ang piehsa leitangah pei-in tua gam na luo ding uh bang tanvei ziekai lai ding na hi uh ahei?

⁴Minam khat panin mi thum ta ei pie unlen, amate tua gamah vah kawikawi-in amau’ luo dinga ngaisutna tawh a leitang omzie lai tawh a ciemte dingin amate ka sawl ding hi. Tua ciengin ka kungah ang peikia ding uhi.

⁵Tua leitang pen se sagi-in a khen ding vua, Judah pen leitaw lam ama’ gam ma-ah om suohin Joseph’ innkuonte leilu lam ama gam ma-ah om ding uhi.

⁶Tua leitang khen sagi-in na khen ding vua, tam sunga ka kungah na ciemtena uh nang peipi ding uhi; keima in tam mun TOPA i Pasien mai-ah note dingin ai ka san ding hi.

⁷Levi-te in note lahah tanh a nei sih uhi, bang ding ahei cile TOPA’ siempu nasep khu a gouluo uh ahi hi; tuale Gad, Reuben, le Manasseh minam alangte in TOPA’ nasem Moses in amate a piehsa Jordan nisuona lam galkhatah amau’ gouluo a nga zo ta uhi,” a ci hi.

⁸Tuaci’n mite kuonkhie uhi; tuale Joshua in leitang ciemtena giel dinga pei mite thu pie a, “Gam sungah vah kawikawi-in leitang ciemtena hing giel unlen, ka kungah hing peikia un; tuale Shiloh muna TOPA mai tami munah note dingin ai ka san ding hi,” a ci hi.

⁹Tuaci’n mite kuonin gam sungah a suhva a tova vua, laibu khat sungah tua gam a khuokhuo-in khen sagi-in a khen uhi; tua ciengin Shiloh giephuola Joshua kungah a pei uhi.

¹⁰Joshua in TOPA mai Shiloh-ah amate dingin ai a san hi; tuale khum munah Joshua in Israel-te khat ciet tungah a tanh ciet uh a hawmpieh hi.

¹¹Benjamin minam sunga a innkuonte utawh kizui-in aisanna tung a, amate kipie gam pen Judah minam le Joseph minamte kikalah kie hi.

¹²Leilu lam panga amau’ gamgi pen Jordan panin kipan hi; tua ciengin leilu lamah Jericho leilu lam muolken banto a, tua ciengin muoltung gam nawhin nitumna lamah pei hi; tuale Beth-aven sehnel gamah tawp hi.

¹³Khum panin gamgi in leitaw lamah Luz lam manaw a, Luz (Bethel a kici) muolken dongah peisuh a, khum panin Beth-horon Neinung leitaw lama om muoltunga Ataroth-adder khuo-ah tungsuh hi.

¹⁴Tua ciengin gamgi in mundang zuonin nitumna lamah kihei-in pei a, Beth-horon galkhat leitaw lama om muol panin nitumna lampang leitaw lamah kihei a, Judah minamte-a’ ahi Kiriath-baal (Kiriath-jearim kici) ah tawp hi. Tami in a nitumna lam pang a piengsah hi.

¹⁵Kiriath-jearim khuopi gei-ah leitaw lam gamgi kipan hi; tua panin Ephron[30] ah gamgi pei a, Nephtoah Tuite nah cieng dong tung hi;

¹⁶tua ciengin Rephaim kuom leilu lam monga om Hinnom tapa’ kuom kigalmuna gamgi muol ah gamgi a pei hi; tua ciengin Jebus-te’ muolken leitaw lam Hinnom kuomah peisuhin En-rogel ah a tungsuh hi;

¹⁷tua ciengin leilu lam manaw-in kawi a, En-shemesh ah peisuohin, khum panin Adummim katona galkhat, Geliloth ah a pei hi; tua ciengin Reuben’ tapa Bohan’ Suongpi-ah a peisuh hi;

¹⁸tuale Beth-arabah[31] muolken leilu lamah gamgi peisuohin Arabah-ah peisuh hi;

¹⁹tua ciengin Beth-hoglah muolken leilu lam dong gamgi kihlung hi; Jordan mong leitaw lam, Si Tuipi[32] dawh leilu lamah Jordan lui tawpna leitaw lamah gamgi a tawp hi; tam pen leitaw lam gamgi ahi hi.

²⁰Jordan gun in nisuona lamah gamgi a piengsah hi. Tam khu a innkuon zui-in a kimvel vuah a gamgi a gamgi-a Benjamin minamte’ gouluo ahi hi.

²¹Tu-in amau’ innkuon zui-a Benjamin minamte’ khuopite Jericho, Beth-hoglah, Emek-keziz,

²²Beth-arabah, Zemaraim, Bethel,

²³Avvim, Parah, Ophrah,

²⁴Chephar-ammoni, Ophni, Geba - khuopi sawm le ni le a khuoneute tawh ahi hi:

²⁵Gibeon, Ramah, Beeroth,

²⁶Mizpah, Chephirah, Mozah,

²⁷Rekem, Irpeel, Taralah,

²⁸Zela, Haeleph, Jebus[33] (Jerusalem a cina), Gibeah[34] le Kiriath-jearim,[35] khuopi sawm le li le a khuoneute tawh ahi hi. Tam pen a innkuon utawh kizui-in Benjamin minamte’ gouluo ahi hi.