Read Zou JOSHUA 22 Bible Online

JOSHUA 22 - Zou bible

JOSHUA 22

¹Tua ciengin Joshua in Reuben-te, Gad-te le Manasseh minam alangte hlan a,

²a kung vuah, “TOPA’ nasem Moses in ang thupieh zosie a unpi-in na zui sieng zo ta vua, kang thupiehna zosie-ah ka thu na mang zo ta uhi;

³tam ni tampi sung tuni dongin na unaute na taisan sih vua, TOPA na Pasien uh’ ang sawlna limtahin na zui zo ta uhi.

⁴Tuale tu-in ama in a ciemsa bangin TOPA na Pasien un amate tawlngahna a pie hi; tua ahi ziehin TOPA’ nasem Moses in ang piehsa Jordan galkhat, na tan ding uh gama om na puonbuh lam vuah kihei-in pei un.

⁵TOPA’ nasem Moses in ang pieh thupiehna le thuhilna ahi, TOPA na Pasien uh it ding, a lampi zosie zui ding, a thupiehnate zui ding, ama bel ding le na lungsim zosie ule na hinna zosie utawh ama’ na nasep ding uh limtahin ngaisun un,” a ci hi.

⁶Tuaci’n Joshua in amate thupha pie-in peisah a, tuale amate a innlam vuah a pei uhi.

⁷Tu-in Manasseh minam alangte tungah Moses in Jordan nisuona lam Bashan gam sungah amau’ tan ding gam pie zo hi; hinanle Joshua in adang alangte tungah Jordan nitumna a unaute uh Israel-te tungah neisa a pie hi. Joshua in a puonbuh vuah amate sawldawhin thupha a pieh ciengin,

⁸ama in a kung vuah, “Hauna lienpi, ganhon tampi le ngun, kham, sumngo, sia le puon tampi tawh na puonbuh vuah peikia un; na galte uh’ van na tomte uh na unaute tawh hawm un,” a ci hi.

⁹Tuaci’n Reuben-te, Gad-te, le Manasseh minam alangte, Moses tungtawnin TOPA’ thupieh banga a nga uh amau’ leitang ahi Gilead gam zuon dingin Canaan gam sunga om Shiloh munah Israel-te tawh kikhenin inn ah a kilekia uhi.

¹⁰Canaan gam sung Jordan gei-a om gam[37] ah a tun ciengun Reuben-te, Gad-te, le Manasseh minam alangte in Jordan gei-a tua munah maitam gol mama khat a lam uhi.

¹¹Israel-te in Reuben-te, Gad-te, le Manasseh minam alangte in Jordan gei-a om gam[38] sung, Canaan gamgi dung, Israel-te’ gam lampangah maitam khat a lam uh a za uhi.

¹²Israel-te in tua thu a zah ciengun amate a do dingin Shiloh munah Israel mihon buppi a kikhawm uhi.

¹³Tua ciengin Israel-te in Gilead gama Reuben-te, Gad-te le Manasseh minam alangte kungah siempu Eleazar tapa Phinehas,

¹⁴le ama tawh uhpi mi sawm, Israel minam innkuon panin khat ciet, Israel innkuonte lahah innkuon lutang ahite vive sawl uhi.

¹⁵Gilead gam sunga om Reuben-te, Gad-te, le Manasseh minam alangte kungah amate pei-in a kung vuah,

¹⁶“TOPA’ mihon buppi in, ‘TOPA ledona-ah tuni-in noma dingin maitam khat lamna tawh TOPA zuina panin kihei-in Israel Pasien tungah na gamtatna sa uh ahi tam na letatna ukhu bang bep ahei?

¹⁷TOPA’ mihon buppi tungah khum zieha gimna khat ang tunna, ei le ei i kisiensuo nai lona uh ahi Peor-a i mawna uh kicing sa nai vaset loin, tuni-in TOPA zuina panin kiheikia ding na hi uh amah? Tuni-in TOPA na ledo uleh zing ciengin Israel mi vannuoi tungah ama ang lungthah ding hi.

¹⁹Ahi vangin tu-in na leitang uh a sieng lo ahile TOPA’ biehbuh kitunna mun TOPA’ leitangah hing pei unlen kote lahah luo hing nei un; TOPA ledo beh sih unlen, ahi sihle TOPA i Pasien’ maitam ahi lo noma dinga maitam khat lamna tawh kote[39] ei ledo sih un.

