Read Zou JOSHUA 8 Bible Online

JOSHUA 8 - Zou bible

JOSHUA 8

¹Tua ciengin Joshua kungah TOPA in, “Zau sinlen lungkie sin. Galkap zosie zawpi inlen Ai khuo-ah tu-in peito in. En in, nangma tungah Ai kumpipa le a mite, a khuopi le a leitang kang pie zo hi.

²Jericho le a kumpipa tungah na bawl bangin Ai le a kumpipa tungah zong na bawl ding hi; van kinuasiete le a ganhingte beh galvan lahin noma dingin na la ding uhi. Khuopi nua lamah a sim ding na koidap ding uhi,” a ci hi.

³Tuaci’n Ai khuo sim dingin mite a kuonto uhi. Joshua in galhang mi tul sawmthum teelin zanin sawl a,

⁴“Tua khuopi sim dingin a nua lamah na buhdap ding uhi; khuopi panin gamla pei sih un, hinanle na unpi-un a kigingsa-in om un.

⁵Kei le ka ompi mi zosie in khuopi kang nai ding vua, a masa lai bangin ei do dinga ang kuon ciengun amate mai panin ka na tai ding uhi.

⁶Khuopi panin amate ka nawdawh masangun amate in ei del ding uhi; bangzieh ahei cile, ‘A masa lai bangin i kung panun amate a tai uhi,’ ci ding uhi. Amate kung panin ka tai laitahun

⁷na kibuhna mun panun ang pei-in khuopi na la ding uhi; bang ding ahei cile TOPA na Pasien un na khut sung vuah amate ang pie ding hi.

⁸Khuopi na lah zaw ciengun TOPA’ thupiehsa bangin gamta-in mei tawh khuopi na hal ding uhi; thei un, thu kang pie zo uhi,” a ci hi.

⁹Tuaci’n Joshua in amate a sawldawh hi; a kibuh nading munah amate pei-in Ai ni tumna lam, Bethel le Ai kikalah a pang uhi; ahi vangin tua zanin giephuol[11] ah Joshua a gieh hi.

¹⁰Zingmawngin Joshua tho bai-in mite khawm a, mite mai-ah Israel upate tawh Ai-ah a peito uhi.

¹¹Ama tawh a omton galkap zosie a pei to vua, khuopi mai nehin Ai lei lulam pangah giephuol a sat vua, Ai le a kikal vuah luihawm khat a om hi.

¹²Ama in mi tulnga bang peipi-in khuopi nitumna lam Bethel le Ai kikalah a kibudap sah hi.

¹³Tuaci’n galkapte, khuopi leilu lamah galkap phuolpi koi-in, khuopi nitumna lamah nuadalte koi hi. Ahi vangin khum zanin kuom sungah Joshua a gieh hi.

¹⁴Ai kumpipa in tam a mu ciengin ama le ama’ mite zosie le khumi khuo-a teng zosie, zingmawngin a thobai vua, Arabah tawh a kimaingat ahi kimutuona ding munah Israel-te tawh gal kido dingin mallangin a kuon uhi; ahi vangin ama do dingin khuopi nua lamah a pangdap mi a op lam ama in thei lo hi.

¹⁵A mai vuah Joshua le Israel-te zosie a lel kipangin senel gam manaw-in a tai uhi.

¹⁶Tuaci’n amate del dingin khuopi sunga om mi zosie kikai khawmin Joshua a del uleh khuopi pan amate a na kihemmang ta uhi.

¹⁷Ai khuo le Bethel khuo sungah Israel-te a del lo pasal khat beh a om sih hi; amate in khuopi kot honsa-in nuasie-in, Israel-te a nuadel uhi.

¹⁸Tua ciengin TOPA in Joshua kungah, “Na khut sunga om namsau Ai khuo lam ngatin zah in; azieh pen na khut sungah tua khuo kang pie ding hi,” a ci hi. Tuale Joshua in khuopi lamngatin a khut sunga om namsau a zah hi.

¹⁹A khut a zah behin a buhdap galkapte a opna mun panun a dingkhie vua, mailam nawtin a nawtai mama uhi. Khuopi sungah lutin a la vua, tua khuopi mei tawh a hal uhi.

²⁰Tuaci’n Ai mite in a nua-et uleh vantung lamah khuopi meikhu kitungto a mu uhi. Tam lam ahi a, khum lam ahi zongin a tai thei nawn sih uhi. Azieh pen senel gama a tai mite kinua hei-in a delte a do uhi.

²¹A budapte in khuopi a lah zawhna ule Joshua le Israel-te zosie in a kitungto khuopi meikhu a mu ciengun kilehei-in Ai mite a vatgawp uhi.

²²Amate do dingin khuopi panin adangte a kuonto uhi; tuaci’n Israel-te in pawlkhat langkhatah, pawlkhat adang khatah a kui-im uhi. Tuale amate a hinglai le a suohta khat zong om lo za dongin Israel-te in a vatmai uhi.

²³Ahi vangin Ai kumpipa a hingin kiman a, Joshua kungah kipeipi hi.

²⁴Israel-te in senal gam zanga amate a delna Ai khuo mi zosie thatin, namsau tawh a unpi vua a sigam zaw ciengun Ai khuo-ah Israel-te zosie kilekia-in namsau tawh tua khuopi a sim uhi.

²⁵Khum ni-a a si Ai khuo mi zosie numei le pasal a kigawmin tulsawm le tulni pha hi.

²⁶Bangzieh ahei cile Ai khuomi zosie a tha sieng masangin Joshua in a namsau lapna a khut a dawhkia sih hi.

²⁷TOPA in Joshua a thupieh dung zui-in, Israel-te in ganhingte le khuopi sunga van kinuasiete beh gal vanlahin a la uhi.

²⁸Tuaci’n Joshua in Ai khuopi hal a, tua khuopi pen tuni-a bangin buathah kholna suohsah den hi.

²⁹Tuale ama in nitah dongin sing tungah Ai kumpipa a khai hi; tuale ni a tum ciengin Joshua in thu pie-in, amate in sing tung panin a luong a khiesuh vua, khuopi kulkotpi lutna-ah pai-in a tungah suongtum lompi a cieng vua, tuni dongin tua suongcien a omlai hi.

³⁰Tua ciengin Joshua in Israel Pasien TOPA adingin Ebal muol tungah maitam khat lam a,

³¹TOPA’ nasem Moses in Israel-te a thupiehsa bangin Moses’ thukham laibu sungah, “A tungah sia vanzah a kizang lo, suongtum tawh a kikheng lo[12] maitam,” ci-in kigiel hi; tua tungah TOPA adingin meihal biehnate pie-in thunuam biehpiehnate a lui uhi.

³²Tua munah Joshua[13] in Israel-te mitmu-in suong tungah Moses gielsa thukham a tei hi.

³³Israel mite thupha a pieh thei nadingun TOPA’ nasem Moses thupiehsa bangin Israel mi zosie pemta hile tuolsung hile, a upate uh, a uliente ule a thukhente utawh, TOPA’ thuciemna singkuong a puo Levi siempute mai, thuciemna singkuong langkhat, Gerizim Muol mai lamah mi alang, Ebal Muol mai lamah mi alang a ding uhi.

³⁴Tua ciengin ama in thukham laibu sunga kigiel thuphate le samsietnate, thukham sunga om kammal zosie a unpi-in a sim hi.

³⁵Joshua in Moses’ thupieh kammal zosie Israel mi honpi zosie, numeite, nausente le amate lahah a teng pemtate zosie mai-ah a sim lo khat zong om lo hi.