Read Zou JOSHUA 24 Bible Online

JOSHUA 24 - Zou bible

JOSHUA 24

¹Tua ciengin Joshua in Shechem-ah Israel minam zosie a kaikhawm a, a upate, a makaite, a thukhente, le a vaihawmte hlan hi; tuale Pasien mai-ah amate ciet a kipulah uhi.

²Joshua in mite kungah, “Israel Pasien, TOPA in tam bangin gen hi: Tang lai-in na pu na pate uh - Terah le a tapate Abraham le Nahor- Euphrates gun galkhatah tengin pasien dangte’ na sem uhi.

³Tua ciengin gungal panin na pu uh Abraham la-in Canaan gam muncin tengah ka peipi kawikawi a, a suonlehlahte tampi ka phasah hi. Ama tungah Isaac ka pie a,

⁴Isaac tungah Jacob le Esau ka pie hi. A nei dingin Seir muoltung gam Esau ka pie a, hizongle Egypt ah Jacob le a tate a peisuh uhi.

⁵Tua ciengin keima in Moses le Aaron sawlin a gam sunga ka sepnate tawh Egypt ka gimsah a, tua zaw ciengin note kang peipi hi.

⁶Egypt panin na pu na pate uh ka peipi ciengin tuipi na tung uhi; tuale Egypt-te in na pu na pate uh’ leeng le sakol tung tuongte tawh San Tuipi[41] dong del uhi.

⁷TOPA tungah a kiko ciengun ama in note le Egypt-te kikalah khuomiel koi a, a tung vuah tuipi luongsahin amate a hlummang sah hi; tuale Egypt tunga ka bawl nate na mit utawh na mu uhi. tua zaw ciengin senel gamah zong hun sawtpi na teng uhi.

⁸Tua ciengin Jordan galkhata teng Amor-te’ leitangah note kang peipi hi; amate in hing do-in, na khut sung vuah amate kang pie hi, tuale a leitang uh na luo vua, keima in na mai vuah amate ka susie hi.

⁹Tua ciengin Israel do dingin Moab kumpipa Zippor’ tapa Balak a kuon hi. Ama in note ang samsie dingin Beor’ tapa Balaam cielin sawl a,

¹⁰ahi vangin keima in Balaam thu ka mang sih hi; tua ziehin ama in note thupha ang pie hi; tuaci’n keima in Balak khut sung panin note kang hunkhie hi.

¹¹Jordan galkhatah pei-in Jericho na tun ciengun, Jericho khuo mite in ang do uhi. Tuale Amor-te, Periz-te, Canaan-te, Hit-te, Girgash-te, Hiv-te le Jebus-te in zong note ang do vua, na khut sung vuah amate kang pie hi.

¹²Na masang vuah tunpi[42] ka sawl a, tua in na mai panun Amor kumpi nite a delmang hi; tua khu na namsau ule na thaltang utawh na nawkhiet uh ahi sih hi.

¹³Na sep lo uh leitang, na sat lo uh khuopite kang pie a, tuate sungah na teng uhi; na suon lo uh lenggui huon pan le olive lo panin a ga na ne uhi.

¹⁴“Tua ahi ziehin tu-in TOPA zatah unlen, lungsim tahpi le thumanna tawh ama’ na sem un; na pu na pate un Gun gal le Egypt gam sungah a na a seppieh uh pasien-te koi dawh ta unlen, TOPA’ na sem ta un.

¹⁵Tu-in TOPA’ na na sep nuom sih uleh, gun galkhatah a na na seppieh uh na pu na pate uh’ pasien ahi a, na tenna uh gam sunga om Amor-te’ pasien ahi zongin, a na na seppieh ding popo uh tuni-in teel un; ahi vangin kei le ka innkuonpite in ahile TOPA’ na ka sem ding uhi,” a ci hi.

¹⁶Tua ciengin mite in a dawng vua, “Adang pasiente’ na sem dingin TOPA ka taisan vawt sih ding uhi;

¹⁷azieh pen saltanna Egypt gam panin eite le i pu i pate ei peipi-in, i muna vua tua bang lim thupite a bawl pa khu TOPA i Pasien ahi hi. Ama in i peina lampi tungtawn le i nawh khah mi zosie lahah eite ei kemcing hi;

¹⁸tuale TOPA in i mai vuah tua gama teng Amor-te zosie a notmang hi. Tua ahi ziehin ama i Pasien ahi ziehin eite in zong TOPA’ na i sem ding uhi,” a ci uhi.

¹⁹Hinanle Joshua in mite kungah, “TOPA’ na na sem thei sih ding uhi, bangzieh ahei cile ama pen a siengtho Pasien ahi a, a thangsie Pasien zong ahi hi; ama in na thupalsatnate uh ahi a, na mawnate uh ahi zongin ang maisah sih ding hi.

²⁰TOPA taisanin gamdang pasien-te’ na na sep uleh, na tung vuah ama ang migit zaw ciengin kihei-in na tung vuah sietna bawlin ang maimangsah ding hi,” a ci hi.

²¹Mite in Joshua kungah, “Hi lo hi, TOPA’ na ka sem bo ding uhi!” a ci uhi.

²²Tua ciengin Joshua in mite kungah, “TOPA’ na sep ding na teelna vuah no le no teci na hi uhi,” a ci hi. Tuale amate in, “Teci ka hi uhi,” a ci uhi.

²³Ama in, “Tua ahile note lahah a om gamdang pasien-te paidawh unlen, Israel Pasien, TOPA lamah na lungsim uh nga un,” a ci hi.

²⁴Mite in Joshua kungah, “TOPA ka Pasien’ na ka sem ding vua, a thu ka mang ding uhi,” a ci uhi.

²⁵Tuaci’n khum ni-in Joshua in mite tawh Shechem ah thuciemna bawl a, amate dingin thukham le biehna ngaina kipte a bawl hi.

²⁶Joshua in Pasien’ thukham laibu sungah tam thute a giel hi. Ama in suongtum golpi khat la-in tua muna TOPA’ biehinn sung gangpi sing kung nei-ah phut hi.

²⁷Joshua in mi zosie kungah, “En un, tam suongtum i langkhat vuah teci ahi ding hi; azieh pen TOPA in i kunga a thugen zosie tam suongtum in a za zo hi; tua ahi ziehin na Pasien uh tungah a man loin na gamtat khah uleh, tam suongtum khu na langkhat vuah teci hi ding hi,” a ci hi.

²⁸Tuaci’n amau’ gouluona cietah Joshua in mite a peisah hi.

²⁹Tam thu teng zaw ciengin, TOPA’ nasem Nun’ tapa Joshua si a, a khan kum za le kum sawm pha hi.

³⁰Amate in a gouluo gam Gaash Muolvum leilu lam Ephraim muoltung gama om Timnath-serah ah ama a vui uhi.

³¹Joshua’ khang sung tungtawn le Joshua sanga si nukhia zaw upate’ khang sung tungtawnin Israel in TOPA’ na sem a, tuale amate in TOPA in Israel dinga a sep zosie a thei uhi.

³²Israel-te in Egypt pana a puoh uh Joseph’ gute, Shechem’ pa Hamor’ tapate tung panin Jacob in dangka[43] zakhat tawh a leina Shechem khuo leikhawh sungah a vui uhi; tam mun pen Joseph suonlehlahte’ gouluo gam a suoh hi.

³³Aaron’ tapa Eleazar a si hi; tuale amate in Ephraim muoltung gam sunga a tapa Phinehas tunga kipie Gibeah ah ama a vui uhi.