²⁰A ki-ap vante tungah Zerah’ tapa Achan a muonhuoi lo ziehin Israel mihonpi zosie tungah lungthahna tung hi lo amah? Ama’ mawna ziehin ama beh si lo hi!’ ci uhi,” ci-in a gen uhi.

²¹Tua ciengin Reuben-te, Gad-te le Manasseh minam alangte in Israel innkuon lutangte dawngin,

²²“TOPA, pasien-te’ Pasien!, TOPA, pasien-te’ Pasien! Ama in thei hi; Israel-te in zong thei ta uheh! Tam khu ledona ahi a, TOPA upna pana ka peikhiel nading ule, TOPA zuina pana ka piel nading vua maitam lam ka hi uleh tuni-in kote ei hinkhawi da heh; tua ahi sihle zong tua tungah meihal biehna ahi a, an tawh biehna ahi a, thunuam biehna ahi zongin pieh nadinga a lam ka hi uleh TOPA mama in ei thuh taheh.

²⁴Tua bang ahi sih hi! Ang tung ding hunte-ah na tate un ka tate uh kungah, ‘Israel Pasien TOPA tawh no bang kisai na hi uh ahei?

²⁵Bang ding ahei cile no Reuben-te le Gad-te, le ko kikalah TOPA in gamgi dingin Jordan bawl zo hi; TOPA sungah tanh na nei sih uhi,’ a ci khah ding uh zauna tawh ka bawl uh ahi bo hi. Tuaci’n ka tate un TOPA a bieh ding uh na tate un khahtan kha ding uhi.

²⁶Tua ahi ciengin, ‘Meihal biehna ahi a, biehpiehna ding ahi zongin hi loin, ama opna ah ka meihal biehnate uh, ka biehpiehnate ule thunuam-a ka biehnate utawh TOPA’ na kasep na uh ko le no kikal le ei haw zaw cienga i suonlehlahte kikalah teci dingin maitam khat bawl vai. Tua bang hi sih mawh leh ang tung ding hunte-ah na tate un ka tate uh kungah, “TOPA sungah tanh na nei sih uhi,” ci thei kha ding uhi,’ ka ci uhi.

²⁸Tua ziehin ang tung ding hunte-ah ko tung ahi a, ka suonlehlahte uh tungah ahi zongin tam bangin ang kici leh, ‘Meihal biehna ding ahi a, biehpiehna ding ahi zongin hi loin, no le ko kikalah teci dinga ka pu ka pate un a bawl TOPA’ maitam lim en un,’ i ci ding uhi, ci-in ka ngaituo uhi.

²⁹Ama biehbuh mai-a om TOPA ka Pasien uh’ maitam simlo meihal biehna ahi a, an tawh biehna ahi a, biehpiehna ding ahi zongin maitam khat lamna tawh TOPA ledo-in TOPA zuina pana a piel ka hi vawt sih uhi.

³⁰Siempu Phinehas le ama tawh a om mihon uhpi, Israel innkuon lutangte in Reuben-te, Gad-te, le Manasseh-te thugen a zah ciengun a lungkim mama uhi.

³¹Siempu Eleazar’ tapa Phinehas in Reuben-te, Gad-te le Manasseh-te kungah, “TOPA dona sil sie na bawl lo ziehun eite lahah TOPA om hi, ci-in tuni-in i thei hi. Tu-in note in TOPA in gim a pieh nading panin Israel-te na hunkhie uhi,” a ci hi.

³²Tua ciengin Gilead gama om Reuben-te le Gad-te kung panin Israel-te opna Canaan gamah Eleazar’ tapa siempu Phinehas le uhpite kilekia-in amate kungah thu a puoh uhi.

³³Tua a thupuoh un Israel-te lungdamsah hi; tuale Israel-te in Pasien phatin Reuben-te le Gad-te’ tenna leitang susie-in amate gala a sim ding uh thu a gen nawn sih uhi.

³⁴Reuben-te le Gad-te in tua maitam “Teci”[40] ci-in phuo uhi; “Azieh pen TOPA in Pasien a hina thu i kikal vuah teci khat ahi hi,” a ci uhi.