Read Zou JOSHUA 5 Bible Online

JOSHUA 5 - Zou bible

JOSHUA 5

¹Jordan nitumna gal khat a om Amor-te’ kumpi zosie le tuipi gei-a om Canaan-te’ kumpi zosie in Israel-te in a kantan zaw masang amate adingin Jordan tuite TOPA in a kansahna thu a zah ciengun a lung uh kie a, Israel-te ziehin lungtawp uhi.

²Khum hunin TOPA in Joshua kungah, “Meituh suong nam bawl inlen Israel-te a ni veina a tep tanpieh in,” a ci hi.

³Tuaci’n Joshua in meituh suong nam bawlin Gibeath-haaraloth[5] ah Israel-te’ tep a tanpieh hi.

⁴Joshua in a tep uh a tanna thu tam bang ahi hi: Egypt pan a peikhiet zaw ciengun senel gam tawnin a khuolzin hun sungun pasal galhang zosie a si sieng ta uhi.

⁵A peikhie mi zosie a tep uh a kitan sieng zo vangin senel gam tawnin Egypt panin a khuolzin hun sung vua a suoh mi zosie a tep uh kitan nai lo hi.

⁶Bangzieh ahei cile Israel-te in TOPA’ thu a ngai lona ziehun Egypt pana a peikhie minam buppi le galhang mite a si sieng dongun senel gamah kum sawmli sung khuol a zin uhi. A pu a pate uh tungah pieh dinga a ciemsa bawngnawi le khuoizu luonna gam a musah lo nadingin amate tungah TOPA kiciem hi.

⁷Tuaci’n Joshua in a tep uh a tanpieh mite pen amau’ tanga ama in a piensah a tate uh ahi hi; bangzieh ahei cile amate lamkalah a tep uh kitan nai lo hi.

⁸A minam bupun a tep uh a kitan zaw ciengin a giephuol ciet vuah a dam masangsie-un a om uhi.

⁹TOPA in Joshua kungah, “Tuni-in na kung panun Egypt simmawna ka zielmang zo hi,” a ci hi. Tuaci’n tuni dongin khum mun pen Gilgal[6] kici hi.

¹⁰Gilgal ah Israel-te giephuol satin a om laitahun tua hla a ni sawm le li ni nitahin Jericho zanglei-ah peisan pawi a bawl uhi.

¹¹Peisan pawi zaw a zing cieng, khum ni mama-in khum gama a pieng tol saw lo moh le bukan a ne uhi.

¹²Khum gama piengte a neh ni-un manna a om nawn sih a, tuaci’n khum kumin Canaan leitanga pieng ante a ne ta uhi.

¹³Jericho khuo gei-ah Joshua a tun ciengin a khuodah leh, a khut sungah namsau dawsa-in ama’ mai-a a ding mi khat a mu hi. Ama kungah Joshua pei-in, “Nang ko pawl na hiei, ahi sihle ka langte’ pawl na hiei,” a ci hi.

¹⁴Ama in, “ Koima’ pawl ka hi sih hi; TOPA galkapte’ galkapmangpa dinga ang pei ka hi hi,” a ci hi. Tuale Joshua lei-ah bawhsuhin bie a, ama kungah, “Ka TOPA in a nasempa keima bang ei sawl nuom na hei?” a ci hi.

¹⁵TOPA galkapte’ galkapmangpa in Joshua kungah, “Na keng panin na kedap sutdawh in, azieh pen na dinna mun a siengtho ahi hi,” a ci hi. Tua ma bangin Joshua a gamta hi.